ວິທະຍາຄານສັນຕິບານປະຊາຊົນ (ວສປ) ກະຊວງ ປກສ ສືບຕໍ່ຈັດພິທີປ້ອງກັນວິທະຍານິພົນຈົບຊັ້ນ ປະລິນຍາໂທ ຮຸ່ນທີ 12 ໃນວັນທີ 2 ສິງຫາ 2022, ເປັນປະທານໂດຍ ພົຈວ ປອ ວັນສົມ ສີສົມບັດ ຫົວໜ້າອຳນວຍການ ວິທະຍາຄານສັນຕິບານປະຊາຊົນ, ມີຄະນະອຳນວຍການ, ຕາງໜ້າກົມກອງ, ກຳມະການ, ຄູ-ອາຈານທີ່ປຶກສາ ແລະ ນັກສຶກສາ ເຂົ້າຮ່ວມ.

ນັກສຶກສາປະລິນຍາໂທ ຮຸ່ນທີ 12 ມີທັງໝົດ 24 ສະຫາຍ ຍິງ 1 ສະຫາຍ ມາຈາກບັນດາກົມກອງອ້ອມຂ້າງ ກະຊວງ, ກອງບັນຊາການ ປກສ ແຂວງ, ເຊິ່ງມີໜ້າທີ່ຂັ້ນຄະນະພັກກົມ, ຄະນະຫ້ອງ ແລະ ພະແນກ; ເຊິ່ງເລີ່ມເປີດຮຽນໃນວັນທີ 1 ຕຸລາ 2020, ກຳນົດຮຽນ 2 ປີ, ມີ 66 ໜ່ວຍກິດ, ມີ 4 ພາກ, ມີ 25 ວິຊາຮຽນ.

ພາຍຫຼັງສຳເລັດຫຼັກສູດການຮຽນ-ການສອນ ໄດ້ມີພິທີປ້ອງກັນວິທະຍານິພົນຈົບຊັ້ນ ໃຫ້ນັກສຶກສາ ເລີ່ມແຕ່ວັນທີ 19 ກໍລະກົດ ຫາ 26 ສິງຫາ 2022 ໃຫ້ສໍາເລັດ.

ສຳລັບວັນທີ 2 ສິງຫາ 2022 ໄດ້ຂຶ້ນປ້ອງກັນ 2 ຫົວຂໍ້ ຄື:

  • ຍົກສູງຄຸນນະພາບວຽກງານກໍ່ສ້າງ ແລະ ນຳໃຊ້ຕາໜ່າງລັບ ຕາມຊາຍແດນ ລາວ-ໄທ ຢູ່ນະຄອນຫຼວງວຽງຈັນ, ປ້ອງກັນໂດຍ ພັທ ດາວວອນ ທິບພອນໄຊ
  • ຍົກສູງຄຸນນະພາບວຽກງານປ້ອງກັນຄວາມສະຫງົບ ຕໍ່ຈຸດໝາຍສຳຄັນດ້ານວັດທະນະທຳ ຢູ່ນະຄອນຫຼວງວຽງຈັນ, ປ້ອງກັນໂດຍ ຮອ ເຫຼົາທອງ ໄຊຍະວົງ.