ໃນໄລຍະຜ່ານມາ, ເສັ້ນທາງຫຼາຍເສັ້ນຢູ່ນະຄອນຫຼວງວຽງຈັນ ຕົກຢູ່ໃນສະພາບມືດມົວ ທັງທີ່ເສັ້ນທາງດັ່ງກ່າວນັ້ນມີລະບົບໄຟເຍືອງທາງ, ແຕ່ລະບົບ ໄຟເຍືອງທາງເຫຼົ່ານັ້ນຊໍ້າພັດມືດດັບ (ໄຟເຍືອງທາງປີດ) ເຮັດໃຫ້ຜູ້ໃຊ້ລົດ-ໃຊ້ຖະໜົນສັນຈອນໄປ-ມາພົບຄວາມຫຍຸ້ງຍາກ, ສ່ຽງຕໍ່ການເກີດອຸບັດຕິເຫດ ແລະ ເກີດບັນຫາອາຊະຍາກໍາ ເປັນຕົ້ນແມ່ນ ປຸ້ນຈີ້, ຊິງຊັບ; ເຊິ່ງບັນຫາດັ່ງກ່າວນີ້ ພາກສ່ວນກ່ຽວຂ້ອງກໍຄວນຮີບຮ້ອນແກ້ໄຂ ເພື່ອຄວາມປອດໄພໃນການສັນຈອນ.

ດັ່ງທີ່ຫຼາຍຄົນເຫັນນໍາກັນແລ້ວວ່າ ຫຼາຍເສັ້ນທາງຢູ່ນະຄອນຫຼວງວຽງຈັນ ພົບກັບບັນຫາມືດໃນຍາມຄໍ່າຄືນ ແຕ່ສ່ວນຫຼາຍແມ່ນເກີດຢູ່ເສັ້ນທາງ 450 ປີ, ເສັ້ນທາງດັ່ງກ່າວເປັນເສັ້ນທາງໃຫຍ່ ສ້າງຂຶ້ນເພື່ອຂ່ຳນັບຮັບຕ້ອນ ວັນສ້າງຕັ້ງນະຄອນຫຼວງວຽງຈັນ ຄົບຮອບ 450 ປີ ເມື່ອປີ 2010 ຜ່ານມາ; ມາຮອດປັດຈຸບັນ, ຍັງມີຫຼາຍຈຸດໃນເສັ້ນທາງດັ່ງກ່າວ ບໍ່ມີໄຟເຍືອງທາງ ຫຼື ບາງບ່ອນມີລະບົບໄຟເຍືອງທາງ ແຕ່ເສັ້ນທາງຍັງມືດ ຍ້ອນລະບົບໄຟຊຸດໂຊມມາຫຼາຍປີແລ້ວ.

ເສັ້ນທາງຈາກດອນໜູນ ຫາ ຫຼັກ 21 ເມືອງໄຊທານີ ມືດມາດົນນານ ຈົນປະຊາຊົນທີ່ທຽວທາງດັ່ງກ່າວລຶ້ງເຄີຍກັບການສັນຈອນໄປ-ມາແລ້ວ ແລະ ຍັງບໍ່ມີວີ່ແວວທີ່ຈະແກ້ໄຂ.

ເສັ້ນທາງເລກ 10 ແຕ່ດອນໜູນ ຫາ ທ່າງ່ອນ ເສັ້ນທາງນີ້ມີລະບົບໄຟເຍືອງທາງຄົບຊຸດ ແຕ່ເສັ້ນທາງຍັງມືດ, ບາງຈຸດໄຟດັບຍາວຢຽດ ແລະ ຮຸ່ງເປັນບາງຈຸດເທົ່ານັ້ນ.

ເສັ້ນທາງຕັດໃໝ່ ໜອງປີງ ຫາ ໜອງບຶກ ເສັ້ນທາງນີ້ມີລະບົບໄຟເຍືອງທາງ ແຕ່ປັດຈຸບັນຍັງບໍ່ທັນເປີດໄຟໃຫ້ຮຸ່ງແຈ້ງເທື່ອ.

