ໃນໂອກາດເຂົ້າຮ່ວມກອງປະຊຸມສະຫຼຸບວຽກງານຈັດຕັ້ງຜັນ ຂະຫຍາຍ 2 ວາລະແຫ່ງຊາດ ວ່າດ້ວຍການແກ້ໄຂຄວາມຫຍຸ້ງຍາກທາງດ້ານເສດຖະກິດການເງິນ ແລະ ວ່າດ້ວຍການແກ້ໄຂບັນຫາຢາເສບຕິດໃນໄລຍະ 6 ເດືອນຕົ້ນປີ 2022 ແລະ ວາງທິດທາງແຜນການທ້າຍ ປີ 2022ໃນທົ່ວເມືອງຍົມ ມະລາດ, ໃນວັນທີ 14 ມິຖຸນາ 2022 ຜ່ານມາ, ທ່ານ ປອ ແກ້ວອຸດອນ ບຸດສິງຂອນ ຮອງເຈົ້າແຂວງໆຄຳມ່ວນ ໄດ້ເນັ້ນໃຫ້ຄະນະພັກ-ຄະນະບັນຊາ, ຄະນະຮັບຜິດຊອບ ຕະຫຼອດຮອດພໍ່ແມ່ປະຊາຊົນບັນດາເຜົ່າ ພາຍໃນເມືອງຍົມມະລາດ ສືບຕໍ່ເອົາໃຈໃສ່ຈັດຕັ້ງປະຕິບັດແກ້ໄຂ 2 ວາລະແຫ່ງຊາດ ວ່າດ້ວຍການແກ້ໄຂຄວາມຫຍຸ້ງຍາກທາງດ້ານເສດຖະກິດການເງິນ ແລະ ວ່າດ້ວຍການແກ້ໄຂບັນຫາຢາເສບຕິດຢ່າງເຂັ້ມງວດ ແລະ ຈິງຈັງ, ສືບຕໍ່ໂຄສະ ນາເຜີຍແຜ່ລະບຽບກົດໝາຍ ແລະ ຜົນຮ້າຍຂອງຢາເສບຕິດ, ຕ້ານ ແລະ ປາບປາມຜູ້ທີ່ລັກລອບເຄື່ອນໄຫວຄ້າຂາຍຢາເສບຕິດ, ເພີ່ມທະວີຮ່ວມມືປະ ສານສົບທົບແລກປ່ຽນຂໍ້ມູນຂ່າວສານ ເພື່ອພ້ອມກັນສະກັດກັ້ນແກ້ໄຂບັນຫາຢາເສບຕິດໃຫ້ຫຼຸດໜ້ອຍຖອຍລົງເທື່ອລະກ້າວ.

ໃນກອງປະຊຸມ, ທ່ານ ບຸນທັນ ສຸວັນນະລາດ ເຈົ້າເມືອງຍົມມະລາດ ໄດ້ຜ່ານຮ່າງບົດສະຫຼຸບການຈັດຕັ້ງຜັນຂະຫຍາຍ 2 ວາລະແຫ່ງຊາດ ວ່າດ້ວຍການແກ້ໄຂຄວາມຫຍຸ້ງຍາກທາງດ້ານານເສດຖະກິດການເງິນ ແລະ ວ່າດ້ວຍການແກ້ໄຂບັນຫາຢາເສບຕິດໃນໄລຍະ 6 ເດືອນຕົ້ນປີ 2022 ແລະ ວາງທິດ ທາງແຜນການທ້າຍປີ 2022 ໃນທົ່ວເມືອງຍົມມະລາດ ເພື່ອຕີລາຄາຄືນການຈັດຕັ້ງປະຕິບັດວຽກງານແຕ່ລະໜ້າວຽກ, ເຊິ່ງໃນທົ່ວເມືອງຍົມມະລາດ ໄດ້ຖືເອົາ 2 ວາລະແຫ່ງຊາດ ເປັນບຸລິມະສິດທີ່ສຳຄັນຂອງເມືອງ ເພື່ອເຮັດໃຫ້ເມືອງຍົມມະລາດ ເຂັ້ມແຂງທາງດ້ານເສດຖກິດການເງິນ ແລະ ມີຄວາມ ສະຖຽລະພາບທາງດ້ານການເມືອງສັງຄົມ, ມີຄວາມສະຫງົບປອດໄພ. ດັ່ງນັ້ນ, ເມືອງຈຶ່ງໄດ້ສຸ່ມໃສ່ຈັດຕັ້ງ ປະຕິບັດຕາມບາດກ້າວ, ຂັ້ນຕອນຂອງວາ ລະແຫ່ງຊາດ, ເຊິ່ງສາມາດຍາດໄດ້ຜົນງານດ້ານດີ, ຜົນສໍາເລັດຫຼາຍດ້ານ. ໃນນັ້ນ, ໄດ້ເລັ່ງໃສ່ບັນຫາການແກ້ໄຂບັນຫາຢາເສບຕິດຢ່າງຕັ້ງໜ້າ ໂດຍຖື ເອົາການລົງໂຄສະນາເຜີຍແຜ່ລະບຽບກົດໝາຍ ແລະ ຜົນຮ້ານຂອງຢາເສບຕິດພະນັກງານ, ນັກຮຽນ, ນັກສຶກສາ ຕະຫຼອດຮອດປະຊາຊົນທົ່ວເມືອງ ຍົມມະລາດໄດ້ 46 ບ້ານ, 2 ກົມ ກອງ ແລະ 5 ໂຮງຮຽນສາມັນສຶກ ສາມີຈຳນວນຄົນເຂົ້າຮ່ວມທັງໝົດ 7.938 ຄົນ.

