ໃນວັນທີ 27 ກໍລະກົດ 2022, ກອງບັນຊາການ ປກສ ນະຄອນຫຼວງວຽງຈັນ (ປກສ ນວ) ໄດ້ຈັດກອງປະຊຸມສະຫຼຸບຊ່ອງແສງ, ແສງຄົ້ນຄວ້າປຶກສາຫາລືວຽກງານກໍ່ສ້າງຮາກຖານ ເພື່ອຍົກສູງຄວາມຮັບຜິດຊອບວຽກງານກໍ່ສ້າງຮາກຖານ ຢູ່ນະຄອນຫຼວງວຽງຈັນ, ເປັນປະທານໂດຍ ພົທ ກົງທອງ ພົງວິຈິດ ຮອງລັດຖະມົນຕີ ກະຊວງປ້ອງກັນຄວາມສະຫງົບ, ຫົວໜ້າຄະນະຊີ້ນຳວຽກງານກໍ່ສ້າງຮາກຖານ ນະຄອນຫຼວງວຽງຈັນ, ມີຄະນະຊີ້ນຳວຽກງານກໍ່ສ້າງຮາກຖານ, ກົມວິຊາສະເພາະອ້ອມຂ້າງ ກະຊວງ ປກສ, ກອງເສນາກໍ່ສ້າງຮາກຖານ ແລະ ມີບັນດາຫ້ອງ, ປກສ ເມືອງ 9 ເມືອງ, ປກສ ກຸ່ມ 59  ກຸ່ມ ເຂົ້າຮ່ວມຜ່ານລະບົບກອງປະຊຸມທາງໄກ.

ພັທ ສົມເພັດ ທຳມະທອງ ຮອງຫົວໜ້າຫ້ອງການ ກອງບັນຊາການ ປກສ ນະຄອນຫຼວງວຽງຈັນ ໄດ້ຜ່ານບົດສະຫຼຸບການຈັດຕັ້ງປະຕິບັດວຽກງານກໍ່ສ້າງຮາກຖານ ໃນ 1 ອາທິດຜ່ານມາ ວ່າ:

ໄດ້ເອົາໃຈໃສ່ຈັດຕັ້ງປະຕິບັດຄຳສັ່ງເລກທີ 1470/ປກສ ວ່າດ້ວຍ ການເພີ່ມທະວີສະກັດກັ້ນ-ແກ້ໄຂສະພາບປະກົດການຫຍໍ້ທໍ້ໃນສັງຄົມ ແລະ ຂໍ້ຕົກລົງເລກທີ 1184/ປກສ ວ່າດ້ວຍ ການຈັດສັນຄວາມເປັນລະບຽບຮຽບຮ້ອຍໃນຕົວເມືອງ ແລະ ຊານເມືອງ ຢູ່ນະຄອນຫຼວງວຽງຈັນ ແລະ ຈັດຕັ້ງປະຕິບັດແຜນງານ 7 ຫຼຸດ ຂອງອົງການປົກຄອງນະຄອນຫຼວງວຽງຈັນ ວາງອອກ ໂດຍຕິດພັນກັບ ການຈັດຕັ້ງປະຕິບັດວາລະແຫ່ງຊາດ ວ່າດ້ວຍ ການແກ້ໄຂບັນຫາຢາເສບຕິດ; ເຊິ່ງຜ່ານການຈັດຕັ້ງປະຕິບັດ ສາມາດແກ້ໄຂບັນຫາປະກົດການຫຍໍ້ທໍ້ທີ່ເກີດຂຶ້ນ ໄດ້ທັງໝົດ 45 ເລື່ອງ ແລະ ກັກຜູ້ຖືກຫາໄດ້ 70 ຄົນ ຍິງ 2 ຄົນ.

ພ້ອມນີ້, ຍັງໄດ້ສຸມໃສ່ເຮັດວຽກງານກໍ່ສ້າງຮາກຖານການເມືອງ ປະເມີນຄອບຄົວ ແລະ ບ້ານປ້ອງກັນຄວາມສະຫງົບດີ ຢູ່ແຕ່ລະກຸ່ມບ້ານ ພາຍໃນ 9 ເມືອງ.

