ກະຊວງພາຍໃນ ຮ່ວມກັບພະແນກພາຍໃນປະຈໍາແຂວງຄໍາມ່ວນ ຈັດກອງປະຊຸມເຜີຍແຜ່ກົດໝາຍ ວ່າດ້ວຍການສໍາຫຼວດວັດແທກ ແລະ ສ້າງແຜນທີ່ຂຶ້ນຢ່າງເປັນທາງການ ໃນວັນທີ 29 ກໍລະກົດ 2022, ຢູ່ທີ່ຫ້ອງວ່າການແຂວງຄໍາມ່ວນ ໂດຍການເປັນປະທານຂອງທ່ານ ປອ ທອງຈັນ ມະນີໄຊ ກໍາ ມະການສູນກາງພັກ ລັດຖະມົນຕີກະຊວງພາຍໃນ, ເຂົ້າຮ່ວມມີທ່ານ ນາງ ສີໄຄ ສໍສີລິບຸນມາ ຫົວໜ້າກົມແຜນທີ່ແຫ່ງຊາດ, ທ່ານ ໄພວັນ ໜູນຄໍາໄຊ ຮັກສາການຫົວໜ້າພະແນກພາຍໃນແຂວງຄໍາມ່ວນ ພ້ອມດ້ວຍຄະນະ, ມີບັນດາທ່ານທີ່ຕາງໜ້າໃຫ້ແກ່ພະແນກການທີ່ກ່ຽວຂ້ອງ, ຫົວໜ້າຫ້ອງການພາຍໃນຈາກ 10 ຕົວເມືອງອ້ອມຂ້າງແຂວງ ຕະຫຼອດເຖິງພະນັກງານວິຊາການທີ່ກ່ຽວຂ້ອງຈາກສູນກາງ ແລະ ທ້ອງຖິ່ນເຂົ້າຮ່ວມ.

ທ່ານ ປອ ທອງຈັນ ມະນີໄຊ ກໍາມະການສູນກາງພັກ ລັດຖະມົນຕີກະຊວງພາຍໃນໃຫ້ກຽດກ່າວເປີດກອງປະຊຸມພ້ອມທັງມີຄໍາເຫັນວ່າ : ຂໍ້ມູນສໍາຫຼວດວັດແທກ, ພາບຖ່າຍທາງອາກາດ, ແຜນທີ່ ແລະ ຂໍ້ມູນຂ່າວສານພູມສາດ ມີຄວາມສໍາຄັນ ແລະ ຈໍາເປັນສໍາລັບທຸກໆປະເທດ ບໍ່ວ່າປະເທດນັ້ນຈະເປັນປະເທດທີ່ມີເສດຖະກິດຂະຫຍາຍຕົວສູງ, ກໍາລັງຂະຫຍາຍຕົວ ແລະ ປະເທດດ້ອຍພັດທະນາກໍຕາມ ຂໍ້ມູນດັ່ງກ່າວແມ່ນມີຄວາມຈໍາເປັນ ແລະ ເປັນຂໍ້ມູນທີ່ເປັນພື້ນຖານເພື່ອນຳໃຊ້ເຂົ້າໃນການວາງແຜນພັດທະນາເສດຖະກິດສັງຄົມ, ປ້ອງກັນຊາດ-ປ້ອງກັນຄວາມສະຫງົບ, ຄຸ້ມຄອງຊັບພະຍາ ກອນທຳມະຊາດ, ປົກປັກຮັກສາສິ່ງແວດລ້ອມ, ຄົ້ນຄ້ວາວິທະຍາສາດ.

