ແຂວງເຊກອງ ໄດ້ສຸມໃສ່ການພັດທະນາດ້ານພື້ນຖານໂຄງລ່າງ ໂດຍສະເພາະເສັ້ນທາງຈາກຕົວເມືອງລົງໄປຫາຊົນນະບົດເຂດຫ່າງໄກສອກຫຼີກ ເພື່ອອໍານວຍຄວາມສະດວກໃຫ້ພໍ່-ແມ່ປະຊາຊົນໄດ້ສັນຈອນໄປມາຫາສູ່ກັນ, ຂົນສົ່ງຊື້-ຂາຍ ແລກປ່ຽນສິນຄ້າໄດ້ຢ່າງສະດວກສະບາຍ ແລະ ວ່ອງໄວຂຶ້ນເລື້ອຍໆ ປັດຈຸບັນມີເສັ້ນທາງເຂົ້າເຖິງ ແລ້ວ 195 ບ້ານ.

ທ່ານ ຂັນຕີ ສີລະວົງສາ ຮອງເຈົ້າແຂວງ ເຊກອງ ໃຫ້ຮູ້ວ່າ: ປັດຈຸບັນ, ທົ່ວແຂວງເຊກອງມີ ເສັ້ນທາງທັງໝົດ 290 ເສັ້ນ ລວງຍາວທັງໝົດ 2.065,75 ກິໂລແມັດ; ໃນນັ້ນ, ທາງເບຕົງຍາວ 1,13 ກິໂລແມັດ, ປູອັດສະພານ 8,02 ກິໂລແມັດ, ປູຢາງ 350,72 ກິໂລແມັດ, ປູແຮ່ 1.059,53 ກິໂລແມັດ ແລະ ດິນທໍາມະຊາດ 646,35 ກິໂລ ແມັດ; ມີຂົວ 33 ແຫ່ງ ລວງຍາວທັງໝົດ 1.517,04 ກິໂລແມັດ ໃນນີ້ ຂົວເບຕົງ 18 ແຫ່ງ ຍາວ 1.080 ແມັດ, ຂົວເບເລ 10 ແຫ່ງ ຍາວ 288,04 ແມັດ, ຂົວໄມ້ 1 ແຫ່ງ ຍາວ 24 ແມັດ, ຂົວປະສົມ 1 ແຫ່ງ ຍາວ 25 ແມັດ ແລະ ຂົວອູ່ 3 ແຫ່ງ ຍາວ 100 ແມັດ; ມີບ້ານທີ່ມີເສັ້ນທາງເຂົ້າເຖິງແລ້ວ 195 ບ້ານ ກວມເອົາ 98,9%. ໃນນີ້, ສາມາດທຽວ ໄດ້ສອງລະດູມີ 144 ບ້ານກວມເອົາ 73,09%.

ໃນຕໍ່ໜ້າ, ແຂວງເຊກອງ ຈະໄດ້ສືບຕໍ່ປັບປຸງ, ກໍ່ສ້າງ ແລະ ຂະຫຍາຍຕາໜ່າງຄົມມະນາຄົມຂົນສົ່ງ ໂດຍສະເພາະເສັ້ນທາງໃຫ້ເຂົ້າເຖິງທຸກບ້ານຂອງ ແຂວງ ແລະ ໃຫ້ສາມາດທຽວໄດ້ຕະຫຼອດປີ; ສືບຕໍ່ຕິດຕາມ, ກວດກາການຈັດຕັ້ງປະຕິບັດໂຄງການກໍ່ສ້າງ-ສ້ອມແປງເສັ້ນທາງຕ່າງໆພາຍໃນແຂວງທີ່ໄດ້ຮັບການອະນຸມັດຈາກພັກ-ລັດຖະບານ ກໍຄື ການນໍາແຂວງໄດ້ເຄື່ອນໄຫວດໍາເນີນການກໍ່ສ້າງ ໃຫ້ສໍາເລັດຕາມແຜນການ ເພື່ອແນໃສ່ອໍານວຍ ຄວາມສະດວກໃຫ້ແກ່ການໄປມາຫາສູ່ຂອງປະ ຊາຊົນ; ສືບຕໍ່ເຮັດໃຫ້ການຂົນສົ່ງທາງບົກມີລະບົບການຂົນສົ່ງທີ່ສົ່ງເສີມການຄ້າ, ການຜະລິດ, ການລົງທຶນ, ການທ່ອງທ່ຽວ ແລະອື່ນໆ ພ້ອມທັງຮັບປະກັນໃຫ້ມີຄວາມປອດໄພ, ສະດວກ ແລະ ທັນສະໄໝຂຶ້ນເທື່ອລະກ້າວ.