ເຈົ້າໜ້າທີ່ວິຊາສະເພາະກອງບັນຊາການ ປກສ ແຂວງຄຳມ່ວນ ສົມທົບກັບ ປກສ ກຸ່ມ ແລະ ອົງການປົກຄອງບ້ານເລົ່າຄາ ເມືອງຫີນບູນ ໄດ້ລົງມ້າງເຄືອຂ່າຍຢາເສບຕິດຢູ່ເຂດບ້ານເລົ່າຄາ ສາມາດຈັບເປົ້າໝາຍໄດ້ 3 ຄົນ ພ້ອມຂອງກາງຢາບ້າ 10 ມັດ ຫຼື 20.000 ເມັດ.

ການລົງມ້າງຄັ້ງນີ້, ເຈົ້າໜ້າທີ່ຕຳຫຼວດພະແນກສືບສວນ-ສອບສວນ ປກສ ແຂວງຄຳມ່ວນ ໃຫ້ຮູ້ວ່າ: ພາຍຫຼັງທີ່ໄດ້ຮັບລາຍງານ ພ້ອມທັງນໍາກຳລັງລົງປະສານສົມ ທົບກັບ ປກສ ກຸ່ມ ແລະ ອົງການປົກຄອງບ້ານ ຈຶ່ງສາມາດກັກຕົວ ເປົ້າໝາຍຊື່ ທ້າວ ບຸນຫຼາຍ ຫຼື ເຕ້ຍ ອາຍຸ 17 ປີ ຢູ່ບ້ານຜາງຊ້າງເມືອງ ຄູນຄຳ ແຂວງຄຳມ່ວນ, ທ້າວ ບຸນຈັນ ຫຼື ແສງ ອາຍຸ 17 ປີ ບ້ານວຽງຄຳ ແລະ ທ້າວ ໂກ້ ອາຍຸ 17 ປີ ທັງສອງຢູ່ບ້ານວຽງຄຳ ເມືອງປາກກະດິງ ແຂວງບໍລິຄຳໄຊ. ຜ່ານການສອບສວນພວກກ່ຽວຮັບສາລະພາບວ່າ: ຢາບ້າຈຳນວນດັ່ງກ່າວແມ່ນເປັນຂອງພວກກ່ຽວແທ້, ເຊິ່ງໄດ້ຊື້ຈາກກຸ່ມຄ້າ-ຂາຍຮ່ວມຂະບວນການດຽວກັນ ເພື່ອນຳໄປຈຳໜ່າຍໃຫ້ພວກໄວລຸ້ນຕາມຂອບເຂດບ້ານ.

ປັດຈຸບັນ, ຄະດີດັ່ງກ່າວແມ່ນຢູ່ໃນຂັ້ນຕອນການສືບຕໍ່ເກັບກຳຂໍ້ມູນຫຼັກຖານ ພ້ອມທັງສືບສວນ-ສອບສວນ ເພື່ອຂະຫຍາຍຜົນຫາຜູ້ຮ່ວມຂະບວນ ການ ເພື່ອມາດຳເນີນຄະດີຕາມກົດໝາຍ.