ນອກນັ້ນ, ຍັງໄດ້ຂຶ້ນບັນຊີເປົ້າໝາຍ ແລະ ເປີດບັ້ນສຶກສາອົບຮົມໃຫ້ຜູ້ທີ່ຖືກເຄາະຮ້າຍຈາກຢາເສບຕິດໄດ້ 4 ຄັ້ງ, ມີ 5 ກຸ່ມບ້ານ ມີ 599 ຄົນ ຍິງ 15 ຄົນ, ມ້າງຄະດີຢາເສບຕິດໄດ້32 ເລື່ອງ, ກັກຕົວຜູ້ຖືກຫາໄດ້ 50 ຄົນ ຍິງ 6 ຄົນ, ຢຶດຂອງກາງຢາບ້າໄດ້ 2.258 ເມັດ, ຢາໄອສ໌ 2 ຖົງນ້ອຍ, ໂທລະ ສັບ 4 ເຄື່ອງ ແລະ ເງິນ ຈຳນວນ 2.370.000ກີບ.

ໃນກອງປະຊຸມ, ຜູ້ເຂົ້າຮ່ວມຍັງໄດ້ພ້ອມກັນປະກອບຄຳຄິດຄຳເຫັນ ໂດຍຍົກໃຫ້ເຫັນດ້ານດີຜົນງານ, ດ້ານອ່ອນ, ຂໍ້ຄົງຄ້າງ, ບົດຮຽນທີ່ຖອດຖອນໄດ້ ແລະ ວາງທິດທາງແຜນການທີ່ຕ້ອງໄດ້ນໍາຈັດຕັ້ງປະຕິບັດ. ໃນຕໍ່ໜ້າ, ເມືອງຍົມມະລາດ ຈະໄດ້ສຸມໃສ່ບັນຫາທີ່ສຳຄັນຄືສືບຕໍ່ຫັນເອົາແຜນວຽກທີ່ຍັງບໍ່ທັນຈັດຕັ້ງປະຕິບັດໄປຈັດຕັ້ງປະຕິບັດໃຫ້ສຳເລັດ, ຕິດຕາມເປົ້າໝາຍຖືກກສຶກສາອົບຮົມຮອບທີ່ໜຶ່ງມາກວດຫາສານເສບຕິດຄືນໃໝ່ ເພື່ອຕິດຕາມຕໍ່ໄປໃຫ້ສຳເລັດຕາມລະດັບຄາດໝາຍທີ່ວາງໄວ້.

ເພື່ອຮັບປະກັນໃຫ້ແກ່ການຈັດຕັ້ງປະຕິບັດວາລະແຫ່ງຊາດ ວ່າດ້ວຍການແກ້ໄຂຄວາມຫຍຸ້ງຍາກທາງກ້ານເສດຖະກິດການເງິນ ແລະ ວ່າດ້ວຍການແກ້ໄຂບັນຫາຢາເສບຕິດຂອງເມືອງຍົມມະລາດ ໄດ້ຮັບໝາກຜົນທີ່ດີ, ທ່ານ ບຸນທັນ ສຸວັນນະລາດ ກ່າວຕື່ມອີກ ວ່າ: ຈະສຸມໃສ່ເຮັດວຽກງານການເມືອງແນວຄິດໃຫ້ພະນັກງານມີຄວາມໜັກແໜ້ນ ໂດຍການເຜີຍແຜ່, ເຊື່ອມຊຶມໃຫ້ຄວາມຮູ້ແກ່ພະນັກງານ-ນັກຮົບກ່ຽວກັບການຈັ້ດຕັ້ງວຽກງານວາລະແຫ່ງຊາດ, ເອົາໃຈໃສ່ວຽກງານໂຄສະນາໃຫ້ແກ່ປະຊາຊົນໄດ້ຮັບຮູ້ລະບຽບກົດໝາຍ, ເອົາໃຈໃສ່ບໍາລຸງວຽກງານວິຊາສະເພາະໃຫ້ກໍາລັງປ້ອງກັນ ຄວາມສະຫງົບບ້ານໃຫ້ຮູ້ເຄື່ອນໄຫວວຽກງານວິຊາສະເພາະໃຫ້ຫຼາຍຂຶ້ນກວ່າເກົ່າ ເພື່ອເຮັດໃຫ້ເມືອງຍົມມະລາດ ເຂັ້ມແຂງທາງດ້ານເສດຖກິດການເງິນ ແລະ ມີຄວາມສະຖຽນລະພາບທາງດ້ານການເມືອງສັງຄົມ, ມີຄວາມສະຫງົບປອດໄພ.