ກົມໃຫຍ່ການເມືອງ ກະຊວງ ປກສ ໄດ້ວາງທິດທາງໜ້າທີ່ລວມ 6 ເດືອນທ້າຍປີ 2022 ໃນການສ້າງໃຫ້ນາຍ ແລະ ພົນຕຳຫຼວດ ກົມກອງອ້ອມຂ້າງແຕ່ລະຂົງເຂດວຽກວິຊາສະເພາະ ມີຄວາມຕື່ນຕົວຮັບຜິດຊອບຕໍ່ໜ້າທີ່ການເມືອງຂອງຕົນ ໂດຍຖືເອົາການສຶກສາອົບຮົມການເມືອງ-ແນວຄິດເປັນ ກົກ ແລະ ເຮັດຢ່າງທົ່ວເຖິງ.

ໃນກອງປະຊຸມສະຫຼຸບວຽກງານ ກົມໃຫຍ່ການເມືອງ ປກສ ປະຈຳ 6 ເດືອນຕົ້ນປີ ແລະ ວາງທິດທາງແຜນການ 6 ເດືອນທ້າຍປີ 2022 ຄັ້ງວັນທີ 29 ກໍລະກົດ 2022, ພາຍໃຕ້ການເປັນປະທານຂອງ ພົຕ ວັນທອງ ກອງມະນີ ຮອງລັດຖະມົນຕີ ຫົວໜ້າກົມໃຫຍ່ການເມືອງ ກະຊວງ ປກສ, ມີຄະນະພັກ-ຄະນະບັນຊາກົມໃຫຍ່, ພະນັກງານຫຼັກແຫຼ່ງຂັ້ນນຳພາ-ບັນຊາ ເຂົ້າຮ່ວມ ໃຫ້ຮູ້ວ່າ:

ຄະນະບັນຊາ ກົມໃຫຍ່ການເມືອງ ປກສ ໄດ້ວາງທິດທາງແຜນການ 6 ເດືອນທ້າຍປີນີ້ ໂດຍຈະສຸມໃສ່ເອົາໃຈໃສ່ສຶກສາອົບຮົມການເມືອງ-ແນວຄິດໃຫ້ຖັນແຖວກຳລັງ ປກສ ໂດຍສະເພາະແມ່ນບັນດານາຍ ແລະ ພົນຕຳຫຼວດທົ່ວກົມໃຫຍ່ການເມືອງ ເຂົ້າຮ່ວມເຊື່ອມຊຶມເອກະສານສຳຄັນຕ່າງໆ; ສຳຄັນແມ່ນໃຫ້ມີຄວາມຮູ້ທາງດ້ານທິດສະດີມາກ-ເລນິນ, ແນວຄິດ ໄກສອນ ພົມວິຫານ, ແນວທາງ, ແຜນນະໂຍບາຍ, ກົດລະບຽບຂອງພັກ, ກົດໝາຍ ແລະ ລະບຽບການຢ່າງທົ່ວເຖິງ ແນໃສ່ສ້າງໃຫ້ນາຍ ແລະ ພົນຕຳຫຼວດທົ່ວກົມໃຫຍ່ການເມືອງ ມີແນວຄິດໜັກແໜ້ນ, ມີຄວາມຕື່ນຕົວຮັບຜິດຊອບຕໍ່ໜ້າທີ່ການເມືອງທີ່ໄດ້ຮັບມອບໝາຍ ໃນແຕ່ລະຂົງເຂດວຽກງານວິຊາສະເພາະ ໃຫ້ມີຜົນສຳເລັດຍິ່ງຂຶ້ນ.

ຄຽງຄູ່ກັບການເພີ່ມທະວີຄວາມສາມັກຄີພາຍໃນ ໃຫ້ແໜ້ນແຟ້ນ, ປັບປຸງແບບແຜນວິທີເຮັດວຽກຂອງພະນັກງານແຕ່ລະຂັ້ນ ບົນພື້ນຖານຫຼັກການລວມສູນປະຊາທິປະໄຕ, ເຮັດວຽກເປັນໝູ່ຄະນະ, ມອບໃຫ້ບຸກຄົນຮັບຜິດຊອບ ຕິດພັນກັບ ການສືບຕໍ່ປັບປຸງກົງຈັກການຈັດຕັ້ງ ໃຫ້ສອດຄ່ອງຕາມທິດຊີ້ນຳຂອງຂັ້ນເທິງ ພ້ອມທັງສູ້ຊົນແກ້ໄຂບັນດາປະກົດການຫຍໍ້ທໍ້ຕ່າງໆໃຫ້ຫຼຸດລົງ.

ໃນກອງປະຊຸມ, ພັອ ພອນເພັງ ຫຼ້າບັນດິດ ຫົວໜ້າຫ້ອງການກົມໃຫຍ່ການເມືອງ ປກສ ໄດ້ຍົກໃຫ້ເຫັນຜົນງານການປະຕິບັດວຽກງານ 6 ເດືອນຕົ້ນປີ ຜ່ານມາ ວ່າ: ມີຫຼາຍວຽກງານທີ່ກົມກອງອ້ອມຂ້າງ ກົມໃຫຍ່ການເມືອງ ສ້າງໄດ້ມີຜົນສຳເລັດ ໂດຍສະເພາະແມ່ນການສຶກສາອົບຮົມການເມືອງ-ນຳພາແນວຄິດ ເຂົ້າໃນການກໍ່ສ້າງ ແລະ ປັບປຸງກຳລັງ ປກສ ໃຫ້ມີຄວາມປອດໃສ, ໜັກແໜ້ນທາງດ້ານການເມືອງ-ແນວຄິດ, ເຂັ້ມແຂງທາງດ້ານການຈັດຕັ້ງ, ມີລະບຽບຢ່າງເຂັ້ມງວດ, ມີຄວາມຊໍານິຊໍານານທາງດ້ານວິຊາສະເພາະ, ມີແບບແຜນນຳພາ-ບັນຊາ, ເຄື່ອນໄຫວວຽກງານມີວິທະຍາສາດ ແລະ ຫັນກຳລັງເຂົ້າສູ່ຄວາມທັນສະໄໝຢ່າງແຂງແຮງ.