ໃນວັນທີ 4 ສິງຫາ 2022, ພົຈວ ສະແຫວງ ພົມມະລີ ຄະນະພັກກະຊວງ ຫົວໜ້າກົມຄົ້ນຄວ້າວິທະຍາສາດ ແລະ ປະຫວັດສາດ ປກສ ໄດ້ຖະແຫຼງຂ່າວການກະກຽມສະເຫຼີມສະຫຼອງ ວັນສ້າງຕັ້ງກໍາລັງຄົ້ນຄວ້າວິທະຍາສາດ ແລະ ປະຫວັດສາດ ປກສ ຄົບຮອບ 20 ປີ (9 ສິງຫາ 2002-9 ສິງຫາ 2022) ເພື່ອກຽມພ້ອມພິທີສະເຫຼີມສະຫຼອງວັນດັ່ງກ່າວ ໃຫ້ເປັນຂະບວນຟົດຟື້ນ.

ສໍາລັບການກະກຽມສະຫຼອງ ວັນສ້າງຕັ້ງກໍາລັງຄົ້ນຄວ້າວິທະຍາສາດ ແລະ ປະຫວັດສາດ ປກສ ຄົບຮອບ 20 ປີ, ໂດຍລວມແລ້ວ ຄະນະຮັບຜິດຊອບໄດ້ກະກຽມ ແລະ ຈັດຕັ້ງປະຕິບັດສໍາເລັດຫຼາຍກິດຈະກໍາທີ່ຕິດພັນກັບວຽກງານ ແລະ ເນື້ອໃນສະເຫຼີມສະຫຼອງ ເປັນຕົ້ນແມ່ນ:

ການດໍາເນີນຊີວິດການເມືອງ ໂດຍຕິດພັນກັບ ການປັບປຸງກົງຈັກການຈັດຕັ້ງ ທີ່ຂຶ້ນກັບກົມ, ຂະບວນການເຄື່ອນໄຫວວິຊາສະເພາະ, ການລົງຢ້ຽມຢາມ ແລະ ສໍາພາດອະດີດການນໍາກົມຈໍານວນໜຶ່ງ, ຈັດຕັ້ງປາຖະກະຖາຫວນຄືນມູນເຊື້ອ, ແຂ່ງຂັນກິລາຢູ່ພາຍໃນກົມ ແລະ ປະດັບປະດາບໍລິເວນກົມ ກໍຄື ຫໍພິພິທະພັນ ປກສ ໃຫ້ມີຄວາມສະອາດຈົບງາມ.

ປັດຈຸບັນ, ຖືວ່າຍັງພຽງບາງກິດຈະກໍາທີ່ຈະສືບຕໍ່ຈັດຕັ້ງປະຕິບັດ ເຊິ່ງແຕ່ນີ້ຮອດວັນສ້າງຕັ້ງກໍາລັງດັ່ງກ່າວຈະໃຫ້ສໍາເລັດຕາມຈຸດປະສົງ ແລະ ຄາດໝາຍທີ່ວາງໄວ້ ໂດຍສະເພາະແມ່ນ ການດໍາເນີນການໂຮມຊຸມນຸມສະເຫຼີມສະຫຼອງ 20 ປີ; ມາຮອດປັດຈຸບັນ, ການກະກຽມດ້ານຕ່າງໆ ແມ່ນມີຄວາມພ້ອມ ຮອບດ້ານ. ສະນັ້ນ, ຈຶ່ງແຈ້ງເປັນທາງການຜ່ານການຖະແຫຼງຂ່າວຄັ້ງນີ້ ເພື່ອໃຫ້ທຸກພາກສ່ວນ ແລະ ທົ່ວສັງຄົມໄດ້ຮັບຊາບ.

