ໃນໄລຍະຜ່ານມາ, ສະຫະພັນແມ່ຍິງ ກົມໃຫຍ່ການເມືອງ ກະຊວງ ປກສ ໄດ້ເອົາໃຈໃສ່ຢ່າງເປັນຂະບວນຟົດຟື້ນ ໃນການນໍາພາບັນດາສະມາຊິກແມ່ຍິງ ຈັດຕັ້ງປະຕິບັດວຽກງານວິຊາສະເພາະຢ່າງຕັ້ງໜ້າ ຕິດພັນກັບ ການປະຕິບັດຂໍ້ແຂ່ງຂັນ 3 ດີ ສາມາດຕີລາຄາບຸກຄົນ 3 ດີ ປະເພດ I ຈໍານວນ 585 ສະຫາຍ ເທົ່າກັບ 98% ໃນຈຳນວນສະມາຊິກແມ່ຍິງທັງໝົດ 598 ສະຫາຍ.

ໃນພິທີສະເຫຼີມສະຫຼອງ ວັນສ້າງຕັ້ງສະຫະພັນແມ່ຍິງລາວ ຄົບຮອບ 67 ປີ (20 ກໍລະກົດ 1955-20 ກໍລະກົດ 2022) ຄັ້ງວັນທີ 4 ສິງຫາ 2022, ໂດຍການເຂົ້າຮ່ວມເປັນປະທານຂອງ ພົຈວ ຄໍາສາຍ ຈັນທະວົງ ຮອງຫົວໜ້າກົມໃຫຍ່ການເມືອງ ປກສ, ມີ ພັອ ນາງ ຈັນເດືອນ ເທພະວົງ ປະທານສະຫະພັນແມ່ຍິງ ກົມໃຫຍ່ການເມືອງ ປກສ ພ້ອມດ້ວຍພາກສ່ວນທີ່ກ່ຽວຂ້ອງ ແລະ ແຂກຮັບເຊີນ ເຂົ້າຮ່ວມ, ພັທ ນາງ ລີວອນ ລາວລີ ຮອງປະທານສະຫະພັນແມ່ຍິງ ກົມໃຫຍ່ການເມືອງ ປກສ ໃຫ້ຮູ້ວ່າ:

ໃນ 6 ເດືອນຕົ້ນປີ 2022, ສະຫະພັນແມ່ຍິງ ກົມໃຫຍ່ການເມືອງ ໄດ້ນໍາພາສະມາຊິກຈັດຕັ້ງປະຕິບັດວຽກງານວິຊາສະເພາະ ດ້ວຍຄວາມຮັບຜິດຊອບ ແລະ ຫ້າວຫັນ ຕິດພັນກັບ ການຈັດຕັ້ງປະຕິບັດເນື້ອໃນຂໍ້ແຂ່ງຂັນ 3 ດີ ທີ່ສູນກາງສະຫະພັນແມ່ຍິງລາວ ວາງອອກ ແລະ ຕາມການຊີ້ນໍາຂອງສະຫະພັນແມ່ຍິງ ກະຊວງ ປກສ ໃນແຕ່ລະໄລຍະ ມາເປັນເນື້ອໃນສໍາຫຼວດກວດກາປະຈຳເດືອນ, ປະຈຳໄຕມາດ, ປະຈຳປີ ແລະ ສະຫຼຸບຕີລາຄາຈັດແບ່ງປະເພດສະມາຊິກແມ່ຍິງ 3 ດີ ໃນ 6 ເດືອນຜ່ານມາ ດັ່ງນີ້:

  • ສາມາດຄັດເລືອກໄດ້ພົນລະເມືອງດີ 587 ສະຫາຍ, ພັດທະນາດີ 566 ສະຫາຍ ແລະ ສ້າງຄອບຄົວດີ 585 ສະຫາຍ;
  • ຄັດເລືອກບຸກຄົນ 3 ດີ ປະເພດ I ໄດ້ 585 ສະຫາຍ ເທົ່າກັບ 98% ແລະ ປະເພດ II ມີ 9 ສະຫາຍ ເທົ່າກັບ 2%;
  • ຕົວແບບດ້ານວິຊາສະເພາະ 2 ສະຫາຍ ແລະ ຕົວແບບດ້ານເສດຖະກິດມີ 3 ສະຫາຍ;
  • ໜ່ວຍສະຫະພັນແມ່ຍິງ 3 ສະຫາຍ, ປະເພດ I ມີ 15 ໜ່ວຍ ແລະ ປະເພດ II ມີ 1 ໜ່ວຍ. 

ຕອນທ້າຍພິທີ ຍັງໄດ້ມອບໃບຍ້ອງຍໍໃຫ້ ໜ່ວຍສະຫະພັນແມ່ຍິງ 3 ດີ ຈໍານວນ 14 ໜ່ວຍ ແລະ ບຸກຄົນ 3 ດີ ປະເພດ I ແລະ ມອບໃບຊົມເຊີຍບຸກຄົນ 3 ດີ ປະເພດ II ໃຫ້ສະມາຊິກແມ່ຍິງທີ່ມີຜົນງານໃນການການເຄື່ອນໄຫວວຽກງານແມ່ຍິງ ຕະຫຼອດໄລຍະຜ່ານມາ.

ໂດຍໃນໂອກາດນີ້ ຍັງໄດ້ຮັບຊົມການສະແດງສິລະປະຈາກ ກອງສິລະປະກອນ ປກສ ນຳອີກ.