ຄະນະຮັບຜິດຊອບຊຸກຍູ້ຂະບວນການກໍ່ສ້າງໜ່ວຍພັກປອດໃສ ເຂັ້ມແຂງ ໜັກແໜ້ນ ປະຈໍາ ປີ 2022 ຢູ່ບັນດາກົມກອງອ້ອມຂ້າງ ກະຊວງ ປກສ ໄດ້ລົງຊຸກຍູ້ຂະບວນການກໍ່ສ້າງໜ່ວຍພັກປອດໃສ ເຂັ້ມແຂງ ໜັກແໜ້ນ ຢູ່ກອງບັນຊາການປ້ອງກັນສູນກາງ ໃນວັນທີ 3 ສິງຫາ 2022, ໂດຍມີ ພັອ ບຸນມະນີ ຫຼ້າພິມພອນ ຮອງເລຂາຄະນະພັກ ຮອງຫົວໜ້າກົມປ້ອງກັນກໍາລັງ ທັງເປັນ ຄະນະຊຸກຍູ້ຂະບວນການກໍ່ສ້າງໜ່ວຍພັກປອດໃສ ເຂັ້ມແຂງ ໜັກແໜ້ນ ປະຈໍາປີ 2022, ມີ ພັທ ສູນເພັງ ສິນທະວອນ ຮອງປະທານກວດກາພັກ ຮອງຫົວໜ້າກອງບັນຊາການປ້ອງກັນສູນກາງ ຫົວໜ້າຫ້ອງການເມືອງ, ມີຄະນະພັກ, ພະນັກງານຫຼັກແຫຼ່ງ ເຂົ້າຮ່ວມ.

ການລົງຊຸກຍູ້ໃນຄັ້ງນີ້ ແມ່ນໄດ້ຮັບການລາຍງານສະພາບການເຄື່ອນໄຫວຊີ້ນຳ-ນຳພາຂອງ ອົງຄະນະພັກ ກອງບັນຊາການປ້ອງກັນສູນກາງ, ໂດຍ ພັທ ພູຄໍາຫຼ້າ ໄຊຍະສອນ ຜູ້ກວດກາໜ່ວຍພັກ ຮອງຫົວໜ້າຫ້ອງການເມືອງ ກອງບັນຊາການປ້ອງກັນສູນກາງ ໄດ້ຜ່ານການຈັດຕັ້ງປະຕິບັດວຽກງານກວດກາພັກ ແລະ ການກໍ່ສ້າງໜ່ວຍພັກປອດໃສ ເຂັ້ມແຂງ ໜັກແໜ້ນ ປະຈໍາປີ 2022 ໃຫ້ຮູ້ວ່າ:

ການຕີລາຄາຄຸນນະພາບຂອງສະມາຊິກພັກ ແມ່ນມີຄວາມໜັກແໜ້ນທາງດ້ານການເມືອງແນວຄິດ, ມີຄວາມຮັບຜິດຊອບສູງຕໍ່ໜ້າທີ່ການເມືອງ ເຊິ່ງສະແດງອອກ ຄື: ຈັດແບ່ງປະເພດຂອງສະມາຊິກພັກທັງໝົດ 517 ສະຫາຍ ຍິງ 80 ສະຫາຍ. ແບ່ງປະເພດ 501 ສະຫາຍ ຍິງ 78 ສະຫາຍ.

ໃນນັ້ນ, ມີສະມາຊິກພັກແຂງ 468 ສະຫາຍ ຍິງ 75 ສະຫາຍ ກວມເອົາ 93,41%, ປະເພດກາງ 28 ສະຫາຍ ຍິງ 2 ສະຫາຍ ກວມເອົາ 5,58%, ປະເພດອ່ອນ 3 ສະຫາຍ ກວມເອົາ 0,59%, ເສຍທາດ 2 ສະຫາຍ ກວມເອົາ 0,39% ແລະ ບໍ່ໄດ້ແບ່ງປະເພດ 16 ສະຫາຍ ເນື່ອງຈາກລາພັກປິ່ນປົວຍາວນານ, ກໍາລັງສຶກສາຢູ່ຕ່າງປະເທດ ແລະ ສໍາເລັດການສຶກສາມາໃໝ່; ນອກນີ້, ກໍໄດ້ຈັດແບ່ງປະເພດໜ່ວຍພັກ ທັງໝົດມີ 26 ໜ່ວຍ, ໜ່ວຍພັກແຂງ 15 ໜ່ວຍ ກວມເອົາ 68,18%, ໜ່ວຍພັກກາງມີ 7 ໜ່ວຍ ກວມເອົາ 31,81% ແລະ ບໍ່ໄດ້ແບ່ງປະເພດ ຈໍານວນ 4 ຄະນະພັກຮາກຖານ ເນື່ອງຈາກເປັນຄະນະພັກຮາກຖານສ້າງຕັ້ງໃໝ່.

ສຳລັບຂັ້ນຕອນການກໍ່ສ້າງພັກ, ຄະນະພັກກອງບັນຊາການ ໄດ້ເອົາໃຈໃສ່ເຮັດວຽກງານກໍ່ສ້າງພັກ ໂດຍຖືເອົາວຽກງານສຶກສາອົບຮົມການເມືອງແນວຄິດ ໃຫ້ແກ່ສະມາຊິກພັກ-ພະນັກງານ ດ້ວຍຫຼາຍຮູບການ ແລະ ຫຼາຍວິທີການ ເພື່ອໃຫ້ເຂົາເຈົ້າເຊື່ອມຊຶມກໍາແໜ້ນຕໍ່ແນວທາງນະໂຍບາຍຂອງພັກ, ລະບຽບກົດໝາຍຂອງລັດ. ນອກນັ້ນ, ຍັງໄດ້ຈັດຕັ້ງເຊື່ອມຊຶມເອກະສານສໍາຄັນຂອງພັກ ພ້ອມທັງຊຸກຍູ້ອົງການຈັດຕັ້ງມະຫາຊົນ ເຄື່ອນໄຫວຕາມພາລະບົດບາດ, ຂອບເຂດສິດ ແລະ ໜ້າທີ່ ເພື່ອເປັນພື້ນຖານໃຫ້ແກ່ການກໍ່ສ້າງໜ່ວຍພັກປອດໃສ ເຂັ້ມແຂງ ໜັກແໜ້ນ.