ກອງປະຊຸມສະຫຼຸບຜົນການຮຽນ ແລະ ການຝືກຝົນຫຼ່ໍຫຼອມຂອງນ້ອງນັກຮຽນ ຮຸ່ນ C12 ແລະ C13 ໂຮງຮຽນວັດທະນະທຳ ເລກ 1 ກະຊວງປ້ອງກັນຄວາມສະຫງົບ ສສ ຫວຽດນາມ ສົກຮຽນ 2021-2022 ໄດ້ຈັດຂຶ້ນໃນວັນທີ 29 ກໍລະກົດ 2022, ໂດຍການເປັນປະທານຂອງ ພັອ ບຸນມີ ມັກຄະວານ ຫົວໜ້າກົມກໍ່ສ້າງກຳລັງ ກົມໃຫຍ່ການເມືອງປ້ອງກັນຄວາມສະຫງົບ, ມີຄະນະຮັບຜິດຊອບ, ພໍ່-ແມ່ຜູ້ປົກຄອງ ພ້ອມດ້ວຍນ້ອງນັກຮຽນທັງສອງຮຸ່ນ ເຂົ້າຮ່ວມ.

ພັທ ພອນວິລັດ ແສງດາລາ ຫົວໜ້າພະແນກຄຸ້ມຄອງຫຼັກສູດການສຶກສາ ກົມກໍ່ສ້າງກຳລັງ ກ່າວວ່າ:

ນ້ອງນັກຮຽນທັງສອງຮຸ່ນ ທີ່ສຶກສາຢູ່ໂຮງຮຽນວັດທະນະທຳ ເລກ 1 ກະຊວງປ້ອງກັນຄວາມສະຫງົບ ສສ ຫວຽດນາມ ສົກຮຽນ 2021-2022 ມີທັງໝົດ 202 ນ້ອງ ຍິງ 87 ນ້ອງ; ໃນນັ້ນ, ນັກຮຽນໃນ C12 ມີ 101 ນ້ອງ ຍິງ 43 ນ້ອງ ແລະ ຮຸ່ນ C13 ມີ 101 ນ້ອງ ຍິງ 4 ນ້ອງ.

ຕະຫຼອດໄລຍະຜ່ານມາ, ເຫັນວ່າ ນ້ອງນັກຮຽນມີແນວຄິດໜັກແໜ້ນ, ອຸ່ນອຽນທຸ່ນທ່ຽງ, ເຊື່ອໜັ້ນຕໍ່ອຸດົມການຂອງພັກ, ມີຄວາມບໍລິສຸດຕໍ່ຊາດ ແລະ ປະຊາຊົນ, ເຊື່ອໝັ້ນຕໍ່ແນວທາງນະໂຍບາຍຂອງພັກ-ກົດໝາຍຂອງສອງປະເທດ ເວົ້າລວມ, ເວົ້າສະເພາະ ກໍຄື ລະບຽບຂອງໂຮງຮຽນ ແລະ ຂອງກຳລັງປ້ອງກັນຄວາມສະຫງົບ ວາງອອກຢ່າງເຂັ້ມງວດ.

ນັກຮຽນແຕ່ລະນ້ອງ ແມ່ນມີຄວາມເອົາໃຈໃສ່ຫ້າວຫັນ, ຄົ້ນຄວ້າຮໍ່າຮຽນ ແລະ ຖືເອົາການຮຽນເປັນໜ້າທີ່ສຳຄັນຕົ້ນຕໍ, ເປັນເຈົ້າການຊອກຮູ້ຮ່ຳຮຽນ ເປັນຕົ້ນ ພາສາຕ່າງປະເທດ ເຊິ່ງສະແດງອອກ ຄື: ເອົາໃຈໃສ່ຮັບຟັງເວລາອາຈານຂຶ້ນຫ້ອງສິດສອນ; ນອກຈາກນີ້, ຍັງໄດ້ຄົ້ນຄວ້າຊອກຮຽນດ້ວຍຕົນເອງ ແລະ ຮຽນນໍາຜູ້ມີປະສົບການຕົວຈິງ, ຮຽນນຳໝູ່ເພື່ອນນັກຮຽນດ້ວຍກັນ ເພື່ອຍາດແຍ່ງເອົາຄວາມຮູ້ຄວາມສາມາດ ໃຫ້ກາຍເປັນນັກຮຽນທີ່ຮຽນດີ, ຮຽນເກັ່ງ. ໃນນັ້ນ, ສາມາດຍາດໄດ້ຄະແນນເກັ່ງ ມີ 11 ນ້ອງ ຍິງ 9 ນ້ອງ ເທົ່າກັບ 5.44%, ປະເພດພໍໃຊ້ ມີ 91 ນ້ອງ ຍິງ 57 ນ້ອງ ເທົ່າກັບ 45,05% ແລະ ຈັດໃນປະເພດກາງ ມີ 100 ນ້ອງ ຍິງ 21 ນ້ອງ ເທົ່າກັບ 49,50%.

ນອກນັ້ນ, ນັກຮຽນທຸກນ້ອງ ຍັງໄດ້ເອົາໃຈໃສ່ປະຕິບັດຂໍ້ກຳນົດກົດລະບຽບຂອງໂຮງຮຽນວາງອອກ ໄດ້ຢ່າງເຂັ້ມງວດ ເປັນຕົ້ນແມ່ນ ຮູ້ຈັກເຄົາລົບນັບຖືການຈັດຕັ້ງ, ຄູ-ອາຈານ, ເຄົາລົບລະບຽບກົດໝາຍຂອງສອງປະເທດໄດ້ເປັນຢ່າງດີ, ເຊິ່ງສະແດງອອກ ຄື: ບໍ່ມີນ້ອງໃດລະເມີດກົດລະບຽບຂອງໂຮງຮຽນວາງອອກ ໃນໄລຍະທີ່ຮຽນຢູ່ຫວຽດນາມ, ນັກຮຽນໄດ້ຕັ້ງໜ້າຝຶກຝົນຫຼ່ໍຫຼອມຕົນເອງ ໃຫ້ມີຄຸນສົມບັດສິນທຳປະຕິວັດ, ມີນ້ຳໃຈບຸກບືນອົດທົນເສຍສະລະສູງ, ດຸໝັ່ນຂະຫຍັນພຽນເຂົ້າໃນການຮໍ່າຮຽນ ສະແດງອອກຄື: ມີນັກຮຽນຝຶກຝົນຫຼ່ໍຫຼອມດີ ຈຳນວນ 11 ນ້ອງ ຍິງ 9 ນ້ອງ ກວມເອົາ 5,44%.