ທ່ານ ທົງສະຫວັດປ່ຽມມະໄລ ຮອງຫົວໜ້າຂະແໜງຄວບຄຸມພະຍາດຕິດຕໍ່ພະແນກສາທາລະນະສຸກແຂວງສາລະວັນ ໄດ້ລາຍງານຕໍ່ກອງປະຊຸມ ຂໍການສະໜັບສະໜູນ ຄະນະກໍາມະການຕ້ານ ແລະ ສະກັດກັ້ນການແພ່ລະບາດຂອງພະຍາດໄຂ້ຍູງ ກ່ຽວກັບສະພາບການລະບາດຂອງພະຍາດໄຂ້ຍູງລາຍ ຢູ່ພາຍໃນແຂວງໄລຍະ 6 ເດືອນຕົ້ນປີ 2022, ເຊິ່ງມີຜູ້ຕິດເຊື້ອໄຂ້ຍູງລາຍ ຈໍານວນ 834 ກໍລະນີ ແລະ ເສຍຊີວິດ 2 ກໍລະນີ. ໃນນັ້ນ, ເມືອງສາລະວັນ 158 ກໍລະນີ, ເລົ່າງາມ 76 ກໍລະນີ, ຄົງເຊໂດນ 101 ກໍລະນີ, ລະຄອນເພັງ 166 ກໍລະນີ ເສຍຊີວິດ 1 ກໍລະນີ, ວາປີ 330 ກໍລະນີເສຍຊີວິດ 1 ກໍລະນີ, ເມືອງຕະໂອ້ຍ 1 ກໍລະນີ. ນອກຈາກນັ້ນ, ມີເມືອງຕຸ້ມລານ ແລະ ເມືອງສະໝ້ວຍ ຍັງບໍ່ທັນພົບຜູ້ຕິດເຊື້ອ. ສຳລັບສາເຫດທີ່ກໍ່ໃຫ້ເກີດມີການແພ່ລະບາດຂອງໄຂ້ຍູງລາຍໃນປີ  2022 ແມ່ນມາຈາກສະພາບດິນຟ້າອາກາດໃນປັດຈຸບັນທີ່ມີການປ່ຽນແປງ, ການດໍາເນີນການຄວບຄຸມໜອນນ້ຳບໍ່ຕໍ່ເນື່ອງ, ການເຝົ້າລະວັງ ແລະ ການປ່ຽນແປງສາຍພັນຂອງເຊື້ອຍູງລາຍ D1, D2-D2 (2022). ແຕ່ເຖິງຢ່າງໃດກໍ່ຕາມ, ຄະນະກໍາມະການຄວບຄຸມພະຍາດຕິດຕໍ່ຂັ້ນແຂວງ ແລະ ເມືອງ ຍັງໄດ້ແບ່ງຄວາມຮັບຜິດຊອບໃຫ້ແຕ່ລະພາກສ່ວນ, ມີຄໍາສັ່ງແນະນໍາຂອງທ່ານເຈົ້າແຂວງລົງເຖິງພະແນກການ, ເມືອງ ແລະ ບັນດາພາກສ່ວນອົງການຈັດຕັ້ງຕ່າງໆທາງສັງຄົມ, ປັບປຸງຄະນະຊີນໍາ, ກອງເລຂາໃນຫ້ອງປະຕິບັດການສຸກເສີນດ້ານສາທາ ລະນະສຸກ (EOC) ຂັ້ນແຂວງ 8 ຕົວເມືອງ ພ້ອມທັງແບ່ງຄວາມຮັບຜິດຊອບໃຫ້ພະນັກງານຫ້ອງການສາທາເມືອງ, ໂຮງໝໍນ້ອຍ ຮັບຜິດຊອບເປັນແຕ່ລະບ້ານ.