ນອກນີ້, ຍັງມີອີກຫຼາຍເສັ້ນທາງທີ່ມີເສົາກັບດອກໄຟໄວ້ ແຕ່ບໍ່ມີແສງສະຫວ່າງ; ເຊິ່ງບັນຫາຄວາມມືດມົ່ວດັ່ງກ່າວນີ້ ຍັງບໍ່ໄດ້ຮັບການແກ້ໄຂ ແລະ ສ້ອມແປງຄືນແຕ່ຢ່າງໃດ, ອັນເປັນຕົ້ນເຫດພາໃຫ້ເກີດອຸບັດເຫດໃນເສັ້ນທາງດັ່ງກ່າວ ນັບມື້ນັບມີຫຼາຍ ຈົນຫຼາຍຄົນໃຫ້ຂະໜານນາມວ່າ ເປັນເສັ້ນທາງມໍລະນະ; ເຊິ່ງໃນຄວາມຈິງ ກໍເປັນແນວນັ້ນແທ້ ແລະ ຜ່ານມາ ກໍຍັງມີສື່ມວນຊົນຫຼາຍສໍານັກ ໄດ້ນໍາສະເໜີຂ່າວ ເພື່ອສ່ອງແສງຫາພາກສ່ວນກ່ຽວຂ້ອງ ໃຫ້ມີການປັບປຸງສ້ອມແປງໄຟເຍືອງທາງດັ່ງກ່າວ, ແຕ່ມາຮອດປັດຈຸບັນ ກໍຍັງບໍ່ທັນມີພາກສ່ວນກ່ຽວຂ້ອງເຂົ້າມາສ້ອມແປງໄຟເຍືອງທາງ ໃຫ້ກັບຄືນມາເປີດໃຊ້ສູ່ສະພາບປົກກະຕິ.

ໃນປີ 2021 ຜ່ານມາ, ຫ້ອງການຄຸ້ມຄອງ  ແລະ ບໍລິການຕົວເມືອງວຽງຈັນ ໄດ້ສ້ອມແປງໄຟເຍືອງທາງສາຍຫຼັກ ກະກຽມຕ້ອນຮັບຂະບວນການວັນສໍາຄັນຕ່າງໆຂອງຊາດ ເຊັ່ນ: ສະເຫຼີມສະຫຼອງສໍາຄັນຕ່າງໆ ປະຕິບັດໄດ້ 2.850 ຈຸດ ໃນຈໍານວນ 19 ເສັ້ນທາງ, ສ້ອມແປງໄຟເຍືອງທາງ ຕາມທາງຮ່ອມໃນເຂດໃຈກາງເມືອງ ປະຕິບັດໄດ້ 120 ຈຸດ ໃນຈໍານວນ 8 ເສັ້ນທາງ ແລະ ສ້ອມແປງຕູ້ໄຟເຍືອງທາງ ໄດ້ 103 ຕູ້ ໃນຈໍານວນ 21 ເສັ້ນທາງ.

