ກອງບັນຊາການ ປກສ ແຂວງ ສະຫວັນນະເຂດ ຈັດພິທີປະກາດເລື່ອນຊັ້ນໃຫ້ນາຍ ແລະ ພົນຕຳຫຼວດ ຜູ້ທີ່ມີຜົນດີເດັ່ນໃນການປະຕິບັດໜ້າທີ່ວຽກ ງານ ແລະ ຄົບມາດຖານເງື່ອນໄຂຂອງການເລື່ອນຊັ້ນທີ່ກຳນົດໄວ້ໃນກົດໝາຍຂອງ ກຳລັງ ປກສ ໃນວັນທີ 26 ກໍລະກົດ ຜ່ານມານີ້, ເປັນປະທານ ແລະ ປະດັບຊັ້ນໂດຍ ພັອ ບຸນເລີດ ຄະທຸມພົມ ຮອງຫົວໜ້າກອງບັນຊາການ ປກສ ແຂວງ, ມີຄະນະພັກ-ຄະນະບັນຊາ, ພ້ອມດ້ວຍຄະນະຫ້ອງ, ໂຮງ ຮຽນ, ກອງພັນປ້ອງກັນເຄື່ອນທີ່, ປກສ ເມືອງ, ນະຄອນ ແລະ ພະນັກງານ-ນັກຮົບ ຜູ້ທີ່ໄດ້ຮັບການເລື່ອນຊັ້ນ ເຂົ້າຮ່ວມ.

ການເລື່ອນຊັ້ນຄັ້ງນີ້, ແມ່ນປະຕິບັດຕາມຂໍ້ຕົກລົງຂອງລັດຖະມົນຕີກະຊວງ ປກສ ແລະ ຂໍ້ຕົກລົງຂອງກົມໃຫ່ຍການເມືອງ ປກສ, ວ່າດ້ວຍການດ້ວຍການເລື່ອນຊັ້ນໃຫ້ນາຍ ແລະ ພົນຕຳຫຼວດກອງບັນຊາການ ປກສ ແຂວງສະຫວັນນະເຂດ. ໃນນີ້, ມີຜູ້ໄດ້ຮັບການເລື່ອນຊັ້ນທັງໝົດ 213 ສະຫາຍ ຍິງ 27 ສະຫາຍ ຄື: ເລື່ອນຊັ້ນພັນຕີ ຂຶ້ນ ພັນໂທ 24 ສະຫາຍ ຍິງ 1 ສະຫາຍ, ຮ້ອຍເອກ ຂຶ້ນ ພັນຕີ 41 ສະຫາຍ ຍິງ 3 ສະຫາຍ, ຮ້ອຍໂທ ຂຶ້ນ ຮ້ອຍເອກ 102 ສະຫາຍ ຍິງ 17 ສະຫາຍ, ຮ້ອຍຕີ ຂຶ້ນ ຮ້ອຍໂທ 23 ສະຫາຍ ຍິງ 5 ສະຫາຍ, ວາທີ ຂຶ້ນ ຮ້ອຍຕີ 20 ສະຫາຍ ຍິງ 1 ສະຫາຍ, ສິບໂທ ຂຶ້ນ ສິບເອກ 2 ສະຫາຍ ແລະ ດັດແປງຊັ້ນສິບໂທ ຂຶ້ນ ເປັນຊັ້ນ ວາທີ 1 ສະຫາຍ.

ໂອກາດດຽວກັນນີ້, ພັອ ບຸນເລີດ ຄະທຸມພົມ ໄດ້ສະແດງຄວາມຊົມເຊີຍຕໍ່ຜູ້ທີ່ໄດ້ຮັບການເລື່ອນຊັ້ນໃນຄັ້ງນີ້, ພ້ອມທັງຊີ້ນໍາໃຫ້ແຕ່ລະສະຫາຍ ຈົ່ງພ້ອມກັນເອົາໃຈໃສ່ເພີ່ມທະວີຄວາມຮັບຜິດຊອບ, ເປັນເຈົ້າການປະຕິບັດວຽກງານທີ່ການຈັດຕັ້ງມອບໝາຍໃຫ້, ສະຕິຕໍ່ການຈັດຕັ້ງປະຕິບັດລະບຽບວິ ໄນ, ຂໍ້ກຳນົດກົດໝາຍຂອງລັດ ວາງອອກຢ່າງເຂັ້ມງວດ ພ້ອມທັງຮັກສາຄວາມສາມັກຄີພາຍໃນໃຫ້ເປັນເອກະພາບກັນ ເພື່ອຮັບປະກັນເຮັດໜ້າທີ່ວຽກງານການເມືອງທີ່ພັກ-ລັດ ມອບໝາຍໃຫ້ສຳເລັດ.