ໂອກາດດຽວກັນນັ້ນ, ທ່ານ ສົມໃຈ ອຸ່ນຈິດ ຮອງເຈົ້າແຂວງສາລະວັນ, ປະທານຄະນະກຳມະການຕ້ານ ແລະ ຄວບຄຸມພະຍາດຕິດຕໍ່ຂັ້ນແຂວງ ກໍໄດ້ໃຫ້ກຽດໂອ້ລົມ, ເຊິ່ງທ່ານໄດ້ຮຽກຮ້ອງໃຫ້ພ້ອມກັນເອົາໃຈໃສ່ຢ່າງເຄັ່ງຄັດຕໍ່ການຕອບໂຕ້ ແລະ ສະກັດກັ້ນພະຍາດໄຂ້ເລືອດອອກ ເພີ່ມທະວີໂຄສະ ນາສຸຂະສຶກສາຂໍ້ມູນຂ່າວສານສາທາລະນະສຸກ ໃຫ້ແກ່ປະຊາຊົນບັນດາເຜົ່າຍັງບໍ່ທັນເລິກເຊິ່ງ, ກວ້າງຂວາງ ແລະ ທົ່ວເຖິງ ຍັງບໍ່ທັນໄດ້ກາຍເປັນໜ້າທີ່ຂອງທົ່ວພັກ-ທົ່ວລັດ ແລະ ທົ່ວສັງຄົມ, ປັບປຸງຍົກລະດັບດ້ານວິຊາການໃຫ້ແກ່ໂຮງໝໍແຂວງ, ໂຮງໝໍເມືອງ ແລະ ໂຮງໝໍນ້ອຍໃຫ້ຮັບປະກັນການບໍລິ ການ, ການປິ່ນປົວ ຫຼີກລ່ຽງບໍ່ໃຫ້ມີການເສຍຊີວິດ ໂດຍສະເພາະຍາດພະຍາດໄຂ້ຍຸງລາຍ, ເພີ່ມທະວີການປະສານງານກັບພາກສ່ວນຕ່າງໆຂັ້ນແຂວງຂັ້ນສູນກາງ, ອົງການຈັດຕັ້ງສາກົນ ແລະ ອຳນາດການປົກຄອງເມືອງໃຫ້ໄດ້ດີໃຫ້ເຂົາເຈົ້າມີສ່ວນຮວ່ມ ໂດຍສະເພາະການສ້າງຂະບວນການອະນາໄມທໍາລາຍແຫຼ່ງເພາະພັນໃນເຂດຄວາມຮັບຜິດຊອບຂອງຕົນ, ເພີ່ມທະວີການຊີ້ນຳໆພາ ແລະ ຕິດຕາມກວດກາຢ່າງເປັນປະຈຳ ໂດຍການເຮັດວຽກເປັນທິມງານນຳພາເປັນໝູ່ຄະນະ, ເຮັດວຽກມີປະເມີນຜົນ ແລະ ສະຫຼຸບລາຍງານຕາມກຳນົດເວລາ ແລະ ຂໍ້ມູນຕ້ອງຖືກຕ້ອງລະອຽດຊັດເຈນ.

ຈາກນັ້ນ, ກອງປະຊຸມຍັງໄດ້ມີການປຶກສາ-ຫາລື ແລກປ່ຽນບົດຮຽນ ພ້ອມທັງຮັບຟັງການຜ່ານຂໍ້ຕົກລົງຂອງທ່ານເຈົ້າແຂວງສາລະວັນເລກທີ 517/ຈຂ.ສວ, ວ່າດ້ວຍການແຕ່ງຕັ້ງຄະນະກໍາມະການ ແລະ ກອງເລຂາຕ້ານ ແລະ ຄວບຄຸມພະຍາດຕິດຕໍ່ຂັ້ນແຂວງ, ຂໍ້ຕົກລົງເລກທີ 492/ຈຂ.ສວ ວ່າດ້ວຍການແຕ່ງຕັ້ງຄະນະສະເພາະກິດປ້ອງກັນ, ຕ້ານສະກັດກັ້ນ ແລະ ຄວບຄຸມການແຜ່ລະບາດຂອງພະຍາດໄຂ້ຍູງລາຍ, ຄໍາສັ່ງແນະນໍາຂອງທ່ານເຈົ້າແຂວງເລກທີ 05/ຈຂ.ສວ ເລື່ອງ: ການເພີ່ມທະວີປ້ອງກັນ, ຕ້ານ ແລະ ຄວບຄຸມການແຜ່ລະບາດຂອງພະຍາດໄຂ້ຍູງຕື່ມອີກ, ກອງປະຊຸມຂໍການສະ ໜັບສະໜູນ ຄະນະກໍາມະການຕ້ານ ແລະ ສະກັດກັ້ນການແຜ່ລະບາດຂອງພະຍາດໄຂ້ຍູງລາຍຢູ່ແຂວງສາລະວັນ ໄດ້ຈັດຂຶ້ນໃນວັນທີ 21 ກໍລະກົດນີ້ ຢູ່ທີ່ສະໂມສອນຂອງແຂວງ ເປັນປະທານໂດຍ ທ່ານ ສົມໃຈ ອຸ່ນຈິດ ຮອງເຈົ້າແຂວງສາລະວັນ, ປະທານຄະນະກຳມະການຕ້ານ ແລະ ຄວບຄຸມພະຍາດຕິດຕໍ່ຂັ້ນແຂວງ, ທ່ານ ດຣ ອາຄົມ ລໍ່າວິຈິດ ຫົວໜ້າພະແນກສາທາລະນະສຸກແຂວງ. ມີບັນດາທ່ານຫົວໜ້າ-ຮອງພະແນການທີ່ກ່ຽວຂ້ອງ, ທ່ານຮອງເຈົ້າເມືອງຜູ້ຊີ້ນໍາວຽກງານວັດທະນະທໍາ-ສັງຄົມ, ຫົວໜ໊າຫ້ອງການສາທາລະນະສຸກ 8 ຕົວເມືອງ, ຫົວໜ້າຂະແໜງ ແລະ ພະນັກງານວິຊາການເຂົ້າ ຮ່ວມ.