ໃນຕົ້ນເດືອນກໍລະກົດ 2022 ຜ່ານມາ, ເຈົ້າໜ້າທີ່ຕຳຫຼວດ ປກສ ກຸ່ມບ້ານນາເຕີຍ ເມືອງ ແລະ ແຂວງຫຼວງນ້ຳທາ ໄດ້ຮັບແຈ້ງຈາກພົນລະເມືອງດີ ວ່າ:

ມີເດັກນ້ອຍເກີດໃໝ່ຖືກຖິ້ມປະໄວ້ ຢູ່ສວນຢາງພາລາ ຈຶ່ງໄດ້ແຕ່ງຕັ້ງເຈົ້າໜ້າທີ່ວິຊາສະເພາະ ສົມທົບກັບ ພາກສ່ວນທີ່ກ່ຽວຂ້ອງ ກວດກາສະຖານທີ່ເກີດເຫດ ພົບເຫັນເດັກນ້ອຍເກີດໃໝ່ເປັນເພດຍິງນອນຫງາຍເສຍຊີວິດ. ຈາກນັ້ນ, ຈຶ່ງໄດ້ເກັບກຳຂໍ້ມູນ ເພື່ອຊອກຫາແມ່ທີ່ນຳເອົາລູກມາຖິ້ມໄວ້ເຂດດັ່ງກ່າວ ແລະ ຕໍ່ມາຈຶ່ງສາມາດຈັບຕົວ ນາງ ຈັນ ອາຍຸ 22 ປີ ຢູ່ບ້ານໄໝ່ ເມືອງນ້ຳບາກ ແຂວງຫຼວງພະບາງ ມາດຳເນີນຄະດີ.

ຜ່ານການສອບສວນຂອງເຈົ້າໜ້າທີ່ ນາງ ຈັນ ຮັບສາລະພາບ ວ່າ:

ເດັກນ້ອຍທີ່ຫາກໍເກີດໃໝ່ ແມ່ນລູກຂອງຜູ້ກ່ຽວແທ້; ເຊິ່ງໄລຍະຜ່ານມາ, ຜູ້ກ່ຽວໄດ້ເຄື່ອນໄຫວເຮັດວຽກເປັນກຳມະກອນຢູ່ໂຮງງານຕ່າງໆ ໃນເຂດນະຄອນຫຼວງວຽງຈັນ ແລະ ຕົກມາຮອດທ້າຍປີ 2021 ໄດ້ມາເຮັດວຽກເປັນສາວບໍລິການຢູ່ຕາມຮ້ານກິນດື່ມ ເຂດບ້ານນາເຕີຍ. ໄລຍະດຽວກັນນັ້ນ, ກໍໄດ້ຮັບແຂກ ແລະ ທຸກຄັ້ງທີ່ມີຄົນມາໃຊ້ບໍລິການ ແມ່ນໄດ້ປ້ອງກັນຕົນເອງຕະຫຼອດ.

ກ່ອນເກີດເຫດ ໃນຕອນກາງຄືນຂອງວັນທີ 8 ກໍລະກົດ 2022, ຜູ້ກ່ຽວໄດ້ຮັບແຂກ ແລະ ກິນດື່ມເຫຼົ້າ-ເບຍນຳແຂກ ຈົນມາຮອດເວລາປະມານ 23:00 ໂມງ ຈຶ່ງໄດ້ປິດຮ້ານແລ້ວເຂົ້ານອນ; ແຕ່ໃນຂະນະນັ້ນ, ຜູ້ກ່ຽວຮູ້ສຶກເຈັບທ້ອງ ຈຶ່ງໄດ້ເຂົ້າຫ້ອງນ້ຳ ແລະ ປະກົດວ່າ ເຫັນລູກນ້ອຍອອກມາຈາກຊ່ອງຄອດເປັນເພດຍິງ.

ຜູ້ກ່ຽວຈຶ່ງຄິດວ່າ ບໍ່ມີໃຜຊິລ້ຽງຊ່ວຍ ແລະ ຮັບເປັນພໍ່ ເນື່ອງຈາກວ່າໄດ້ນອນນຳຜູ້ຊາຍຫຼາຍຄົນ. ຈຶ່ງຕັດສິນໃຈໃຊ້ມືເບື້ອງຂວາບີບຄໍລູກນ້ອຍ ແລ້ວຈັບໂຍນຖິ້ມໄປໃນສວນຢາງພາລາ ເຂດຫຼັງຫ້ອງນ້ຳ; ມື້ຕໍ່ມາ, ຈຶ່ງມີພົນລະເມືອງດີເຂົ້າມາພົບເຫັນ ແລະ ໄດ້ແຈ້ງຕໍ່ເຈົ້າໜ້າທີ່-ທີ່ກ່ຽວຂ້ອງ ພ້ອມທັງໄດ້ນຳຕົວ ນາງ ຈັນ ມາດຳເນີນຄະດີຕາມລະບຽບກົດໝາຍ.

ເຈົ້າໜ້າທີ່ ຍັງໃຫ້ຮູ້ຕື່ມວ່າ:

ການກະທໍາຂອງນາງ ຈັນ ເປັນການກະທໍາທີ່ຜິດຕໍ່ປະມວນກົດໝາຍອາຍາ (ປີ 2021) ມາຕາ 191 ການຄາດຕະກໍາ ຫຼື ການປະຖິ້ມລູກທີ່ຫາກໍເກີດ ເຊິ່ງລະບຸໄວ້ວ່າ: ແມ່ຜູ້ໃດຫາກໄດ້ຄາດຕະກໍາ ຫຼື ປະຖິ້ມລູກທີ່ຫາກໍເກີດຂອງຕົນ ໃຫ້ເສຍຊີວິດ ຈະດ້ວຍເຫດຜົນໃດກໍຕາມ ຈະຖືກລົງໂທດຕັດອິດສະລະພາບ ແຕ່ 2 ຫາ 5 ປີ ແລະ ໃນກໍລະທີ່ຄາດຕະກໍາ ຫຼື ປະຖິ້ມລູກທີ່ຫາກໍເກີດຂອງຕົນ ໃຫ້ເສຍຊີວິດແຕ່ສອງຄົນຂຶ້ນໄປ ຈະຖືກລົງໂທດຕັດອິດສະລະພາບ ແຕ່ 5 ຫາ 7 ປີ.