ກອງປະຊຸມໂຄງການກໍ່ສ້າງເສັ້ນທາງປູຢາງສອງຊັ້ນ ໄລຍະທີ I ຂອງບ້ານດົງສະຫວາດ ເມືອງສີສັດຕະນາກ ນະຄອນຫຼວງວຽງຈັນ ໃນວັນທີ 21 ກໍລະກົດ 2022, ເຂົ້າຮ່ວມໂດຍ ທ່ານ ວິໄລກອນ ສູນດາລາ ຮອງເຈົ້າເມືອງສີສັດຕະນາກ, ມີ ທ່ານ ນາງ ສາຍສະໝອນ ວົງພະຈັນ ນາຍບ້ານດົງສະຫວາດ, ມີອົງການປົກຄອງບ້ານ ແລະ ແຂກຮັບເຊີນ ເຂົ້າຮ່ວມ.

ທ່ານ ນາງ ສາຍສະໝອນ ວົງພະຈັນ ກ່າວວ່າ:

ບ້ານດົງສະຫວາດ ມີພົນລະເມືອງ 3.894 ຄົນ, ມີ 1.272 ຫຼັງຄາ, ມີ 68 ໜ່ວຍ, ມີທາງຮ່ອມ 61 ຮ່ອມ, ມີເສັ້ນທາງສາຍຫຼັກທີ່ເຊື່ອມຕໍ່ກັບບ້ານອ້ອມຂ້າງ ຢູ່ 6 ສາຍຫຼັກ, ໜຶ່ງໃນນັ້ນ ມີທາງເລາະຮ່ອງນໍ້າຊົນລະປະທານ ທີ່ກໍາລັງປູຢາງຢູ່ປັດຈຸບັນນີ້ (ຜ່ານມາ ກອງທຶນສ້າງທາງບ້ານດົງສະຫວາດ ແມ່ນບໍ່ມີ), ແຕ່ເຫດຜົນທີ່ເຮົາຢາກສ້າງທາງເສັ້ນນີ້ກ່ອນ ຍ້ອນມີເງື່ອນໄຂຫຼາຍອັນ ຄື:

ພະແນກໂຍທາທິການ ແລະ ຂົນສົ່ງ ນະຄອນຫຼວງວຽງຈັນ ໄດ້ມີການປູທາງດິນແດງ ແຕ່ບ້ານດອນກອຍ ຮອດບ້ານດົງສະຫວາດ ແລະ ຢຽບໂລໃຫ້ຮຽບຮ້ອຍ ມູນຄ່າ 600 ລ້ານ (ໃນນັ້ນ ປູຢາງ 200 ລ້ານ); ນັກທຸລະກິດ, ປະຊາຊົນຢູ່ລຽບຄອງຊົນລະປະທານ ສົມທົບກັບ ອົງການປົກຄອງບ້ານ ໄດ້ປຶກສາຫາລືຍາດເວລາເອົາຊ່ວງໄລຍະທີ່ເພິ່ນປູທາງແດງ ແລະ ໄດ້ປຶກສາຫາລືກັບ ຄະນະພັກເມືອງ ຜູ້ຊີ້ນໍາກຸ່ມບ້ານ, ຊີ້ນໍາບ້ານ ຈຶ່ງໄດ້ຕົກລົງເຮັດເສັ້ນທາງນີ້ ໃຫ້ໄດ້ທາງມາດຕະຖານ ຜ່ານບ້ານດົງສະຫວາດ ໂດຍໄດ້ທາງປູຢາງ 2 ຊັ້ນຂຶ້ນ ມີຄວາມຍາວ 1.040 ແມັດ, ກວ້າງ 6 ແມັດ, ມູນຄ່າການກໍ່ສ້າງ 468.000.000 ກີບ, ເຊິ່ງແມ່ນທຶນຂອງປະຊົນພາຍໃນບ້ານ (ເລີ່ມຕົ້ນກະກຽມ ແຕ່ເດືອນກຸມພາ 2022).

ມາຮອດໄລຍະນີ້ ແມ່ນໄດ້ປູຢາງຊັ້ນ 1 ແລ້ວ ໄດ້ມີຄວາມຄືບໜ້າປະມານ 60% ແລະ ໄດ້ຖອກເງິນໃຫ້ບໍລິສັດ ຈໍານວນ 234 ລ້ານກີບ ແລະ ຍັງເຄິ່ງໜຶ່ງ ແມ່ນຈະໄດ້ຖອກໃຫ້ບໍລິສັດ ຫຼັງຈາກທີ່ປູຢາງຊັ້ນ 2 ສໍາເລັດ ໂດຍບໍ່ໃຫ້ກາຍເດືອນພະຈິກ 2022. ດັ່ງນັ້ນ, ຄະນະຮັບຜິດຊອບໂຄງການນີ້ ຈຶ່ງຕົກລົງເຫັນດີເປັນເອກະພາບກັບ ຄະນະພັກເມືອງ, ອົງການປົກຄອງບ້ານ, ນັກທຸລະກິດ, ພໍ່-ແມ່ປະຊາຊົນ ອອກສົມທົບກັນໃນເງື່ອນໄຂທີ່ ຄະນະກໍາມະການຕົກລົງກັນ ຄື:

ລະດົມນໍານັກທຸລະກິດ ແລະ ວັດ, ປະຊາຊົນ ປະກອບສ່ວນນໍາໂດຍເອົາລົດເປັນຫຼັກ ຄື: ຜູ້ມີລົດຈັກ ເກັບ 200.000 ກີບຕໍ່ຄອບຄົວ, ຜູ້ມີລົດເກງ-ກະບະ ເກັບ 500.000 ກີບຕໍ່ຄອບຄົວ, ລົດ 6 ລໍ້ນ້ອຍແກ່ດິນ ເກັບ 1.000.000 ກີບຕໍ່ຄອບຄົວ, ລົດ 10 ລໍ້ແກ່ດິນ ເກັບ 2.000.000 ກີບຕໍ່ຄອບຄົວ, ຖ້າມີຄອບຄົວໃດຂາດເຂີນ ກໍເບິ່ງຕາມຄວາມເປັນຈິງ ໂດຍເອົາຫົວໜ້າໜ່ວຍເປັນຫຼັກຢັ້ງຢືນ ກໍແມ່ນໄດ້ນະໂຍບາຍໃຫ້ເຂົາເຈົ້າ.

ໂອກາດດັ່ງກ່າວ ຫຼາຍພາກສ່ວນກໍໄດ້ມອບເງິນຊຸກຍູ້ ເພື່ອກໍ່ສ້າງເສັ້ນທາງໃຫ້ສໍາເລັດ ເຊິ່ງລວມຍອດເງິນໃນການມອບຄັ້ງນີ້ແມ່ນ 200 ລ້ານກວ່າກີບ.