ກອງບັນຊາການ ປກສ ແຂວງຄຳມ່ວນ ສປປ ລາວ ແລະ ກອງບັນຊາການ ປກສ ແຂວງກວາງບິງ ສສ ຫວຽດນາມ ຮ່ວມມືກັນເພີ່ມທະວີວຽກງານໂຄສະນາສຶກສາອົບຮົມ ໃຫ້ປະຊາຊົນຂອງສອງປະເທດ ຕາມຂອບເຂດຊາຍແດນ ເຄົາລົບປະຕິບັດລະບຽບກົດໝາຍ ແລະ ຮີດຄອງປະເພນີໃຫ້ຫຼາຍຂຶ້ນ ເພື່ອຫັນໃສ່ໃນການຕິດຕາມ, ຄຸ້ມຄອງ ແລະ ແກ້ໄຂບັນດາປະກົດການຫຍໍ້ທໍ້ໃຫ້ຫຼຸດລົງ.

ໃນກອງປະຊຸມພົບປະແລກປ່ຽນບົດຮຽນວຽກງານວິຊາສະເພາະ ຂອງກອງບັນຊາການ ປກສ ແຂວງຄໍາມ່ວນ ສປປ ລາວ ແລະ ກອງບັນຊາການ ແຂວງກວາງບິງ ສສ ຫວຽດນາມ ທີ່ຈັດຂຶ້ນໃນທ້າຍອາທິດຜ່ານມານີ້, ຝ່າຍລາວນຳໂດຍ ພັອ ທິບພະຈັນ ໂພໄຊ ຫົວໜ້າກອງບັນຊາການ ປກສ ແຂວງຄຳມ່ວນ, ຝ່າຍຫວຽດນາມນຳໂດຍ ພັອ ຫງວຽນ ຫຶວ ເຫີບ ຫົວໜ້າກອງບັນຊາການ ປກສ ແຂວງກວາງບິງ, ມີຄະນະ ແລະ ພາກສ່ວນກ່ຽວຂ້ອງທັງສອງຝ່າຍເຂົ້າຮ່ວມ.

ກອງປະຊຸມໄດ້ພ້ອມກັນຄວ້າຄວ້າ ແລະ ຕົກລົງເຫັນດີເປັນເອກະພາບກັນ ເພື່ອສືບຕໍ່ຮ່ວມມືກັນເພີ່ມທະວີໂຄສະນາສຶກສາອົບຮົມການເມືອງ-ແນວຄິດ ໃຫ້ປະຊາຊົນຂອງສອງປະເທດທີ່ດໍາລົງຊີວິດຢູ່ລຽບຕາມເຂດຊາຍແດນ ໃຫ້ເຄົາລົບລະບຽບກົດໝາຍ ແລະ ຮີດຄອງປະເພນີຂອງປະເທດຕົນໃຫ້ເຂັ້ມງວດຂຶ້ນ.

ນອກນັ້ນ, ກອງປະຊຸມຍັງໄດ້ພັດປ່ຽນກັນຂຶ້ນລາຍງານສະພາບການຕ່າງໆໃຫ້ກັນຊາບ ໂດຍສະເພາະສະພາບການທາງດ້ານການເມືອງ, ດ້ານເສດຖະກິດ-ສັງຄົມ, ການເຄື່ອນໄຫວຂອງກຸ່ມຄົນບໍ່ດີ ແລະ ບັນຫາປະກົດການຫຍໍ້ທໍ້ຕ່າງໆ ເປັນຕົ້ນແມ່ນ ບັນຫາຢາເສບຕິດ, ຄ້າຂາຍເຖື່ອນ, ການລັກລອບສ້າງຄອບຄົວທີ່ຜິດກົດໝາຍ ແລະ ການລັກລອບເຂົ້າ-ອອກເມືອງ ຂອງປະຊາຊົນສອງແຂວງທີ່ເຄື່ອນໄຫວບໍ່ຖືກຕ້ອງຕາມລະບຽບກົດໝາຍ, ບັນຫາສາສະໜາ ແລະ ບັນດາປະກົດການຫຍໍ້ທໍ້ຕ່າງທີ່ຜິດຕໍ່ລະບຽບກົດໝາຍ ທີ່ມັກເກີດຂຶ້ນຢູ່ບໍລິເວນຊາຍແດນທັງສອງປະເທດ ອັນເປັນສາເຫດທີ່ສົ່ງຜົນກະທົບຕໍ່ສອງຝ່າຍ ໂດຍສະເພາະ ກໍຄື ຕາມຂອບເຂດຊາຍແດນ ແຂວງຄຳມ່ວນ ສປປ ລາວ ແລະ ແຂວງກວາງບິງ ສສ ຫວຽດນາມ.

ຕອນທ້າຍກອງປະຊຸມ, ຄະນະຜູ້ແທນທັງສອງຝ່າຍ ໄດ້ພ້ອມກັນລົງນາມເຊັນບົດບັນທືກຊ່ວຍຈຳ ໃນການຮ່ວມມືຮັກສາຄວາມສະຫງົບ, ລົງນາມໂດຍ ພັອ ທິບພະຈັນ ໂພໄຊ ຫົວໜ້າກອງບັນຊາການ ປກສ ແຂວງຄຳມ່ວນ ສປປ ລາວ ແລະ ພັອ ຫງວຽນ ຫຶວ ເຫີບ ຫົວໜ້າກອງບັນຊາການ ປກສ ແຂວງກວາງບິງ ສສ ຫວຽດນາມ, ມີຄະນະຜູ້ແທນທັງສອງຝ່າຍ ເຂົ້າຮ່ວມເປັນສັກຂີພະຍານ.