ຂົວຫ້ວຍກົກເດື່ອ (ຫ້ວຍຂົວແປ້ນ) ມີຄວາມຍາວທັງໝົດ 10 ແມັດ, ກວ້າງ 4,50 ແມັດ, ເຊິ່ງເຮັດດ້ວຍໄມ້ທັງໝົດ ກໍເປັນອີກຂົວໜຶ່ງທີ່ນອນຢູ່ໃນເສັ້ນທາງເລກທີ 10 ຂອບເຂດບ້ານແກ້ວວິໄລ ເຂດຈຸດສຸມເມືອງວັງ ເມືອງວິລະບູລີ ແຂວງສະຫວັນນະເຂດ; ຂົວດັ່ງກ່າວແມ່ນກໍາລັງເປ່ເພຢ່າງໜັກ ເນື່ອງຈາກການນໍາໃຊ້ເປັນເວລາດົນນານ ເຮັດໃຫ້ການສັນຈອນໄປມາມີຄວາມຫຍຸ້ງຍາກ ແລະ ມີຄວາມສ່ຽງຕໍ່ການເກີດອຸບັດຕິເຫດໄດ້ໃນຕໍ່ໜ້າ.

ເມື່ອເຫັນໄດ້ຄືແນວນັ້ນ, ທາງອໍານາດການປົກຄອງເມືອງວິລະບູລີ ກໍຄືອໍານາດການປົກຄອງ ແລະ ພໍ່ແມ່ປະຊາຊົນບ້ານແກ້ວວິໄລ ຈຶ່ງໄດ້ສາມັກຄີກັນສ້ອມແປງຂົວຫ້ວຍເດື່ອຄືນໃໝ່ ເພື່ອເປັນການປັບປຸງສ້ອມແປງໃຫ້ດີຂຶ້ນກວ່າເກົ່າ ແລະ ເຮັດໃຫ້ສັນຈອນໄປມາໄດ້ສະດວກ, ເຊິ່ງການຈັດຕັ້ງປະຕິບັດວຽກໃນຄັ້ງນີ້ ໃຊ້ເວລາ 2 ວັນ 29-30 ກໍລະກົດ 2022 ສ້ອມແປງສໍາເລັດ, ມີແຮງງານຈາກບ້ານແກ້ວວິໄລ ເຂົ້າຮ່ວມທັງໝົດມີ 85 ຄົນ ຍິງ 7 ຄົນ ແລະ ພາຍໃຕ້ການຊີ້ນໍາ-ນໍາພາຈາກ ທ່ານ ບຸນເນືອງ ຈັນຫອມ ຮອງເຈົ້າເມືອງວິລະບູລີ ພ້ອມດ້ວຍທ່ານຫົວໜ້າຈຸດສຸມເມືອງວັງ, ທ່ານຫົວໜ້າ ຫ້ອງ ການ ຍທຂ ເມືອງ ແລະ ວິຊາການ.

ໜ້າວຽກທີ່ເຮັດແມ່ນຮື້ໄມ້ຂົວເກົ່າອອກທັງໝົດ ແລ້ວນໍາໃຊ້ໄມ້ຂົວໃໝ່ປ່ຽນແທນ, ສໍາລັບການສ້ອມແປງຂົວໃນຄັ້ງນີ້ ໂດຍໄດ້ຮັບການປະກອບສ່ວນຈາກຫຼາຍພາກສ່ວນເຊັ່ນວ່າ: ຫ້ອງວ່າການເມືອງວິລະບູລີ ປະກອບສ່ວນເງິນສົດ 1 ລ້ານກີບ, ທ່ານ ອິນປັນ ເຈົ້າຂອງຕະຫຼາດຕ໋ອງພາໄຊ ປະກອບສ່ວນ ເງິນສົດ 500.000 ກີບ ແລະ ເຄື່ອງດື່ມເອັມ 150 ຈໍານວນ 2 ແພັກ, ທ່ານ ໄໝພົມ ບ້ານໄຊຍະລາດ ປະກອບສ່ວນພາຫະນະ (ລົດເຄນ) ເພື່ອນໍາໃຊ້ເຂົ້າໃນການສ້ອມແປງຂົວໃນຄັ້ງນີ້ດ້ວຍ.