ວັນທີ 2 ສິງຫາ 2022,​ ກອງບັນຊາການ ປກສ ເມືອງດາກຈຶງ ແຂວງເຊກອງ ຈັດພິທີຈູດທຳລາຍອາວຸດລ່າເນື້ອ ແລະ ໝໍ້ຊ໊ອດປາ ໂດຍໃຫ້ກຽດເປັນປະທານຂອງທ່ານ ສາກົນ ພອນປະເສີດ ກຳມະການພັກແຂວງ ຫົວໜ້າພະແນກແຜນການ ແລະ ການລົງທຶນ ຫົວໜ້າຄະນະທີມງານລົງກໍ່ສ້າງຮາກຖານການເມືອງຂັ້ນແຂວງ ປະຈຳເມືອງດາກຈຶງ,​ ມີຄະນະປະຈຳພັກເມືອງ,​ ກຳມະການພັກເມືອງ,​ ປກສ ກຸ່ມບ້ານ,​ ນາຍບ້ານ ແລະ ພະນັກງານພາຍໃນກອງບັນຊາການ ປກສ ເມືອງ ເຂົ້າຮ່ວມ

ພັຕ ວົງໄຊ ໃໝຍະສອນ ຮອງຫົວໜ້າກອງບັນຊາການ ປກສ ເມືອງດາກຈຶງ ລາຍງານໃຫ້ຮູ້ວ່າ : ໃນໄລຍະຜ່ານມາ, ເມືອງດາກຈຶງ ຍັງມີທ່າອ່ຽງເພີ່ມຂຶ້ນຢ່າງຕໍ່ເນື່ອງຫຼາຍບັນຫາ ທີ່ພົ້ນເດັ່ນແມ່ນເຫດການທີ່ເກີດຈາກການນຳໃຊ້ອາວຸດເສິກ,​ ອາວຸດລ່າເນື້ອທຸກປະເພດ,​ ການລ່າສັດປ່າທີ່ຫວງຫ້າມ,​ ຮ້າຍແຮງໄປກ່ວານັ້ນແມ່ນເຫດການທີ່ເກີດຂຶ້ນສ້າງຄວາມເສຍຫາຍໃຫ້ແກ່ຊີວິດ ແລະ ຊັບສິນຂອງປະຊາຊົນບັນດາເຜົ່າ; ເຊິ່ງຜ່ານມາມີຄະດີທີ່ເກີດຂຶ້ນຍ້ອນນຳໃຊ້ອາວຸດເສິກ,​ ອາວຸດລ່າເນື້ອ ທັງໝົດ 8 ຄະດີ,​ ເສຍຊີວິດ 5 ຄົນ ແລະ ບາດເຈັບ 3 ຄົນ;​ ຍ້ອນສາເຫດດັ່ງກ່າວນັ້ນ, ເຈົ້າໜ້າທີ່ ທີ່ກ່ຽວຂ້ອງຈຶ່ງໄດ້ສົມທົມກັບອຳນາດການປົກຄອງທ້ອງຖິ່ນລົງຕິດຕາມ, ແລະ ກວດກາ, ເຊິ່ງສາມາດຢຶດອາວຸດ ແລະ ເຄື່ອງຕ່າງໆໄດ້ຫຼາຍກວ່າ 768 ອັນ ໂດຍປະກອບມີ: ປືນແກັບ 470 ກະບອກ,​ ເລົາປືນແກັບ 268 ເລົາ ແລະ ໝໍ້ຊ໊ອດປາ 30 ເຄື່ອງ.

​ນອກນີ້, ທ່ານຍັງໄດ້ກ່າວຕື່ມວ່າ: ໃນຕໍ່ໜ້າ: ເຈົ້າໜ້າທີ່ກ່ຽວຂ້ອງ ຍັງຈະສືບຕໍ່ລົງໂຄສະນາເຜີ່ຍແຜ່ຜົນກະທົບ,​ ຜົນຮ້າຍທີ່ເກີດຂຶ້ນຕໍ່ກັບຊີວິດ ແລະ ຊັບສິນ,​ ການລ່າສັດປ່າທີ່ຫວງຫ້າມ, ເຊິ່ງລ້ວນແລ້ວແຕ່ມີສາເຫດມາຈາກການຜະລິດ, ຊື້-ຂາຍ,​ ການມີໄວ້ໃນຄອບຄອງ ອາວຸດເສິກ,​ ອາວຸດລ່າເນື້ອ,​ ໝໍ້ຊ໊ອດປາ ແລະ ວັດຖຸທີ່ພາໃຫ້ເກີດລະເບີດທຸກຊະນິດ.​

ທັງນີ້, ກໍເພື່ອແນໃສ່ ເຮັດໃຫ້ວຽກງານປ້ອງກັນຄວາມສະຫງົບ ເປັນໄປຕາມແຜນການທີ່ວາງໄວ້ ແລະ ໃຫ້ຖືກຕ້ອງສອດຄ່ອງກັບລະບຽບຫຼັກການ ເພື່ອຫຼີກລ່ຽງບໍ່ໃຫ້ເກີດອັນຕະລາຍຕໍ່ຊີວິດ ແລະ ຊັບສິນ.​


ຂ່າວ-ພາບ : ພຸດທະໄຊ ຍົວມະນີ

ບັນນາທິການ: ຮອ ຈັນທະພອນ ລາຊາສົມບັດ