ວັນທີ 31 ກໍລະກົດ 2022, ເກີດອຸບັດຕິເຫດລົດເມນັກທ່ອງທ່ຽວ ຕຳກັບ ລົດພວງ ຢ່າງຮຸນແຮງ ຢູ່ຖະໜົນເລກທີ 9 ເຂດບ້ານຫຼຽນໄຊ ເມືອງອາດສະພັງທອງ ແຂວງສະຫວັນນະເຂດ ເຮັດໃຫ້ມີຜູ້ເສຍຊີວິດ 6 ຄົນ ແລະ ບາດເຈັບ 18 ຄົນ.

ເຈົ້າໜ້າທີ່ຕໍາຫຼວດຈະລາຈອນ ແຂວງສະຫວັນນເຂດ ລາຍງານໃຫ້ຮູ້ວ່າ:

ກ່ອນເກີດເຫດ ລົດບັນທຸກຫົວລາກ 24 ລໍ້ ຍີ່ຫໍ້ໂຣໂວ ສີສົ້ມ, ໝາຍເລກທະບຽນ ກພ/ບຂ 9484 ເລກໝ໋ອກ ບໍ່ຕິດແຜ່ນປ້າຍ ຂັບຂີ່ໂດຍ ທ້າວ ແອັງ ອາຍຸ 52 ປີ ອາຊີບຂັບລົດ ບ້ານຢູ່ປັດຈຸບັນຍັງບໍ່ຮູ້ ໄດ້ຂັບຂີ່ລົດແລ່ນໄປຕາມຖະໜົນເລກທີ 9 ດ້ວຍຄວາມໄວ, ມຸ່ງໜ້າແຕ່ບ້ານດົງເຫັນ ເມືອງອາດສະພັງທອງ ໄປເມືອງພະລານໄຊ; ພໍຮອດເຂດບ້ານຫຼຽນໄຊ ໄດ້ມີລົດເມຍີ່ຫໍ້ຮຸນໄດ ລຸ້ນ 45 ບ່ອນນັ່ງ ສີແດງ ໝາຍທະບຽນ ສຂ.ບກ 1499 (ປ້າຍທຸລະກິດ 1%), ຂັບຂີ່ໂດຍ ທ້າວ ບຸນເກີດ ອາຍຸ 30 ປີ ອາຊີບຂັບລົດ ຢູ່ບ້ານຫົວເມືອງເໜືອ ນະຄອນໄກສອນພົມວິຫານ ແຂວງສະຫວັນນະເຂດ ຂັບຂີ່ສວນທາງມາ, ມຸ້ງໜ້າແຕ່ບ້ານພະລານໃຕ້ ໄປຫາບ້ານດົງເຫັນ ໄດ້ຕຳກັນຢ່າງຮຸນແຮງ, ເຊິ່ງສົ່ງຜົນເຮັດໃຫ້ມີຄົນເສຍຊີວິດ 6 ຄົນ ຍິງ 4 ຄົນ ແລະ ບາດເຈັບທັງໝົດ 18 ຄົນ; ໃນນີ້, ບາດເຈັບເລັກໜ້ອຍ 9 ຄົນ ຍິງ 5 ຄົນ, ສົມຄວນ 5 ຄົນ ຍິງ 4 ຄົນ ແລະ ສາຫັດ 4 ຄົນ.

+ ສຳລັບຜູ້ເສຍຊີວິດທັງ 6 ຄົນ ຍິງ 4 ຄົນ ປະກອບມີ ຄື:

  1. ທ້າວ ບຸນເກີດ ອາຍຸ 30 ປີ ຜູ້ຂັບຂີ່ລົດເມ ແມ່ນເສຍຊີວິດໃນສະຖານທີ່ເກີດເຫດ
  2. ນາງ ຄອນສະຫວັນ ອາຍຸ 38 ປີ, ພະນັກງານ ບໍລິສັດດາວວຽງ ບ້ານດົງນາຄຳ ນະຄອນໄກສອນພົມວິຫານ ແຂວງສະຫວັນນະເຂດ
  3. ນາງ ພະນີດາ ສັນຊາດໄທ (ບໍ່ຮູ້ທີ່ຢູ່ຊັດເຈນ)
  4. ທ້າວ ມົງຄົນ ສັນຊາດໄທ (ບໍ່ຮູ້ທີ່ຢູ່ຊັດເຈນ)
  5. ນາງ ວິໄລພອນ ສັນຊາດໄທ (ບໍ່ຮູ້ທີ່ຢູ່ຊັດເຈນ)
  6. ນາງ ເລທິມີເຮືອງ ສັນຊາດຫວຽດນາມ (ບໍ່ຮູ້ທີ່ຢູ່ຊັດເຈນ)

ປັດຈຸບັນ, ພະແນກຕຳຫຼວດຈະລາຈອນ ແຂວງສະຫວັນນະເຂດ ໄດ້ສົມທົບກັບ ກອງບັນຊາການ ປກສ ເມືອງອາດສະພັງທອງ ສືບຕໍ່ເກັບກຳຂໍ້ມູນ ເພື່ອດໍາເນີນຄະດີຕາມຂັ້ນຕອນຂອງກົດໝາຍ.