ຈາກນັ້ນ, ຜູ້ເຂົ້າຮ່ວມກອງປະຊຸມ ຍັງໄດ້ພ້ອມກັນປະກອບຄຳເຫັນບັນດາຄຳຖາມເຈາະຈີ້ມ ໃນການຈັດຕັ້ງປະຕິບັດວຽກງານກໍ່ສ້າງຮາກຖານຖານ, ວຽກງານຄຸ້ມຄອງສຳມະໂນຄົວ, ວຽກງານຄຸ້ມຄອງຄົນຕ່າງປະເທດ ແລະ ການແກ້ໄຂບັນຫາປະກົດການຫຍໍ້ທໍ້ຢູ່ບັນດາເມືອງ ເພື່ອແລກປ່ຽນຄຳຄິດຄຳເຫັນ ແລະ ມີທິດປັບປຸງແກ້ໄຂໃນຕໍ່ໜ້າ.

ໃນກອງປະຊຸມ, ພົທ ກົງທອງ ພົງວິຈິດ ໄດ້ເນັ້ນບັນດາພະນັກງານກໍ່ສ້າງຮາກຖານ ໃຫ້ເອົາໃຈໃສ່ຍົກສູງຄວາມຮັບຜິດຊອບຊີ້ນຳ-ນຳພາ ແລະ ໃຫ້ມີປະສິດທິຜົນສູງຂຶ້ນກວ່າເກົ່າ, ເປັນເຈົ້າການໃນການເຄື່ອນໄຫວຕາມພາລະບົດບາດ, ເຮັດວຽກງານປະສານສົມທົບກັບບັນດາຂະແໜງການກ່ຽວຂ້ອງ, ອົງການປົກຄອງບ້ານ, ສຸມໃສ່ເຮັດວຽກງານຮາກຖານໃນການສ້າງຄອບຄົວ ແລະ ບ້ານປ້ອງກັນຄວາມສະຫງົບດີ, ກວດກາຄຸ້ມຄອງການເໜັງຕີງຂອງພົນລະເມືອງ, ຂຶ້ນທະບຽນສຳມະໂນຄົວ ແລະ ອອກບັດປະຈຳຕົວໃຫ້ພົນລະເມືອງລາວຢ່າງຖືກຕ້ອງ, ກວດກາຄຸ້ມຄອງອາຊີບ-ພາຫະນະພິເສດ ແລະ ກວດກາຄຸ້ມຄອງຄົນຕ່າງປະເທດທີ່ມາເຄື່ອນໄຫວບໍ່ຖືກຕ້ອງ. 

ພ້ອມນີ້, ຕ້ອງປັບປຸງກຳລັງ ປກສ ກຸ່ມ ແລະ ປກສ ບ້ານ ເຄື່ອນໄຫວປະຕິບັດໜ້າທີ່ວຽກງານວິຊາສະເພາະ ຕາມສິດ-ພາລະບົດບາດ ແລະ ໜ້າທີ່ຢ່າງເຂັ້ມແຂງ, ໂຄສະນາເຜີຍແຜ່, ເຊື່ອມຊຶມບັນດາມະຕິ, ຄຳສັ່ງຂອງຂັ້ນເທິງວາງອອກ ໃຫ້ປະຊາຊົນຮັບຮູ້-ເຂົ້າໃຈຕໍ່ວຽກງານປ້ອງກັນຊາດ-ປ້ອງກັນຄວາມສະຫງົບ ໂດຍຕິດພັນກັບ ການຈັດຕັ້ງປະຕິບັດວາລະແຫ່ງຊາດ ວ່າດ້ວຍ ການແກ້ໄຂບັນຫາຢາເສບຕິດ ໃຫ້ຫຼຸດໜ້ອຍຖອຍລົງ.