ວັນທີ 19 ກໍລະກົດ 2022, ທ່ານ ອ່ອງຄຳ ໄຊຍະລາດ ຫົວໜ້າຫ້ອງການ ຍທຂ ເມືອງປາກທາ ແຂວງບໍ່ແກ້ວ ພ້ອມດ້ວຍຄະນະ ໄດ້ລົງເຄື່ອນໄຫວຕິດຕາມຊຸກຍູ້ຄວາມຄືບໜ້າການກໍ່ສ້າງສ້ອມແປງເສັ້ນທາງ ຂອງບໍລິສັດຄູນເມືອງໄຊ ພັດທະນາກໍ່ສ້າງ ຈຳກັດ ຜູ້ດຽວ ເປັນຜູ້ຮັບເໝົາກໍ່ສ້າງ ແຕ່ສາມແຍກຫ້ວຍຊາຍນ້ອຍ ຫາ ປາກທາ.

ໂອກາດດັ່ງກ່າວ ທ່ານ ໄພທູນ ຄຳສີວໍລະວົງ ອຳນວຍການບໍລິສັດຄູນເມືອງໄຊ ພັດທະນາກໍ່ສ້າງ ຈຳກັດ ຜູ້ດຽວ ໄດ້ລາຍງານໃຫ້ຮູ້ວ່າ:

ໂຄງການກໍ່ສ້າງເສັ້ນທາງ ແຕ່ສາມແຍກຫ້ວຍຊາຍນ້ອຍ ຫາ ປາກທາ ມີຄວາມຍາວ 16 ກິໂລເເມັດ, ຄວາມກວ້າງ 6 ແມັດ, ເຊິ່ງເປັນໂຄງການທີ່ນອນຢູ່ໃນແຜນການລົງທຶນຂອງລັດ ປະຈໍາປີ 2022 ຂອງແຂວງບໍ່ແກ້ວ (ຮ່ວງທຶນໂຄງການຟື້ນຟູໄພພິບັດ) ໂດຍໄດ້ເລີ່ມລົງມືກໍ່ສ້າງມາແຕ່ຕົ້ນເດືອນ 6; ມາຮອດວັນທີ 19 ກໍລະກົດ 2022 ມີຄວາມຄືບໜ້າປະມານ 85%, ໜ້າວຽກຫຼັກໆທາງບໍລິສັດແມ່ນໄດ້ເຮັດຕາມສັນຍາ ເຊິ່ງໜ້າວຽກທີ່ເຮັດແມ່ນຂູດຮື້ໜ້າທາງໄລຍະທີ່ເປ່ເພ ພ້ອມດ້ວຍປູແຮ່ໂລອັດແໜ້ນຄືນໃໝ່, ເປີດກວ້າງຂະຫຍາຍໜ້າທາງ ໂດຍສະເພາະແມ່ນຊ່ວງທາງໂຄງ ແລະ ຈົກຮ່ອງລະບາຍນ້ຳສອງຂ້າງທາງ.

ຖ້າຫາກໂຄງການດັ່ງກ່າວນີ້ສຳເລັດ ຈະເຮັດໃຫ້ການຄົມມະນາຄົມຂົນສົ່ງລະຫວ່າງເມືອງຕໍ່ເມືອງ ກໍຄື ເມືອງຫ້ວຍຊາຍ ຫາ ເມືອງປາກທາ ມີຄວາມສະດວກສະບາຍຫຼາຍຂຶ້ນກວ່າເກົ່າ. ປັດຈຸບັນ, ບໍລິສັດພວມຂຸ້ນຂ້ຽວໃສ່ການກໍ່ສ້າງ ຄາດວ່າຈະໃຫ້ສໍາເລັດໃນທ້າຍເດືອນກໍລະກົດນີ້, ໂຄງການດັ່ງກ່າວແມ່ນ ພະແນກໂຍທາທິການ ແລະ ຂົນສົ່ງ ແຂວງບໍ່ແກ້ວ ເປັນເຈົ້າຂອງໂຄງການ.