ວິທະຍາຄານສັນຕິບານປະຊາຊົນ (ວສປ) ກະຊວງ ປກສ ໄດ້ຈັດກອງປະຊຸມສະຫຼຸບການເຄື່ອນໄຫວວຽກງານ 6 ເດືອນຕົ້ນປີ ແລະ ວາງທິດທາງແຜນການວຽກງານທ້າຍປີ 2022 ໃນວັນທີ 4 ສິງຫາ ຜ່ານມາ, ເປັນປະທານໂດຍ ພົຈວ ປອ ວັນສົມ ສີສົມບັດ ຫົວໜ້າອໍານວຍການ ວສປ, ມີຮອງຫົວໜ້າອໍານວຍການ, ຄະນະອໍານວຍການ ພ້ອມດ້ວຍຄູ-ອາຈານ, ຕາງໜ້າກົມ-ກອງ, ພະນັກງານ-ນັກຮົບ ແລະ ນັກສຶກສາ ເຂົ້າຮ່ວມ.

ພັອ ເຫວີຍສຸກ ພົມມະຈັນ ຫົວໜ້າຫ້ອງການ ວສປ ຜ່ານຮ່າງບົດສະຫຼຸບວ່າ:

ໃນ 6 ເດືອນຜ່ານມາ, ຄະນະພັກ-ຄະນະອໍານວຍການ ຕະຫຼອດຮອດຄະນະບັນຊາແຕ່ລະຂັ້ນ ໄດ້ເອົາໃຈໃສ່ປັບປຸງຫຼັກສູດການຮຽນ-ການສອນ ໃຫ້ແທດເໝາະກັບວຽກງານວິຊາສະເພາະ ໃນແຕ່ລະໄລຍະ ເຊິ່ງໄປຄຽງຄູ່ກັບ ການຄົ້ນຄວ້າຕໍາລາຮຽນ, ແຕ່ງ-ແປ ແລະ ກວດແກ້-ຮຽບຮຽງບົດສອນ ໂດຍປະສານສົມທົບກັບບັນດາກົມກອງວິຊາສະເພາະ, ກົມກອງທ້ອງຖິ່ນ ແລະ ມີການແລກປ່ຽນດ້ານທິດສະດີ, ຂໍ້ມູນພຶດຕິກໍາຕົວຈິງ ເພື່ອເປັນແນວທາງ ໃນການປັບປຸງພັດທະນາບົດສອນໃຫ້ມີບາດກ້າວອັນໃໝ່ ແລະ ຖືກຕ້ອງຕາມສະພາບຕົວຈິງໃນປັດຈຸບັນ. 

ໃນ 6 ເດືອນຕົ້ນປີ 2022, ຄູ-ອາຈານ ໄດ້ເຄື່ອນໄຫວຂຶ້ນຫ້ອງສິດສອນ ນັກສຶກສາທຸກຮຸ່ນ-ທຸກລະບົບ ໄດ້ 4.339 ຊົ່ວໂມງ, ເປັນກໍາມະການປ້ອງກັນບົດຂັ້ນວິຊາການຂອງ ນັກສຶກສາປະລິນຍາໂທ ຮຸ່ນທີ 12 ໄດ້ 6 ຄັ້ງ, ປັບປຸງບົດສອນ ໄດ້ 20 ບົດ, ນໍາພານັກສຶກສາໄປທັດສະນະ 1 ຄັ້ງ, ຝຶກອົບຮົມຄູ 1 ຄັ້ງ, ເຂົ້າຮ່ວມຝືກອົບຮົມວຽກງານວິຊາສະເພາະ ກັບ ກົມໃຫຍ່ 502, ກົມຕໍາຫຼວດກວດຄົນເຂົ້າ-ອອກເມືອງ, ວິທະຍາຄານຕໍາຫຼວດປະຊາຊົນ ສສ ຫວຽດນາມ; ຄຽງຄູ່ກັນນັ້ນ, ຍັງໄດ້ປັບປຸງລະບຽບວິໄນ, ແຜນການເຄື່ອນໄຫວຂອງຄູ-ອາຈານ, ນັກສຶກສາ, ປຶ້ມຕໍາລາຮຽນ ໂດຍອີງໃສ່ 5 ຫຼັກມູນ ທີ່ກະຊວງສຶກສາທິການ ແລະ ກິລາ ວາງອອກ ແລະ ແນວທາງນະໂຍບາຍ, ມະຕິ, ຄໍາສັ່ງ, ຂໍ້ກໍານົດ, ກົດລະບຽບ, ກົດໝາຍຂອງ ກະຊວງປ້ອງກັນຄວາມສະຫງົບ ເປັນຫຼັກ.

ສໍາລັບທິດທາງແຜນການ 6 ເດືອນທ້າຍປີ 2022, ຄະນະພັກ-ຄະນະອໍານວຍການ ຈະເອົາໃຈໃສ່ປົກປັກຮັກສາ ວິທະຍາຄານສັນຕິບານປະຊາຊົນ ໃຫ້ມີຄວາມສະຫງົບປອດໄພ, ສຶກສາອົບຮົມການເມືອງ-ແນວຄິດໃຫ້ພະນັກງານ, ຄູ-ອາຈານ, ປັບປຸງກໍ່ສ້າງກໍາລັງປ້ອງກັນຄວາມສະຫງົບຕາມຫຼັກສູດທີ່ໄດ້ກໍານົດໄວ້, ຕັ້ງໜ້າຝຶກແອບຮໍ່າຮຽນ, ຖືເອົາການຝືກຝົນຫຼ່ໍຫຼອມທາງດ້ານຄຸນທາດການເມືອງ, ຄຸນສົມບັດສິນທໍາປະຕິວັດ, ການປະຕິບັດລະບຽບວິໄນຂອງວິທະຍາຄານ, ສືບຕໍ່ຮັດແໜ້ນການພົວພັນກັບ ບັນດາກົມກອງວິຊາສະເພາະ ອ້ອມຂ້າງ ກະຊວງ, ກອງບັນຊາການ ປກສ ແຂວງ ເພື່ອແລກປ່ຽນບົດຮຽນຮ່ວມກັນ.