ກະຊວງປ້ອງກັນຄວາມສະຫງົບ ແຫ່ງ ສປປ ລາວ ສຳເລັດການເຂົ້າຮ່ວມສະແດງສິລະປະ ໃນງານມະຫາກຳສິລະປະດົນຕີ ອາຊຽນບວກ (+ຈີນ, ຍີ່ປຸ່ນ) ຈັດຂຶ້ນຢ່າງເປັນທາງການ ໃນວັນທີ 9-10 ກໍລະກົດ 2022 ທີ່ນະຄອນຫຼວງຮ່າໂນ້ຍ ສສ ຫວຽດນາມ, ໂດຍມີ ທ່ານ ຫວໍ ທິ ແອັງ ຊັວນ ກຳມະການສູນກາງພັກ ຮອງປະທານປະເທດ ແຫ່ງ ສສ ຫວຽດນາມ, ພົອ ໂຕເລິມ ກຳມະການກົມການເມືອງສູນກາງພັກ ລັດຖະມົນຕີ ກະຊວງ ປກສ ຫວຽດນາມ ພ້ອມດ້ວຍການນຳຂອງບັນດາປະເທດອາຊຽນບວກ ເຂົ້າຮ່ວມ.

ໃນລະຫວ່າງວັນທີ 7-10 ກໍລະກົດ 2022, ພັອ ສອນພະຈັນ ທຳມະວົງ ຫົວໜ້າກົມໂຄສະນາອົບຮົມ ກົມໃຫຍ່ການເມືອງ ປກສ ໄດ້ຕາງໜ້າໃຫ້ ກະຊວງ ປກສ ນຳພາຄະນະກອງສິລະປະກອນ ປກສ ລາວ ເຂົ້າຮ່ວມການສະແດງງານມະຫາກຳສິລະປະດົນຕີ ອາຊຽນບວກ, ເຊິ່ງການເດີນທາງໄປເຂົ້າຮ່ວມການສະແດງຄັ້ງນີ້ ເປັນຄັ້ງທຳອິດທີ່ກອງສິລະປະກອນ ປກສ ລາວ ໄດ້ປະກອບສ່ວນຖ່າຍທອດວັດທະນະທຳອັນດີງາມຂອງຊາດລາວ, ຄວາມສະຫງ່າອົງອາດຂອງກຳລັງ ປກສ ລາວ ຜ່ານບົດຟ້ອນ-ບົດເພງ, ເຊິ່ງໄດ້ຮັບການຕ້ອນຮັບຢ່າງອົບອຸ່ນ ຈາກຄະນະຜູ້ແທນຫວຽດນາມ ທີ່ມາເຂົ້າຮ່ວມໃນງານ.

ການເຂົ້າຮ່ວມສະແດງຂອງກອງສິລະປະກອນ ປກສ ລາວ ແມ່ນໄດ້ນຳເອົາບົດສະແດງ 4 ລາຍການ ເຂົ້າຮ່ວມສະແດງ ຄື:

  • ບົດຟ້ອນນັກຮົບສັນຕິລາດ
  • ບົດຟ້ອນໃຕ້ຮົ່ມທຸງໄຊ
  • ດ່ຽວແຄນ
  • ບົດເພງຫວຽດນາມ ທີ່ມີຊື່ວ່າ “ ຮ່າໂນ້ຍ ນ່ຽມຕິນມາຮີວ່ອງ ”

ເຊິ່ງບັນຍາກາດຂອງການສະແດງພາຍໃນງານມະຫາກຳສິລະປະດົນຕີ ອາຊຽນບວກ ຖືວ່າເປັນເວທີແຫ່ງການແລກປ່ຽນວັດທະນະທຳອັນດີງາມຂອງບັນດາປະເທດອາຊຽນບວກ ທີ່ມາຮ່ວມສະແດງເຊັ່ນກັນ.

ໃນໂອກາດເຂົ້າຮ່ວມການສະແດງໃນຄັ້ງນີ້, ປະເທດເຈົ້າພາບໄດ້ມອບໃຫ້ ຄະນະນຳພາກອງສິລະປະກອນ ປກສ ລາວ ໂດຍແມ່ນ ພັອ ສອນພະຈັນ ທຳມະວົງ ຕາງໜ້າໃຫ້ບັນດາປະເທດອາຊຽນ ທີ່ມາເຂົ້າຮ່ວມໃນງານ ຂຶ້ນກ່າວສະແດງຄຳເຫັນຕໍ່ພິທີ, ເຊິ່ງມີບາງຕອນທ່ານໄດ້ກ່າວວ່າ:

ບັນດາປະເທດອາຊຽນບວກ ທີ່ມາເຂົ້າຮ່ວມ ໄດ້ນຳເອົາສິລະປະດົນຕີ, ວັດທະນະທຳອັນດີງາມຂອງປະເທດຕົນ ມາສະແດງແລກປ່ຽນຮຽນຮູ້ເຊິ່ງກັນແລະກັນ ທາງດ້ານສິລະປະທີ່ມີຫຼາກຫຼາຍສີສັນ ເພື່ອເຜີຍແຜ່ໃຫ້ແກ່ບັນດາປະເທດໃນພາກພື້ນ ແລະ ສາກົນ ໄດ້ຮັບຮູ້ຢ່າງກວ້າງຂວາງ.

ມາຮອດວັນທີ 11 ກໍລະກົດ 2022, ໃນໂອກາດທີ່ຄະນະກອງສິລະປະກອນ ປກສ ລາວ ເດີນທາງກັບມາແຕ່ການເຂົ້າຮ່ວມສະແດງງານມະຫາກຳສິລະປະດົນຕີ ອາຊຽນບວກ ທີ່ນະຄອນຫຼວງຮ່າໂນ່ຍ, ກອງບັນຊາການ ປກສ ແຂວງເຫງະອານ ກໍໄດ້ເຊີນໃຫ້ ຄະນະກອງສິລະປະກອນ ປກສ ລາວ ມາຮ່ວມການສະແດງ ເພື່ອສະຫຼອງປີສາມັກຄີ ລາວ-ຫວຽດນາມ, ຫວຽດນາມ-ລາວ ແລະ ສະຫຼອງ 2 ວັນປະຫວັດສາດ ຄື: ວັນເຊັນສົນທິສັນຍາມິດຕະພາບ ແລະ ການຮ່ວມມື ລາວ-ຫວຽດນາມ ຄົບຮອບ 45 ປີ (18 ກໍລະ ກົດ 1977-2022) ແລະ ວັນສ້າງຕັ້ງສາຍພົວພັນການທູດ ລາວ-ຫວຽດນາມ ຄົບຮອບ 60 ປີ (5 ກັນຍາ 1962-2022), ເຊິ່ງບັນຍາກາດແມ່ນເຕັມໄປດ້ວຍມິດຕະພາບ, ຄວາມສາມັກຄີພິເສດ ແລະ ມິດສະຫາຍອ້າຍນ້ອງ.