ກອງປະຊຸມພົບປະລະຫວ່າງ ກະຊວງເຕັກໂນໂລຊີ ແລະ ການສື່ສານແຫ່ງ ສປປ ລາວ ແລະ ສະພາບັນດິດວິທະຍາສາດ ແລະ ເຕັກໂນໂລຊີ ແຫ່ງ ສາທາ ລະນະລັດ ສັງຄົມນິຍົມຫວຽດນາມ (ສສ ຫວຽດນາມ) ໄດ້ຈັດຂຶ້ນໃນວັນທີ 27 ກໍລະກົດ 2022, ຝ່າຍລາວ ນຳໂດຍ ທ່ານ ບໍ່ວຽງຄໍາ ວົງດາລາ ກຳ ມະການສູນກາງພັກປນິດຫວຽດນາມ ປະທານສະພາ ບັນດິດວິທະຍາສາດ ແລະ ເຕັກໂນໂລຊີ ແຫ່ງ ສສ ຫວຽດນາມ ພ້ອມດ້ວຍຄະນະ ໃນໂອກາດທີ່ ເດີນທາງຢ້ຽມຢາມ ແລະ ເຮັດວຽກຢູ່ ສປປ ລາວ ຢ່າງເປັນທາງການ ໃນລະຫວ່າງວັນທີ 26-30 ກໍລະກົດ 2022.

ການຢ້ຽມຢາມ ສປປ ລາວ ຄັ້ງນີ້, ເປັນກິດຈະກໍາໜຶ່ງ ເພື່ອສະເຫຼີມສະຫຼອງປີສາມັກຄີມິດຕະພາບ ລາວ-ຫວຽດນາມ, ຫວຽດນາມ-ລາວ 2022 ກໍຄື ວັນສ້າງຕັ້ງສາຍພົວພັນທາງການທູດຄົບ ຮອບ 60 ປີ ແລະ ວັນເຊັນສົນທິສັນຍາມິດຕະພາບ ແລະ ການຮ່ວມມື ຄົບຮອບ 45 ປີ.

ພາຍຫຼັງສໍາເລັດກອງປະຊຸມ, ທັງສອງຝ່າຍໄດ້ຮ່ວມກັນລົງນາມເຊັນສັນຍາຮ່ວມມື ວ່າດ້ວຍເຕັກໂນໂລຊີ ແລະ ນະວັດຕະກໍາ ເພື່ອຜັນຂະຫຍາຍການຮ່ວມມື, ແລກປ່ຽນປະສົບການ ແລະ ການຊ່ວຍເຫຼືອເຊິ່ງກັນແລະກັນ ບົນຈິດໃຈຄວາມສາມັກຄີພິເສດ, ການຮ່ວມມືຮອບດ້ານ, ມິດຕະພາບ, ມິດສະ ຫາຍອ້າຍ-ນ້ອງເຂົ້າໃຈເຊິ່ງກັນແລະກັນ ແລະ ຕ່າງຝ່າຍຕ່າງມີຜົນປະໂຫຍດ.

ໃນນັ້ນ, ສອງຝ່າຍຕົກລົງເປັນເອກະພາບໃນການຮ່ວມມືຫຼາຍກິດຈະກໍາ ຄື: ເຫັນດີຕົກລົງແລກປ່ຽນຄະນະຜູ້ແທນຂັ້ນສູງ ແລະ ຂັ້ນກົມຢ່າງໜ້ອຍປີລະຄັ້ງ ໂດຍຜັດປ່ຽນກັນເປັນເຈົ້າພາບ; ສະພາສະຍາສາດ ແລະ ເຕັກໂນໂລຊີ ສສ ຫວຽດນາມ ຍິນດີ ໃຫ້ການຊ່ວຍເຫຼືອກະຊວງເຕັກໂນໂລຊີ ແລະ ການສື່ສານໃນການພັດທະນາຊັບພະຍາກອນມະນຸດ ພາຍໃຕ້ບັນດາຮູບແບບການຝຶກອົບຮົມ (ໄລຍະສັ້ນ ແລະ ໄລຍະຍາວ), ຈັດກອງປະຊຸມ, ການສໍາມະນາ ແລະ ກອງປະຊຸມວິຊາການ; ຮ່ວມມືສ້າງ ແລະ ຈັດຕັ້ງປະຕິບັດບັນດາໂຄງການຄົ້ນຄວ້າກ່ຽວກັບເຕັກໂນໂລຊີອັດສະລິຍະເຊັ່ນ: ເຕັກໂນໂລຊີກຸ່ມຂໍ້ມູນຜູກພັນ (Blockchain), ກຸ່ມຂໍ້ມູນຂະໜາດໃຫຍ່ (Big Data), ການປະມວນຜົນຜ່ານລະບົບຄຣາວ (Cloud Computing), ປັນຍາປະດິດ (AI) ແລະ ອິນເຕີເນັດສັບພະສິ່ງ (IoT); ແລກປ່ຽນຂໍ້ມູນ, ສິ່ງພິມ ແລະ ບັນດາເອກະສານຜົນການຄົ້ນຄວ້າເຕັກໂນໂລຊີ ແລະ ນະວັດຕະກໍາ; ແລກ ປ່ຽນຊ່ຽວຊານ ແລະ ນັກຄົ້ນຄວ້າ; ຮ່ວມກັນສ້າງບົດສະເໜີໂຄງການສະເໜີເຖິງລັດຖະບານສອງປະເທດ ກ່ຽວກັບການຮ່ວມມືກ່ໍສ້າງສູນລະດັບຊາດ ເພື່ອເກັບກຳບໍລິຫານຂໍ້ມູນ ແລະ ປະມວນຜົນຜ່ານລະບົບ ຄຣາວ (Cloud computing), ສູນເກັບຮັກສາຂໍ້ມູນ ແລະ ແຈ້ງ ເຕືອນແຜ່ນດິນໄຫວຂອງ ສປປ ລາວ; ຮ່ວມກັນສ້າງບົດສະເໜີ ໂຄງການກ່ຽວກັບການຮ່ວມມືກໍ່ສ້າງສູນຮຽນຮູ້ລະດັບຊາດດ້ານເຕັກໂນໂລຊີ ແລະ ນະວັດຕະກໍາ, ສູນບົ່ມເພາະເຕັກໂນໂລຊີ ແລະ ນະວັດຕະກໍາ; ຮ່ວມມືສ້າງສູນຝຶກອົບຮົມ ແລະ ຖ່າຍທອດເຕັກໂນໂລຊີ ລາວ-ຫວຽດນາມ (Laos-Vietnam Training and Technology Transfer Center); ຮ່ວມມືຈັດເວທີສົ່ງເສີມການຖ່າຍທອດເຕັກໂນໂລຊີລາວ-ຫວຽດນາມ (Laos-Vietnam Tech Connect Forum) ທຸກໆປີ ແລະ ບັນດາຂົງເຂດຮ່ວມມືອື່ນໆທີ່ສອງຝ່າຍມີຄວາມສົນໃຈ.