ໃນໄລຍະຜ່ານມາ, ລັດຖະບານ ໄດ້ປະກາດໃຊ້ນິຕິກໍາຈໍານວນໜຶ່ງ ເພື່ອເປັນບ່ອນອີງເຮັດໜ້າທີ່ຄຸ້ມຄອງລັດ ໃນການຈັດຕັ້ງປະຕິບັດວຽກງານດັ່ງກ່າວ ເປັນຕົ້ນການປະກາດໃຊ້ດໍາລັດ ສະບັບເລກທີ 73/ນຍ ລົງວັນທີ 20 ກັນຍາ 1995 ວ່າດ້ວຍວຽກງານສໍາຫຼວດວັດແທກ, ຖ່າຍພາບທາງອາກາດ ແລະ ສ້າງແຜນທີ່ ໃນດິນແດນ ສປປ ລາວ. ຕໍ່ມາ, ໄດ້ປັບປຸງມາເປັນດໍາລັດ ສະບັບເລກທີ 225/ນຍ ລົງວັນທີ 16 ສິງຫາ 2005 ແລະ ປັບປຸງມາເປັນດໍາລັດ ສະບັບເລກທີ 330/ນຍ ລົງວັນທີ 18 ກັນຍາ 2014 ວ່າດ້ວຍການສໍາຫຼວດວັດແທກ, ຖ່າຍພາບທາງອາກາດ ແລະ ສ້າງແຜນທີ່. ເຖິງແມ່ນວ່າດໍາລັດດັ່ງກ່າວ ມີການປັບປຸງມາແລ້ວ 2 ຄັ້ງກໍຕາມ, ແຕ່ກໍຍັງເຫັນວ່າ ດໍາລັດດັ່ງກ່າວຍັງມີເນື້ອໃນບໍ່ຄົບຖ້ວນ, ຮັດກຸມ ແລະ ປະສິດທິພາບບໍ່ສູງ ພຽງພໍທີ່ຈະເປັນເຄື່ອງມືໃນການຄຸ້ມຄອງລັດ ຕໍ່ວຽກງານສໍາຫຼວດວັດແທກ ແລະ ສ້າງແຜນທີ່. ຖ້າທຽບໃສ່ການພັດທະນາ ແລະ ການຂະຫຍາຍຕົວທາງດ້ານວິທະຍາສາດ-ເຕັກໂນໂລຊີ ແລະ ການເຊື່ອມໂຍງກັບພາກພື້ນ ແລະ ສາກົນ. ໂດຍສະເພາະຂະແໜງການສໍາຫຼວດວັດແທກແມ່ນໜຶ່ງໃນ ເຈັດຂະແໜງການຍ່ອຍທີ່ເປັນບູລິມະສິດນອນໃນຂະແໜງການບໍລິການເສົາຄໍ້າເສດຖະກິດຂອງອາຊຽນ. ສະນັ້ນ, ຈຶ່ງໄດ້ຮຽກຮ້ອງໃຫ້ມີກົດໝາຍ ເພື່ອອໍານວຍຄວາມສະດວກ, ຕິດຕາມກວດກາ ແລະ ຄຸ້ມຄອງວຽກງານດັ່ງກ່າວໃນອະນາຄົດ.

ຈາກນັ້ນ, ທ່ານ ສີໄຄ ສໍສີລິບຸນມາ ຫົວໜ້າກົມແຜນທີ່ແຫ່ງຊາດ ກໍໄດ້ເຜີຍແຜ່ກົດໝາຍ ວ່າດ້ວຍການສໍາຫຼວດວັດແທກ ແລະ ສ້າງແຜນທີ່; ເຊິ່ງພາຍຫຼັງທີ່ກອງປະຊຸມສະໄໝສາມັນ ເທື່ອທີ 2 ຂອງສະພາແຫ່ງຊາດ ຊຸດທີ IX ໄດ້ຄົ້ນຄວ້າພິຈາລະນາຢ່າງກວ້າງຂວາງ ແລະ ເລິກເຊິ່ງກ່ຽວກັບເນື້ອໃນຂອງກົດໝາຍ ວ່າດ້ວຍການສໍາຫຼວດວັດແທກ ແລະ ສ້າງແຜນທີ່ໃນວາລະຕອນເຊົ້າຂອງກອງປະຊຸມຄັ້ງວັນທີ 11 ພະຈິກ 2021 ແລະ ຖືກພິຈາລະ ນາຮັບຮອງເອົາໃນວາລະຕອນບ່າຍຂອງກອງປະຊຸມ ຄັ້ງວັນທີ 16 ພະຈິກ 2021, ເຊິ່ງປະກອບມີ 10 ພາກ 92 ມາດຕາ.

ໃນກອງປະຊຸມ, ຍັງໄດ້ມີການປະກອບຄໍາຄິດເຫັນກ່ຽວກັບການຈັດຕັ້ງປະຕິບັດການສໍາຫຼວດວັດແທກ ແລະ ສ້າງແຜນທີ່ໃນໄລຍະຜ່ານມາ ລວມເຖິງຂໍ້ສະດວກ , ຂໍ້ຫຍຸ້ງຍາກ , ບັນຫາຄົງຄ້າງຕ່າງໆທີ່ສູນກາງ ແລະ ທ້ອງຖິ່ນຈະຕ້ອງໄດ້ພ້ອມກັນແກ້ໄຂ.

ຕອນທ້າຍກອງປະຊຸມ, ທ່ານລັດຖະມົນຕີພ້ອມດ້ວຍຄະນະ ຍັງໄດ້ມອບອຸປະກອນຮັບໃຊ້ຫ້ອງການທີ່ໄດ້ຈາກການອຸປະຖໍາຊ່ວຍເຫືອຈາກພາກສ່ວນຕ່າງໆປະເພດອຸປະກອນເຄື່ອງຮັບໃຊ້ກອງປະຊຸມທາງໄກຄົບຊຸດໃຫ້ແກ່ພະແນກພາຍໃນແຂວງ ແລະ ຄອມພິວເຕີ້ໂນດບຸກເມືອງລະ 1 ເຄື່ອງໃຫ້ແກ່ຫ້ອງການພາຍໃນ 10 ເມືອງຂອງແຂວງຄໍາມ່ວນ ເພື່ອນໍາໃຊ້ເຂົ້າໃນການຈັດຕັ້ງປະຕິບັດໜ້າທີ່ວຽກງານ.

ຂ່າວ-ພາບ : ແດງສະຫວັດ ແສນພານິດ