ຄະນະບໍລິຫານງານຊາວໜຸ່ມ ກົມຕຳຫຼວດຄຸມຂັງ-ດັດສ້າງ ກະຊວງ ປກສ ຈັດກອງປະຊຸມສະຫຼຸບການຈັດຕັ້ງປະຕິບັດຂໍ້ແຂ່ງຂັນ 4 ບຸກ ປະຈຳປີ 2021 ຂຶ້ນໃນວັນທີ 29 ກໍລະກົດ 2022, ເຂົ້າຮ່ວມໂດຍ ພັອ ຄຳພອນ ແສງສາລີຈັນ ຮອງຫົວໜ້າກົມຕຳຫຼວດຄຸມຂັງ-ດັດສ້າງ, ມີຄະນະພະແນກ, ຄ້າຍ, ຊາວໜຸ່ມ-ແມ່ຍິງ ອ້ອມຂ້າງ ກົມຕຳຫຼວດຄຸມຂັງ-ດັດສ້າງ ເຂົ້າຮ່ວມ.

ພັທ ນາງ ສິມມະລີ ພົມອຸໄທ ເລຂາຊາວໜຸ່ມ ກົມຕຳຫຼວດຄຸມຂັງ-ດັດສ້າງ ກ່າວວ່າ:

ການຈັດຕັ້ງປະຕິບັດຂໍ້ແຂ່ງຂັນ 4 ບຸກ ໃນໄລຍະ 1 ປີຜ່ານມາ ຄະນະບໍລິຫານງານຊາວໜຸ່ມ, ຄະນະໜ່ວຍ ແລະ ຕະຫຼອດຮອດສະມາຊິກຊາວໜຸ່ມທຸກສະຫາຍ ມີແນວຄິດການເມືອງໜັກແໜ້ນ, ອຸ່ນອຽນທຸ່ນທ່ຽງໃນການປະຕິບັດໜ້າທີ່ວິຊາສະເພາະ, ເຊື່ອໝັ້ນຕໍ່ການນຳພາຂອງພັກ-ລັດ ແລະ ການຈັດຕັ້ງທຸກຂັ້ນ, ມີຄວາມຮັບຜິດຊອບສູງບຸກບືນຫ້າວຫັນ, ປະຕິບັດໜ້າທີ່ການເມືອງຂອງຕົນດ້ວຍຄວາມຮັບຜິດຊອບສູງ, ເອົາໃຈໃສ່ເຮັດໜ້າທີ່ວຽກງານວິຊາສະເພາະຢ່າງຕັ້ງໜ້າ ໂດຍສະເພາະ ວຽກງານປ້ອງກັນເວນຍາມຄ້າຍຄຸມຂັງ, ຄ້າຍດັດສ້າງ ຕະຫຼອດ 24 ຊົ່ວໂມງ ໃຫ້ມີຄວາມສະຫງົບປອດໄພຮ້ອຍສ່ວນຮ້ອຍ.

ນອກຈາກນີ້, ຍັງໄດ້ເອົາໃຈໃສ່ເຮັດວຽກງານສຶກສາອົບຮົມນັກໂທດ-ດັດສ້າງ ເພື່ອໃຫ້ເຂົາເຈົ້າມີແນວຄິດອຸ່ນອຽນທຸ່ນທ່ຽງໃນການດັດສ້າງຕົນເອງ, ຮູ້ ສຶກກິນແໜງແຄງໃຈຕໍ່ການກະທຳຜິດຂອງຕົນ ແລະ ນຳພານັກໂທດ-ດັດສ້າງອອກແຮງງານທຳການຜະລິດ ເຊັ່ນ: ປູກຝັງ, ລ້ຽງສັດ, ສານຕິບເຂົ້າ, ແກະສະລັກ, ເຮັດເຟີນີເຈີ, ປູກພືດຜັກຊະນິດອື່ນໆ.

ພ້ອມດຽວກັນນີ້, ຄະນະຊາວໜຸ່ມ ກໍຄື ສະມາຊິກຊາວໜຸ່ມ ໄດ້ຕັ້ງໜ້າໃນການຝຶກຝົນຫຼ່ໍຫຼອມຕົນເອງໃນທຸກຂົງເຂດວຽກງານ ໂດຍການຕັ້ງໜ້າຊອກຮູ້ຮໍ່າຮຽນດ້ານຕ່າງໆດ້ວຍຕົນເອງ ແລະ ນຳການຈັດຕັ້ງ ເຊິ່ງມີຫຼາຍສະຫາຍໄດ້ໄປຍົກລະດັບທັງພາຍໃນ ແລະ ຕ່າງປະເທດ ແລະ ມີສະມາຊິກຊາວໜຸ່ມ ເປັນມະຫາຊົນກ້າວໜ້າ ຮຽນສະໜັບສະໜູນ 28 ສະຫາຍ ຍິງ 6 ສະຫາຍ, ຮຽນລະບຽບພັກ 41 ສະຫາຍ ຍິງ 6 ສະຫາຍ, ເຂົ້າພັກສຳຮອງ 64 ສະຫາຍ ຍິງ 27 ສະຫາຍ ແລະ ເຂົ້າພັກສົມບູນ 16 ສະຫາຍ ຍິງ 5 ສະຫາຍ.

ກອງປະຊຸມ ຍັງໄດ້ມອບໃບຢັ້ງຢືນ 4 ບຸກ ໃຫ້ໜ່ວຍຊາວໜຸ່ມຮາກຖານ ທີ່ຂຶ້ນກັບ ຄະນະບໍລິຫານງານຊາວໜຸ່ມ ກົມຕຳຫຼວດຄຸມຂັງ-ດັດສ້າງ ທີ່ມີຜົນສຳເລັດໃນການຈັດຕັ້ງປະຕິບັດຂໍ້ແຂ່ງຂັນ 4 ບຸກ ມີຄື: ໜ່ວຍຊາວໜຸ່ມກົມຕຳຫຼວດຄຸມຂັງ-ດັດສ້າງ, ໜ່ວຍຊາວໜຸ່ມຄ້າຍຕານປ່ຽວ, ໜ່ວຍຊາວໜຸ່ມຄ້າຍໂພນຕ້ອງ, ໜ່ວຍຊາວໜຸ່ມຄ້າຍໂພນເງິນ ແລະ ໜ່ວຍຊາວໜຸ່ມຄ້າຍດັດສ້າງສາຍນໍ້າງື່ມ; ເຊິ່ງມອບໃບຢັ້ງຢືນໂດຍ ພັທ ນາງ ສິມມະລີ ພົມອຸໄທ.