ໃນພິທີປິດກອງປະຊຸມສະໄໝສາ ມັນເທື່ອທີ 3 ຂອງສະພາປະຊາຊົນ ນະຄອນຫຼວງວຽງຈັນ ( ນວ ) ຊຸດທີ II ທີ່ຈັດຂຶ້ນວັນທີ 26 ກໍລະກົດ 2022, ພາຍຫຼັງດໍາເນີນມາເປັນເວລາ 4 ວັນ, ໂດຍມີທ່ານ ປອ ອາດສະພັງທອງ ສີພັນດອນ ເຈົ້າຄອງນະຄອນຫຼວງວຽງຈັນ ພ້ອມດ້ວຍພາກສ່ວນກ່ຽວຂ້ອງເຂົ້າຮ່ວມ; ບັນດາທ່ານສະມາຊິກສະພາແຫ່ງຊາດ ປະຈຳເຂດ ເລືອກຕັ້ງທີ I ແລະ ສະມາຊິກສະພາປະຊາຊົນ ນວ ໄດ້ມີການພິຈາລະນາ ແລະ ຮັບຮອງເອົາການສະເໜີແຕ່ງຕັ້ງຫົວໜ້າພະແນກການຕ່າງປະເທດນະຄອນຫຼວງວຽງຈັນ ແລະ ຫົວໜ້າຫ້ອງການຄຸ້ມຄອງ ແລະ ບໍລິການຕົວ ເມືອງວຽງຈັນ (ຄົນໃໝ່).

ໃນພິທີ, ທ່ານ ອານຸພາບ ຕຸນາລົມ ປະທານສະພາປະຊາຊົນນະຄອນຫຼວງວຽງຈັນ ຊຸດທີ II ໄດ້ຂຶ້ນກ່າວປິດກອງປະຊຸມ ໃຫ້ຮູ້ວ່າ: ບັນດາທ່ານສະມາຊິກສະພາແຫ່ງຊາດ ແລະ ສະມາຊິກສະພາປະຊາຊົນນະຄອນຫຼວງວຽງຈັນ ໃນຖານະເປັນຕົວແທນຂອງປະຊາຊົນຊາວນະຄອນຫຼວງ ໄດ້ມີການພິຈາລະນາ ແລະ ຮັບຮອງເອົາຫຼາຍບັນຫາສໍາຄັນຕ່າງໆນະຄອນຫຼວງວຽງຈັນ ໂດຍສະເພາະແມ່ນ ການຮັບຮອງເອົາການສະເໜີແຕ່ງຕັ້ງ ທ່ານ ວົງໄຊ ພົມມີໄຊ ຮອງຫົວໜ້າພະແນກການຕ່າງປະເທດນະຄອນຫຼວງວຽງຈັນ ເປັນຫົວໜ້າພະແນກການຕ່າງປະເທດນະຄອນຫຼວງວຽງຈັນ ແທນ ທ່ານ ປອ ໂພຄຳ ໄຊຍະສອນ ຫົວໜ້າຫ້ອງການນະຄອນຫຼວງວຽງຈັນ ທີ່ຄວບຕຳແໜ່ງຫົວໜ້າພະແນກການຕ່າງປະເທດນະຄອນຫຼວງວຽງຈັນ ແລະ ຮັບຮອງເອົາ ທ່ານ ສົມບູນ ອາຄະວົງສາ ຮອງຫົວໜ້າຫ້ອງການຄຸ້ມຄອງ ແລະ ບໍລິການຕົວເມືອງວຽງຈັນ ເປັນຫົວໜ້າຫ້ອງການຄຸ້ມຄອງ ແລະ ບໍລິການຕົວເມືອງວຽງຈັນ ແທນ ທ່ານ ບຸນຈັນ ແກ້ວສີທຳມະ ຫົວໜ້າຫ້ອງການຄຸ້ມຄອງ ແລະ ບໍລິການຕົວເມືອງວຽງຈັນ ທີ່ຈະພັກການ-ຮັບອຸດໜູນບຳນານ ຕາມລະບຽບການ.

ຜົນສໍາເລັດຂອງກອງປະຊຸມສະໄໝສາມັນ ເທື່ອທີ 3 ຂອງສະພາປະຊາຊົນ ນະຄອນຫຼວງວຽງຈັນ ຊຸດທີ II ຄັ້ງນີ້, ແມ່ນໝາກຜົນຂອງສະຕິປັນຍາ, ການຍົກສູງຄວາມຮັບຜິດຊອບການເມືອງ, ຄວາມເປັນເຈົ້າການຂອງບັນດາທ່ານສະມາຊິກສະພາແຫ່ງຊາດ ແລະ ສະມາຊິກສະພາປະຊາຊົນ ນະຄອນ ຫຼວງວຽງຈັນ ແລະ ເພື່ອສືບຕໍ່ຜັນຂະຫຍາຍຜົນສໍາເລັດຂອງກອງ ປະຊຸມຄັ້ງນີ້, ຮຽກຮ້ອງມາຍັງບັນດາທ່ານຄະນະປະຈໍາສະພາປະຊາຊົນ, ອົງການປົກຄອງ, ອົງການແນວລາວສ້າງຊາດ, ອົງການຈັດຕັ້ງມະຫາຊົນ, ອົງການໄອຍະການປະຊາຊົນ, ສານປະຊາຊົນ ສືບຕໍ່ຊີ້ນໍາບັນດາຄະນະກໍາມະການ, ບັນ ດາພະແນກການ, ບັນດາຂະແໜງການທີ່ ຢູ່ໃນຄວາມຮັບຜິດຊອບຂອງຕົນ ຈົ່ງໄດ້ປຸກລະດົມທຸກພາກສ່ວນເສດຖະກິດ ແລະ ປະຊາຊົນຊາວນະຄອນຫຼວງວຽງ ຈັນທຸກຖ້ວນໜ້າ ເອົາໃຈໃສ່ຈັດຕັ້ງຜັນຂະຫຍາຍມະຕິກອງປະຊຸມໃນຄັ້ງນີ້ໃຫ້ໄດ້ຮັບຜົນສໍາເລັດຕາມຄາດໝາຍທີ່ວາງໄວ້, ເພື່ອສ້າງບັນດາສະພາບແວດລ້ອມອັນດີໃຫ້ແກ່ການຟື້ນຟູສະພາບເສດຖະກິດ, ສ້າງເງື່ອນໄຂໃຫ້ສະພາບເສດຖະກິດໄດ້ກັບຕົວມາເປັນປົກກະຕິໂດຍໄວ, ສ້າງໃຫ້ນະຄອນຫຼວງຂອງພວກ ເຮົາສືບຕໍ່ມີການພັດທະນາໃນບາດກ້າວທີ່ໜັກແໜ້ນກວ່າເກົ່າ.