ຫວ່າງບໍ່ດົນມານີ້, ກໍມີກອງປະຊຸມປຶກສາຫາລືຮ່ວມ ລະຫວ່າງ ຮອງເຈົ້າຄອງນະຄອນຫຼວງວຽງຈັນ ແລະ ບັນດາຂະແໜງການກ່ຽວຂ້ອງ ຄື: ພະແນກໂຍທາທິການ ແລະ ຂົນສົ່ງ, ຫ້ອງການຄຸ້ມຄອງ ແລະ ບໍລິການຕົວເມືອງວຽງຈັນ, ເຈົ້າໜ້າທີ່ຕໍາຫຼວດຈະລາຈອນ ແລະ ອົງການປົກຄອງຕົວເມືອງຕ່າງໆ ໃນການສັນຄວາມເປັນລະບຽບຮຽບຮ້ອຍຂອງຕົວເມືອງ, ໂດຍສະເພາະແມ່ນ ການນຳໃຊ້ທາງຍ່າງເປັນບ່ອນຈອດລົດ ແລະ ຂາຍເຄື່ອງຕ່າງໆ ແລະ ໃນຂະນະນັ້ນ, ທ່ານຮອງເຈົ້າຄອງ ກໍໄດ້ແນະນຳໃຫ້ ຫ້ອງການຄຸ້ມຄອງ ແລະ ບໍລິການຕົວເມືອງວຽງຈັນ ເອົາໃຈໃສ່ສ້ອມແປງລະບົບໄຟອຳນາດ, ປ້າຍເຕືອນຈະລາຈອນ ແລະ ໄຟເຍືອງທາງ ໃຫ້ສາມາດກັບຄືນມາເປີດໃຊ້ໃຫ້ເປັນປົກກະຕິ.

ເຖິງແມ່ນວ່າ ຈະມີກອງປະຊຸມປຶກສາຫາລືກັນກ່ຽວກັບບັນຫາດັ່ງກ່າວກໍຕາມ, ມາຮອດປັດຈຸບັນ ກໍເຫັນວ່າມີຫຼາຍໜ້າວຽກທີ່ຍັງບໍ່ຕ່າງຫຍັງກັບເຕົ່າທີ່ ຄ່ອຍເປັນຄ່ອຍໄປ ແລະ ບໍ່ມີຄວາມຄືບໜ້າທີ່ເປັນຜົນງານປະຈັກຕາ ພໍໃຫ້ປະຊາຊົນຊົມເຊີຍ ແລະ ເປັນທີ່ເພິ່ງພໍໃຈໃນດ້ານຄວາມປອດໄພ ໃຫ້ປະຊາຊົນທີ່ໃຊ້ລົດ-ໃຊ້ຖະໜົນ ທຽວໄປ-ມາຕາມເສັ້ນທາງໃນຍາມຄໍ່າຄືນແຕ່ຢ່າງໃດ.

ຢ່າງໃດກໍຕາມ, ບັນຫາລະບົບໄຟເຍືອງທາງບໍ່ຮຸ່ງຢູ່ຫຼາຍເສັ້ນທາງ ແລະ ສ້າງຄວາມຫຍຸ້ງຍາກໃຫ້ແກ່ຜູ້ໃຊ້ລົດ-ໃຊ້ຖະໜົນ ເຊິ່ງເປັນບັນຫາທີ່ແກ່ຍາວມາຫຼາຍປີ, ຖ້າເບິ່ງຕາມຄວາມເປັນຈິງແລ້ວ ບັນຫານີ້ເຊື່ອວ່າພາກສ່ວນກ່ຽວຂ້ອງກໍຮັບຮູ້ ແລະ ເຫັນໄດ້ເຖິງບັນຫາ. ສະນັ້ນ, ພາກສ່ວນກ່ຽວຂ້ອງ ຄວນເລັ່ງມືໃນການຈັດຕັ້ງປະຕິບັດປັບປຸງສ້ອມແປງລະບົບໄຟເຍືອງທາງ ທີ່ເຫັນວ່າຍັງບໍ່ສາມາດເປີດນໍາໃຊ້ໄດ້ໃນເສັ້ນທາງຕ່າງໆ ພາຍໃນນະຄອນຫຼວງ ໃຫ້ກັບຄືນມາຢູ່ໃນສະພາບປົກກະຕິ ເພື່ອຮັບປະກັນໃຫ້ແກ່ການສັນຈອນໄປ-ມາຂອງປະຊາຊົນມີຄວາມປອດໄພ, ປັດສະຈາກການເກີດອຸບັດຕິເຫດໃນຍາມຄໍ່າຄືນ ແລະ ປັດສະຈາກບັນຫາປຸ້ນຈີ້, ຊິງຊັບຕາມເສັ້ນທາງທີ່ມືດ.