ໃນ 6 ເດືອນຕົ້ນປີ 2022, ແຂວງຄຳມ່ວນ ມີຜູ້ເສຍຊີວິດທີ່ເກີດຂຶ້ນຍ້ອນອຸບັດຕິເຫດທ້ອງຖະໜົນເຖິງ 13 ຄົນ; ໂດຍສາເຫດທີ່ພົ້ນເດັ່ນ, ເຊິ່ງມີສາ ເຫດມາຈາກນັກຂັບຂີ່ຈຳນວນໜຶ່ງຖືເບົາຕໍ່ກົດລະບຽບຈະລາຈອນ ຈຶ່ງເຮັດໃຫ້ເກີດມີອຸບັດຕິເຫດຕາມທ້ອງຖະໜົນເພີ່ມຂຶ້ນ, ບັນຫາຫຼັກກໍຍ້ອນເມົາ ແລ້ວຂັບຂີ່ລົດໄວເກີນກຳນົດ, ບໍ່ໃສ່ໝວກກັນກະທົບ, ຕັ້ງກຸ່ມແກ້ງແຂ່ງລົດກວນເມືອງ, ດັດແປງສະພາບເຕັກນິກລົດ, ລ່ວງປ້າຍຫ້າມ, ປ້າຍສັນຍານ, ລ້ຽວບໍ່ຮັບປະກັນ, ບໍ່ໃຫ້ກຽດເຊິ່ງກັນແລະກັນໃນການໃຊ້ລົດໃຊ້ຖະໜົນ, ຈອດລົດຊະຊາຍຕາມຂອບທາງ ແລະອື່ນໆ.

ພະແນກຕໍາຫຼວດຈະລາຈອນ ປກສ ແຂວງຄໍາມ່ວນ ໃຫ້ຮູ້ວ່າ: ໃນ 6 ເດືອນຕົ້ນປີ 2022, ສະພາບການສັນຈອນພາບໃນແຂວງຍັງພົບຄວາມຫຍຸ້ງ ຍາກ ພໍສົມຄວນສືບເນື່ອງມາຈາກຜູ້ໃຊ້ລົດ-ໃຊ້ຖະໜົນບໍ່ປະຕິບັດກົດລະບຽບທີ່ວາງອອກຢ່າງເຂັ້ມງວດ ຈຶ່ງເຮັດໃຫ້ມີອຸບັດຕິເຫດເກີດຂຶ້ນຕາມທ້ອງຖະໜົນ; ໃນການແກ້ໄຂບັນຫາດັ່ງກ່າວ ເຈົ້າໜ້າທີ່ພະແນກຕໍາຫຼວດຕໍາຫຼວດຈະລາຈອນແຂວງ ແລະ ເມືອງ ກໍໄດ້ເຄື່ອນໄຫວໂຄສະນາລະບຽບການສັນຈອນຢູ່ຕາມສໍານັກງານ, ໂຮງຈັກໂຮງງານ, ສະຖານບັນສຶກສາຕະຫຼອດຮອດກຸ່ມບ້ານຕ່າງໆ ເພື່ອເຕືອນສະຕິໃຫ້ຜູ້ຂັບຂີ່ປະຕິບັດກົດລະບຽບທີ່ວາງອອກຢ່າງເຂັ້ມງວດ ພ້ອມນັ້ນເຈົ້າໜ້າທີ່ ກໍຍັງໄດ້ປະຈໍາຈຸດ, ປະຈໍາປ້ອມ, ຢູ່ຕາມເສັ້ນທາງເພື່ອອໍານວຍຄວາມສະດວກ ແລະ ວຽກງານອື່ນໆ.

ຢ່າງໃດກໍຕາມ, ເຖິງຈະສຸມໃສ່ຈັດຕັ້ງປະຕິບັດວຽກງານຢ່າງເຂັ້ມງວດ ແຕ່ກໍປັດສະຈາກບໍ່ໄດ້ບັນຫາອຸບັດຕິເຫດເກີດຂຶ້ນ. ໃນ 6 ເດືອນຕົ້ນປີຜ່ານມາ, ທົ່ວແຂວງຄຳມ່ວນ ມີອຸບັດຕິເຫດເກີດຂຶ້ນທັງໝົດ 27 ຄັ້ງ, ມີພາຫະນະເປ່ເພທັງໝົດ 48 ຄັນ. ໃນນີ້, ເປ່ເພເລັກນ້ອຍ 6 ຄັນ, ເປ່ເພສົມຄວນ 41 ຄັນ, ໃຊ້ການບໍ່ໄດ້ 1 ຄັນ; ຄົນໄດ້ຮັບບາດທັງໝົດ 34 ຄົນ. ໃນນີ້, ບາດເຈັບເລັກໜ້ອຍ 15 ຄົນ, ບາດເຈັບສົມຄວນ 14 ຄົນ, ບາດເຈັບສາຫັດ 5 ຄົນ ແລະ ເສຍຊິວິດ 13 ຄົນ ລວມມູນຄ່າ ເສຍຫາຍທັງໝົດ 2.086.000.000 ກີບ. ຖ້າທຽບໃສ່ປີຜ່ານມາແມ່ນເພີ່ມຂຶ້ນ. ສຳລັບເມືອງເມືອງທີ່ເກີດອຸບັດຕິເຫດຫຼາຍກວ່າໝູ່ອັນດັບ 1 ແມ່ນ ເມືອງທ່າແຂກ 18 ຄັ້ງ ແລະ ຮອງລົງມາແມ່ນເມືອງຫີນບູນ 5 ຄັ້ງ.

ສໍາລັບທິດທາງແຜນການ ໃນ 6 ເດືອນທ້າຍປີຕໍ່ໜ້າ, ເຈົ້າໜ້າທີ່ວິຊາສະເພາະ ຈະສືບຕໍ່ເອົາໃຈໃສ່ວຽກງານການໂຄສະນາເຜີຍແຜ່ກົດລະບຽບຈາລະ ຈອນໃຫ້ແກ່ຜູ້ທີ່ໃຊ້ລົດ-ໃຊ້ຖະໜົນດ້ວຍຫຼາຍຮູບການ, ຫຼາຍວິທີການທີ່ເລິກເຊິ່ງ ພ້ອມທັງຈັດສັນຄວາມເປັນລະບຽບຮຽບຮ້ອຍຕາມທ້ອງຖະໜົນໃຫ້ເຂົ້າສູ່ລະບົບເທື່ອລະກ້າວ, ສືບຕໍ່ເຮັດວຽກງານດຳເນີນ ແລະ ແກ້ໄຂຄະດີອຸບັດຕິເຫດທີ່ເກີດຂຶ້ນໃຫ້ວ່ອງໄວຖືກຕ້ອງ ແລະ ເປັນທຳ ແລະ ສືບຕໍ່ເຮັດວຽກງານຄຸ້ມຄອງພາຫະນະ ແລະ ການຂັບຂີ່ໃຫ້ລະອຽດຈະແຈ້ງຖືກຕ້ອງຕາມຫຼັກການວິຊາສະເພາະຢ່າງເຂັ້ມງວດ.