ປກສ ເມືອງປະທຸມພອນ ເຜີຍແຜ່ວາລະແຫ່ງຊາດ ວ່າດ້ວຍການແກ້ໄຂບັນຫາຢາເສບຕິດ ໄລຍະທີ 2 ທົ່ວກຸ່ມນ້ຳອ້ອມ

0
3

ໃນວັນທີ 27 ກໍລະກົດ 2022, ປກສ ເມືອງປະທຸມພອນ ແຂວງຈຳປາສັກ ໄດ້ສືບເຜີຍແຜ່ວາລະແຫ່ງຊາດ ວ່າດ້ວຍການແກ້ໄຂບັນຫາຢາເສບຕິດ ໄລຍະທີ 2 ທົ່ວກຸ່ມນ້ຳອ້ອມ ໂດຍການເຂົ້າຮ່ວມເປັນປະທານຂອງ ພັທ ບຸນປອນ ວົງຄຳສຸກ ຮອງຫົວໜ້າກອງບັນຊາການປ້ອງກັນຄວາາມສະຫງົບເມືອງປະທຸມພອນ, ມີ ທ່ານ ວັນດີ ອັກຄະວົງ ເລຂາຄະນະພັກຮາກຖານກຸ່ມນ້ຳອ້ອມ,ພັທ ຄຳເຂືອງ ຫົວໜ້າ ປກສ ກຸ່ມນ້ຳອ້ອມ, ພັຕ ປະຖົມ ສຸກກວ້າງ ຄະນະກອງກໍ່ສ້າງຮາກຖານ ປກສ ແຂວງ ປະຈຳເມືອງປະທຸມພອນ ເຂົ້າຮ່ວມ, ພ້ອມມີບັນດາທ່ານຄະນະກຳມະການຂັ້ນເມືອງ, ຄະນະພັກຮາກຖານກຸ່ມ, ອຳນາດການປົກຄອງບ້ານທົ່ວກຸ່ມ, ປກສ ບໍລິການປະຊາຊົນກຸ່ມ ແລະ ຊາວໜຸ່ມກຸ່ມເປົ້າໝາຍເຂົ້າຮ່ວມ.

ເພື່ອປະຕິບັດວາລະແຫ່ງຊາດ ແລະ ສຸມໃສ່ທຸກກຳລັງແຮງເຂົ້າໃນການແກ້ໄຂບັນຫາທີ່ສຳຄັນ, ຈຳເປັນ ແລະ ຮີບດ່ວນຂອງຊາດ ໂດຍສະເພາະແມ່ນບັນຫາຢາເສບຕິດ ໃຫ້ຫຼຸດລົງຢ່າງຈະແຈ້ງ ໃນກຳນົດເວລາທີ່ແນ່ນອນ; ເຊິ່ງຖືເອົາການແກ້ໄຂບັນຫາຢາເສບຕິດເປັນໜ້າທີ່ພັນທະ ແລະ ຄວາມຮັບ ຜິດຊອບຂອງທຸກພາກສ່ວນໃນສັງຄົມ. ສະນັ້ນ, ປກສ ເມືອງປະທຸມພອນ ຈຶ່ງໄດ້ມີແຜນລະອຽດໃນການຈັດຕັ້ງປະຕິບັດການຜັນຂະຫຍາຍວາລະແຫ່ງຊາດ ວ່າດ້ວຍການແກ້ໄຂບັນຫາຢາເສບຕິດ ມາເປັນວາລະຂອງເມືອງ ໂດຍການລົງເຄື່ອນໄຫວໂຄສະນາເຜີຍແຜ່ຜົນຮ້າຍຂອງຢາເສບຕິດ. ທັງນີ້, ກໍເພື່ອເປັນການປູກຈິດສຳນຶກໃຫ້ແກ່ຊາວໜຸ່ມ-ໄວໜຸ່ມ ໃຫ້ມີສະຕິລະວັງຕົວສູງ ໃນການດຳລົງຊີວິດ ເພື່ອບໍ່ໃຫ້ຕົກເປັນທາດຂອງຢາເສບຕິດ ແລະ ກະທຳຜິດໃນຂໍ້ຫາຢາເສບຕິດ ເຮັດໃຫ້ສັງຄົມກໍຄືກຸ່ມບ້ານມີຄວາມສະຫງົບ ແລະ ຄວາມເປັນລະບຽບຮຽກຮ້ອຍ.

ໃນກອງປະຊຸມຊາວໜຸ່ມ-ໄວໜຸ່ມ ໃດ້ຮັບຟັງການເຜີຍແຜ່ເອກະສານຕ່າງໆ ຈາກບັນດາທ່ານຄະນະກຳມະການຂັ້ນ ແລະ ພະແນກການທີ່ກ່ຽວຂ້ອງທີ່ມາຈາກກອງບັນຊາການ ປ້ອງກັນຄວາມສະຫງົບເມືອງເຊິ່ງລວມມີເອກະສານ: ເອກະສານຜົນຮ້າຍຂອງຢາເສບຕິດ ແລະ ການຈັດຕັ່ງປະຕິບັດກ່ຽວກັບກົດໝາຍຢາເສບຕິດ, ເອກະສານກົດໝາຍ ວ່າດ້ວຍຊາວໜຸ່ມລາວ, ເອກະສານກໍ່ອາດສະຍາກຳວ່າດ້ວຍການລັກລົດ, ເອກະສານປະຕິບັດກົດໝາຍອາຍາ, ເອກະສານກ່ຽວກຫບການສັນຈອນທາງບົກ ແລະ ເອກະສານປະຕິບັດຄຳຕັດສິນຂອງສານ.

ພ້ອມດຽວກັນນີ້, ບັນດາຊາວໜຸ່ມ-ໄວໜຸ່ມທີ່ເຂົ້າຮ່ວມກອງປະຊຸມ ຍັງໄດ້ມີການປະກອບຄຳຄິດເຫັນຕໍ່ກອງປະຊຸມ ແລະ ໃນຕອນທ້າຍກອງປະຊຸມ, ຍັງໄດ້ຮັບຟັງການໂອລົມຈາກ ພັທ ບຸນປອນ ວົງຄຳສຸກ ຮອງຫົວໜ້າປກສ ເມືອງປະທຸມພອນ ຕື່ມອີກດ້ວຍ.

ຂ່າວ-ພາບ: ຮອ ພົງ ໄຊສົມບັດ

ບກ: ຮອ ຈັນທະພອນ ລາຊາສົມບັດ