ກອງບັນຊາການ ປກສ ແຂວງອັດຕະປື ຈັດກອງປະຊຸມສະຫຼຸບຕີລາຄາຄືນຜົນການຈັດຕັ້ງປະຕິບັດວຽກງານປ້ອງກັນຄວາມສະຫງົບ ປະຈຳ 6 ເດືອນ ຕົ້ນປີ ແລະ ວາງທິດທາງແຜນການວຽກງານຈຸດສຸມ 6 ເດືອນທ້າຍປີ 2022; ໃນອາທິດຜ່ານມາ, ເປັນປະທານໂດຍ ພັອ ສີເວີນ ແກ້ວສີວົງສາ ຫົວ ໜ້າກອງບັນຊາການ ປກສ ແຂວງ, ມີຄະນະ ພັກກອງບັນຊາການ ປກສ ແຂວງ, ຄະນະພັກຮາກຖານ, ຄະນະຫ້ອງ, ກອງພັນເຄື່ອນທີ່, ຄ້າຍຄຸມຂັງ – ດັດສ້າງ, ກອງບັນຊາການ ປກສ 5 ຕົວເມືອງ ພ້ອມດ້ວຍນາຍ ແລະ ພົນຕຳຫຼວດ ເຂົ້າຮ່ວມ.

ໃນກອງປະຊຸມ, ພັທ ເພັດສະຫວັນ ບຸນລິວົງ ຮອງຫົວໜ້າຫ້ອງການກອງບັນຊາການ ປກສ ແຂວງ ໃຫ້ຮູ້ວ່າ: ໃນໄລຍະຜ່ານມາ, ກອງບັນຊາການ ປກສ ແຂວງອັດຕະປື ໄດ້ສຸມໃສ່ເຮັດວຽກງານສຶກສາອົບຮົມການເມືອງ-ນຳພາແນວຄິດໃຫ້ນາຍ ແລະ ພົນຕຳຫຼວດ ພາຍໃນກົມກອງ; ນອກນັ້ນ, ຍັງໄດ້ສຸມໃສ່ການປົກປັກຮັກສາຄວາມເປັນລະບຽບຮຽບຮ້ອຍທາງດ້ານສັງຄົມ, ໄດ້ແກ້ໄຂປະກົດການຫຍໍ້ທໍ້ທີ່ເກີດຂຶ້ນທາງດ້ານສັງຄົມ, ໂດຍປະຕິບັດຕາມຄຳ ສັ່ງເລກທີ 27/ນຍ, ຄຳສັ່ງ ເລກທີ 1470/ປກສ ກ່ຽວກັບການສະກັດກັ້ນ ແລະ ແກ້ໄຂປະກົດຫຍໍ້ທໍ້ທີ່ເກີດຂຶ້ນໃນສັງຄົມ.

ໃນໄລຍະ 6 ເດືອນຕົ້ນປີ 2022, ມີຄະດີຢາເສບຕິດເກີດຂຶ້ນທັງໝົດ 67 ເລື່ອງ, ກັກຜູ້ຖືກຫາໄດ້ 91 ຄົນ ຍິງ 17 ຄົນ, ຄົນຕ່າງປະເທດ 1 ຄົນ ຢຶດຂອງກາງຢາບ້າໄດ້ 20.733 ເມັດ, ເງິນ ກີບຈຳນວນ 46.187.000 ກີບ, ໂທ ລະສັບ 66 ເຄື່ອງ, ລົດຈັກ 17 ຄັນ, ລົດໃຫຍ່ 1 ຄັນ, ປືນແກັບ 3 ກະ ບອກ, ໂມງ 2 ໜ່ວຍ, ຄະດີອາຍາ ເກີດຂຶ້ນ 78 ເລື່ອງ, ສາມາດມ້າງໄດ້ 54 ເລື່ອງ, ກັກຜູ້ຖືກຫາໄດ້ 65 ຄົນ ຍິງ 7 ຄົນ, ຄະດີອຸບັດຕິເຫດເກີດຂຶ້ນ 147 ຄັ້ງ, ມີພາຫານະເປ່ເພ 236 ຄັນ, ມີຄົນ ໄດ້ຮັບບາດເຈັບ 115 ຄົນ ຍິງ 52 ຄົນ, ມີຄົນເສຍຊີວິດ 23 ຄົນ ຍິງ 6 ຄົນ, ຄະດີອັກຄີໄພເກີດຂຶ້ນ 10 ຄັ້ງ ຜົນ ເສຍຫາຍ 270.000.000 ກີບ.

ສໍາລັບໃນ 6 ເດືອນທ້າຍປີ 2022, ແມ່ນຈະເອົາໃຈໃສ່ເຊື່ອມຊືມມະຕິຄຳສັ່ງຕ່າງໆຂອງຂັ້ນເທິງຢ່າງເປັນປົກກະຕິ, ເພີ່ມທະວີວຽກງານກໍ່ສ້າງພັກ-ກໍ່ ສ້າງພະນັກງານພາຍໃນກຳລັງປ້ອງກັນຄວາມສະຫງົບໃຫ້ປອດໃສ່ເຂັ້ມແຂງ ໜັກແໜ້ນ ເພື່ອເຮັດໃຫ້ວຽກງານປ້ອງກັນຄວາມສະຫງົບມີຄວາມກ້າວ ໜ້າ, ຕັ້ງໜ້າຜັນຂະຫຍາຍວຽກງານປ້ອງກັນຊາດ-ປ້ອງກັນຄວາມສະຫງົບ ທົ່ວປວງຊົນຮອບດ້ານ, ສືບຕໍ່ຫັ້ນເອົາພະນັກງານລົງກໍ່ສ້າງຮາກຖານເພື່ອເຮັດໃຫ້ຮາກຖານມີຄວາມເຂັ້ມແຂງ ເພື່ອຮັບປະກັນເຮັດໃຫ້ແຂວງອັດຕະປື ມີສະຖຽນລະພາບທາງດ້ານການເມືອງ, ສັງຄົມມີຄວາມສະຫງົບ ແລະ ມີຄວາມເປັນລະບຽບຮຽບຮ້ອຍໂດຍພື້ນຖານ, ສືບຕໍ່ປະຕິບັດ 4 ແຜນງານໃຫຍ່ ແລະ 41 ໂຄງການທີ່ ກະຊວງປ້ອງກັນຄວາມສະຫງົບວາງອອກ. ໃນກອງປະຊຸມຜູ້ເຂົ້າຍັງໄດ້ປະກອບຄຳເຫັນໃສ່ຮ່າງບົດສະຫຼຸບດັ່ງກ່າວ ເພື່ອເຮັດໃຫ້ເນື້ອໃນບົດສະຫຼຸບມີຄວາມສອດຄ່ອງ ແລະ ຖືກຕ້ອງກັບຄວາມເປັນຈິງ.