ຫ້ອງວ່າການກະຊວງ ປກສ ໄດ້ຈັດພິທີປະກາດໃຫ້ນາຍຕໍາຫຼວດພັກການຮັບອຸດໜູນບໍານານ ໃນວັນທີ 29 ກໍລະກົດ 2022, ເປັນປະທານໂດຍ ພັອ ພອນໄຊ ຍຸດສົມບັດ ຮອງຫົວໜ້າຫ້ອງວ່າການ ກະຊວງ ປກສ, ມີຄະນະພັກ-ຄະນະກົມ ພ້ອມດ້ວຍພາກສ່ວນທີ່ກ່ຽວຂ້ອງ ແລະ ພະນັກງານພັກການຮັບອຸດໜູນບໍານານ ເຂົ້າຮ່ວມ.

ພັທ ສະໝານ ດວງປັນຍາ ຮອງຫົວໜ້າຫ້ອງການເມືອງ ຫ້ອງວ່າການ ກະຊວງ ປກສ ໄດ້ຜ່ານຂໍ້ຕົກລົງຂອງ ລັດຖະມົນຕີ ກະຊວງປ້ອງກັນຄວາມສະຫງົບ ວ່າດ້ວຍ ການອະນຸມັດໃຫ້ນາຍຕໍາຫຼວດພັກການຮັບອຸດໜູນບໍານານ ໂດຍໄດ້ຕົກລົງອະນຸມັດດັ່ງນີ້:

  • ພັທ ນາງ ບຸນມາ ປຸນນຸວົງ ສັງກັດຢູ່ ຫ້ອງວ່າການ ກະຊວງ ປກສ
  • ພັທ ນາງ ສົມບຸນ ພິມພາວົງ ສັງກັດຢູ່ ຫ້ອງວ່າການ ກະຊວງ ປກສ

ໂອກາດນີ້, ພັອ ພອນໄຊ ຍຸດສົມບັດ ໄດ້ສະແດງຄວາມຊົມເຊີຍມາຍັງນາຍຕໍາຫຼວດທີ່ໄດ້ຮັບອຸດໜູນບໍານານໃນຄັ້ງນີ້ ພ້ອມທັງກ່າວວ່າ: ນີ້ແມ່ນສະແດງເຖິງໄຊຊະນະອັນໃຫຍ່ຫຼວງ ທີ່ບັນດາສະຫາຍໄດ້ປະກອບສ່ວນຜົນງານ ໃນການສ້າງສາ ແລະ ພັດທະນາປະເທດຊາດ ໂດຍສະເພາະໄດ້ປະກອບສ່ວນເຂົ້າໃນວຽກງານປ້ອງກັນຄວາມສະຫງົບ ແລະ ກໍແມ່ນຄວາມຕ້ອງການອັນສຸດທ້າຍຂອງນາຍ ແລະ ພົນຕໍາຫຼວດທຸກຄົນ. ຕະຫຼອດໄລຍະຜ່ານມາ, ເຫັນວ່າ ພວກສະຫາຍໄດ້ສຸມສະຕິປັນຍາເຂົ້າໃນວຽກງານຢ່າງຮອບດ້ານ ແລະ ມາເຖິງເວລານີ້ ພວກສະຫາຍໄດ້ເຖິງກະສຽນ.

ແນວຢ່າງໃດກໍຕາມ, ຕາງໜ້າໃຫ້ຄະນະພັກ-ຄະນະນໍາ ຫ້ອງວ່າການ ກະຊວງ ປກສ ຮຽກຮ້ອງມາຍັງບັນດາສະຫາຍ ອອກໄປແລ້ວຂໍໃຫ້ມີສະຕິຕໍ່ສະພາບການຕ່າງໆ, ຖ້າກໍາໄດ້ຫາງສຽງວິພາກວິຈານ ຫຼື ບັນຫາອັນໃດທີ່ສະທ້ອນສູ່ຫ້ອງວ່າການ ກໍຄື ກໍາລັງປ້ອງກັນຄວາມສະຫງົບ ຂໍໃຫ້ນໍາໄປປຶກສາຫາລືນໍາກົມກອງທີ່ກ່ຽວຂ້ອງຄົ້ນຄວ້າ ເພື່ອນໍາໄປເປັນບົດຮຽນໃນການຈັດຕັ້ງປະຕິບັດ ແລະ ເປັນການພັດທະນາ ຫ້ອງວ່າການ ໃຫ້ມີຄວາມເຕີບໃຫຍ່ເຂັ້ມແຂງຂຶ້ນເລື້ອຍໆ.