ໃນວັນທີ 4 ສິງຫາ 2022, ກະຊວງ ປກສ ໄດ້ຈັດພິທີປະກາດຍົກຍ້າຍ-ແຕ່ງຕັ້ງ ຫົວໜ້າ ປກສ ນະຄອນຫຼວງວຽງຈັນ, ເປັນປະທານໂດຍ ພົອ ວິໄລ ຫຼ້າຄໍາຟອງ ຮອງນາຍົກລັດຖະມົນຕີ, ລັດຖະມົນຕີ ກະຊວງ ປກສ, ມີແຂກຮັບເຊີນຈາກປົກຄອງນະຄອນຫຼວງວຽງຈັນ, ການນຳກະຊວງ, ຫ້ອງວ່າການ, ກົມໃຫຍ່ ພ້ອມດ້ວຍກົມກອງອ້ອມຂ້າງ ກະຊວງ ຕະຫຼອດຮອດພະນັກງານອ້ອມຂ້າງ ປກສ ນະຄອນຫຼວງວຽງຈັນ ເຂົ້າຮ່ວມ.

ໃນພິທີ, ພົຈວ ຄອນສະຫວັນ ສົມພາໄຊ ຮອງຫົວໜ້າກົມໃຫຍ່ການເມືອງ ປກສ ໄດ້ຜ່ານຄໍາສັ່ງຂອງ ນາຍົກລັດຖະມົນຕີ ສະບັບເລກທີ 11/ນຍ, ລົງວັນທີ 2 ສິງຫາ 2022 ວ່າດ້ວຍ ການຍົກຍ້າຍນາຍຕໍາຫຼວດໄປຮັບໜ້າທີ່ໃໝ່ ດັ່ງນີ້:

  • ພັອ ສຸກພະຈັນ ບຸດດາຄໍາ ຫົວໜ້າກອງບັນຊາການ ປກສ ນະຄອນຫຼວງວຽງຈັນ (ຜູ້ເກົ່າ) ໄປຮັບໜ້າທີ່ໃໝ່ຢູ່ ກົມໃຫຍ່ຕໍາຫຼວດ ກະຊວງ ປກສ

ພ້ອມທັງຜ່ານດໍາລັດ 220/ນຍ, ລົງວັນທີ 2 ສິງຫາ 2022 ວ່າດ້ວຍ ການແຕ່ງຕັ້ງຫົວໜ້າກອງບັນຊາການປ້ອງກັນຄວາມສະຫງົບ ນະຄອນຫຼວງວຽງຈັນ ໂດຍໄດ້ແຕ່ງຕັ້ງ:

  • ພັອ ປອ ບົວພັນ ຟອງມະນີ ຮອງຫົວໜ້າກົມໃຫຍ່ຕໍາຫຼວດ ຫົວໜ້າກົມຕຳຫຼວດສະກັດກັ້ນ ແລະ ຕ້ານຢາເສບຕິດ ກະຊວງ ປກສ ເປັນ ຫົວໜ້າກອງບັນຊາການ ປກສ ນະຄອນຫຼວງວຽງຈັນ (ຜູ້ໃໝ່)

ໂອກາດດັ່ງກ່າວ, ພົອ ວິໄລ ຫຼ້າຄໍາຟອງ ໄດ້ໂອ້ລົມວ່າ:

ການແຕ່ງຕັ້ງຫົວໜ້າກອງບັນຊາການຜູ້ໃໝ່ ແມ່ນການປັບປຸງການຈັດຕັ້ງ, ບູລະນະບຸກຄະລາກອນ ໃຫ້ຄົບຖ້ວນຕາມຫຼັກການ; ເຊິ່ງການແຕ່ງຕັ້ງຄັ້ງນີ້ ເປັນການຕອບສະໜອງຕາມຄວາມຮຽກຮ້ອງຕ້ອງການຂອງໜ້າທີ່ການເມືອງ ແລະ ທັງເປັນການມອບໝາຍໜ້າທີ່ຈາກຂັ້ນເທິງ, ພ້ອມທັງເນັ້ນສະຫາຍທີ່ໄດ້ຮັບການແຕ່ງຕັ້ງ ໃຫ້ເຂົ້າໃຈວ່າ ແມ່ນການມອບໝາຍໜ້າທີ່, ຕ້ອງໄດ້ສືບຕໍ່ເຮັດເປັນໝູ່ຄະນະ ແລະ ເຕົ້າໂຮມຄວາມສາມັກຄີພາຍໃນໃຫ້ມີຄວາມສະຫງົບ, ສາມາດປະຕິບັດໜ້າທີ່ການເມືອງຂອງຕົນ ໃຫ້ໄດ້ຮັບຜົນສຳເລັດ, ຜູ້ທີ່ມາຮັບໜ້າທີ່ໃໝ່ ຈະຕ້ອງແກ້ໄຂຫຼາຍບັນຫາ ໂດຍສະເພາະ ສະພາບປະກົດການຫຍໍ້ທໍ້ໃນນະຄອນຫຼວງວຽງຈັນ ໃຫ້ຫຼຸດໜ້ອຍຖອຍລົງ.