ທ່ານຫົວໜ້າກົມຄົ້ນຄວ້າວິທະຍາສາດ ແລະ ປະຫວັດສາດ ປກສ ຮູ້ສຶກພາກພູມໃຈທີ່ມີວັນທີ 9 ສິງຫາ ເຊິ່ງແມ່ນວັນກໍາເນີດແຫ່ງການສ້າງຕັ້ງກໍາລັງຄົ້ນຄວ້າວິທະຍາສາດ ແລະ ປະຫວັດສາດ ປກສ ໂດຍ ລັດຖະມົນຕີ ກະຊວງປ້ອງກັນຄວາມສະຫງົບ ໄດ້ອອກຂໍ້ຕົກລົງ ວ່າດ້ວຍ ການຮັບຮອງເອົາວັນທີ 9 ສິງຫາ 2002 ເປັນວັນສ້າງຕັ້ງກໍາລັງຄົ້ນຄວ້າວິທະຍາສາດ ແລະ ປະຫວັດສາດ ປກສ ເລກທີ 015/ປກສ, ລົງວັນທີ 4 ມັງກອນ 2012 ແລະ ຮອດວັນທີ 9 ສິງຫາ 2022 ນີ້ແມ່ນຄົບຮອບ 20 ປີພໍດີ.

ສະນັ້ນ, ເພື່ອເປັນການຫວນຄືນມູນເຊື້ອອັນສະຫງ່າງາມຂອງ ກໍາລັງຄົ້ນຄວ້າວິທະຍາສາດ ແລະ ປະຫວັດສາດ ປກສ ໂດຍສັງເຂບ ເຊິ່ງຕິດພັນກັບ ການກໍາເນີດເຕີບໃຫຍ່ຂະຫຍາຍຕົວຂອງກໍາລັງດັ່ງກ່າວ ໃນໄລຍະຜ່ານມາ ຄື: ເພື່ອຕອບສະໜອງຄວາມຮຽກຮ້ອງຕ້ອງການຂອງໜ້າທີ່ການເມືອງ ໃນໄລຍະໃໝ່, ເຊິ່ງໃນໄລຍະປີ 1994 ຄະນະພັກ-ຄະນະນໍາ ກະຊວງພາຍໃນ ໄດ້ຕົກລົງສ້າງຕັ້ງ “ສູນຄົ້ນຄວ້າວິທະຍາສາດ” ຂຶ້ນກັບ ກົມໃຫຍ່ກໍ່ສ້າງກໍາລັງ ມີຖານະທຽບເທົ່າກັບບັນດາກົມທີ່ຂຶ້ນກັບກົມໃຫຍ່ ເຊິ່ງມີພາລະບົດບາດໜ້າທີ່ໃນການຄົ້ນຄວ້າປະຫວັດມູນເຊື້ອ ແລະ ຄົ້ນຄວ້າວິທະຍາສາດວິຊາສະເພາະຂອງກໍາລັງ.

ມາເຖິງປັດຈຸບັນ, ກະຊວງ ປກສ ໄດ້ຕົກລົງອະນຸມັດປັບປຸງກົງຈັກການຈັດຕັ້ງຂອງ ກົມຄົ້ນຄວ້າວິທະຍາສາດ ແລະ ປະຫວັດສາດ ປກສ ໃຫ້ສອດຄ່ອງກັບຄວາມຮຽກຮ້ອງຕ້ອງການຂອງວຽກງານໃນໄລຍະໃໝ່ ຕາມຂໍ້ຕົກລົງເລກທີ 564/ປກສ, ລົງວັນທີ 7 ເມສາ 2022 ເຊິ່ງໂຄງປະກອບກົງຈັກການຈັດຕັ້ງຂັ້ນພະແນກ ຍັງຮັກສາໄວ້ຄືເກົ່າ (1 ຫ້ອງ, 6 ພະແນກ ແລະ ຫໍພິພິທະພັນ ປກສ ຂຶ້ນກັບກົມ), ແຕ່ຂັ້ນໜ່ວຍງານແມ່ນເພີ່ມຂຶ້ນອີກ 4 ໜ່ວຍງານ ລວມມີ 29 ໜ່ວຍງານ ຂຶ້ນກັບພະແນກ.