ໃນວັນທີ 27 ກໍລະກົດ ຜ່ານມາ, ຫ້ອງການສູນກາງຊາວໜຸ່ມປະຊາຊົນ ປະຕິວັດລາວ ໄດ້ຈັດພິທີເຊັນສັນຍາຈັດງານແຂ່ງຂັນ ເວົ້າເພື່ອຊາດ ຄັ້ງທີ II ພາຍໃຕ້ຫົວຂໍ້: ພັດທະນາຄົນ-ພັດທະນາຊາດ ປະຈໍາປີ 2022, ໂດຍການເຂົ້າຮ່ວມຂອງ ທ່ານ ທອງຈັນ ພູມິພັນ ຮອງເລຂາຄະນະບໍລິຫານງານສູນກາງ ຊາວໜຸ່ມປະຊາຊົນ ປະຕິວັດລາວ, ມີບັນດາແຂກຮັບເຊີນ ແລະ ພາກສ່ວນທີ່ກ່ຽວຂ້ອງ ເຂົ້າຮ່ວມ.

ທ່ານ ທອງຈັນ ພູມິພັນ ກ່າວວ່າ:

ການຈັດງານແຂ່ງຂັນໃນຄັ້ງນີ້ ເປັນການຈັດຮ່ວມກັນລະຫວ່າງ ກົມຂະບວນການ ຊາວໜຸ່ມສູນກາງຊາວໜຸ່ມປະຊາຊົນ ປະຕິວັດລາວ ກັບ ກົມອົງການຈັດຕັ້ງສາກົນ ກະຊວງການຕ່າງປະເທດ, ໂທລະພາບແຫ່ງຊາດລາວ ແລະ ສູນຝຶກທັກສະ, ເຊິ່ງຈະໄດ້ຈັດຂຶ້ນໃນລະຫວ່າງເດືອນກໍລະກົດ-ເດືອນພະຈິກ 2022 ນີ້ ເພື່ອເປັນການສ້າງຂະບວນການຊົມເຊີຍ ວັນສ້າງຕັ້ງຄະນະຊາວໜຸ່ມປະຊາຊົນ ປະຕິວັດລາວ ຄົບຮອບ 67 ປີ, ຂໍ່ານັບຮັບຕ້ອນການສະເຫຼີມສະຫຼອງ ວັນຊາດ ທີ 2 ທັນວາ ຄົບຮອບ 47 ປີ ແລະ ວັນເກີດທ່ານປະທານ ໄກສອນ ພົມວິຫານ ຄົບຮອບ 102 ປີ.

ນອກນັ້ນ, ຍັງເປັນການຈັດຕັ້ງຜັນຂະຫຍາຍ 2 ວາລະແຫ່ງຊາດ ວ່າດ້ວຍ ບັນຫາເສດຖະກິດ-ການເງິນ, ບັນຫາຢາເສບຕິດ ແລະ ເປົ້າໝາຍພັດທະນາແບບຍືນຍົງ 2023 ໃຫ້ມີບັນຍາກາດຟົດຟື້ນ ໃນຂອບເຂດທົ່ວປະເທດ. ສະນັ້ນ, ຈຶ່ງເຊີນຊວນມາຍັງ ຄະນະຊາວໜຸ່ມປະຊາຊົນ ປະຕິວັດລາວ, ກະຊວງ, ອົງການ, ນະຄອນຫຼວງ ແລະ ບັນດາຊາວໜຸ່ມນັກຮຽນ, ນັກສຶກສາ ເພື່ອຊຸກຍູ້ ແລະ ສ້າງເງື່ອນໄຂໃຫ້ຊາວໜຸ່ມໄດ້ເຂົ້າຮ່ວມສະໝັກ.

ສໍາລັບມາດຖານ ແລະ ເງື່ອນໄຂສະໝັກເຂົ້າຮ່ວມ ແມ່ນຕ້ອງເປັນສະມາຊິກຊາວໜຸ່ມ ແລະ ຊາວໜຸ່ມທົ່ວໄປ ອາຍຸ 15-35 ປີ, ຕ້ອງເປັນບຸກຄົນທີ່ມີຄວາມຫ້າວຫັນ ແລະ ມີຄວາມສົນໃຈມັກຮັກໃນການເວົ້າຕໍ່ມວນຊົນ ແລະ ຜູ້ເຂົ້າຮ່ວມແຂ່ງຂັນ ແມ່ນຈະໄດ້ຮັບການຝຶກອົບຮົມສິລະປະການເວົ້າຕໍ່ໜ້າມວນຊົນ, ເຕັກນິກການເລົ່າເລື່ອງສ້າງແຮງບັນດານໃຈ, ການໂຕ້ວາທີ, ການນໍາສະເໜີບົດ ແລະ ການເວົ້າບົດຄວາມໃນດ້ານບວກ ໃຫ້ຫຼາຍຂຶ້ນ; ສ່ວນການຮັບສະໝັກ ແມ່ນສະໝັກຜ່ານທາງອອນລາຍ ໂດຍການລົງຊື່ໃນ Google Form ຜ່ານກອງເລຂາຊາວໜຸ່ມແຕ່ລະແຂວງ ນັບແຕ່ວັນທີ 18 ກໍລະກົດ ຫາ 18 ສິງຫາ 2022 ນີ້.

ການລົງນາມເຊັນສັນຍາຮ່ວມຄັ້ງນີ້ ມີ ທ່ານ ວິລະສອນ ວິສອນນະວົງ ຮັກສາການຫົວໜ້າກົມອົງການຈັດຕັ້ງສາກົນ, ທ່ານ ທອງດີ ພົມມະວົງສາ ຜູ້ອໍານວຍການສູນຝຶກທັກສະ, ທ່ານ ນາງ ມີນາ ສີວິໄລ ຫົວໜ້າກົມຂະບວນການຊາວໜຸ່ມ ແລະ ທ່ານ ປອ ອໍາຄາ ວົງໝື່ນກ້າ ຜູ້ອໍານວຍການໃຫຍ່ໂທລະພາບແຫ່ງຊາດລາວ.