ໃນວັນທີ 4 ສິງຫາ 2022, ພົທ ກົງທອງ ພົງວິຈິດ ຮອງລັດຖະມົນຕີກະຊວງ ປກສ ພ້ອມດ້ວຍຄະນະນຳກົມໃຫຍ່ພະລາທິການ, ກອງບັນຊາການ ປກສ ແຂວງໄຊສົມບູນ ໄດ້ເຄື່ອນໄຫວຕິດຕາມ-ຊຸກຍູ້ ແລະ ໃຫ້ທິດຊີ້ນຳພະນັກງານນຳພາ-ບັນຊາ, ນາຍ ແລະ ພົນຕຳຫຼວດ ທີ່ຮັບຜິດຊອບສູນການຜະລິດກະສິກຳດອນກໍມີ້ ບ້ານນໍ້າຍອນ ເມືອງອານຸວົງ ແຂວງໄຊສົມບູນ.

ພົຈວ ໜູຈອນ ກ້ອນທອງດຳ ຮອງຫົວໜ້າກົມໃຫຍ່ພະລາທິການ ປກສ ໄດ້ລາຍງານກ່ຽວກັບການພັດທະນາສູນການຜະລິດກະ ສິກຳດອນກໍມີ້, ມີເນື້ອທີ່ທັງໝົດ 480 ເຮັກຕາ, ເປັນດອນກາງນໍ້າ, ເປັນເນີນຊັນ-ສະຫຼັບຊັບຊ້ອນ, ມີປ່າໄມ້ນ້ອຍປົກຫຸ້ມ ແລະ ຢູ່ຫ່າງໄກຈາກຊຸມຊົນ. ເນື່ອງໃນໂອ ກາດຈັດຕັ້ງປະຕິບັດວາລະແຫ່ງຊາດ ວ່າດ້ວຍການແກ້ໄຂບັນຫາຢາເສບ ຕິດ ປີ 2021-2023 ການນຳ ແຂວງໄຊສົມບູນ ໄດ້ຕົກລົງມອບດອນກໍມີ້ ໃຫ້ກະຊວງປ້ອງກັນຄວາມສະຫງົບ ເພື່ອນຳໃຊ້ເຂົ້າໃນການສ້າງສູນບຳບັດຜູ້ຕິດຢາເສບຕິດ ແລະ ສ້າງເປັນສູນກະສິກຳຕົວແບບຂອງກຳລັງປ້ອງກັນ ຄວາມສະຫງົບ. ດັ່ງນັ້ນ, ຄະນະພັກ-ຄະນະບັນຊາກະຊວງປ້ອງກັນຄວາມສະຫງົບ ຈຶ່ງໄດ້ຊີ້ນຳ ໃຫ້ກົມໃຫຍ່ພະລາທິການສົມທົບກັບກອງບັນຊາການ ປກສ ແຂວງໄຊສົມບູນ ພັດທະນາດອນດັ່ງກ່າວເຮັດການຜະລິດກະສິກໍາ ດ້ວຍການປູກຝັງ-ລ້ຽງສັດ ຄື: ລ້ຽງງົວ, ຄວາຍ, ແບ້, ໝູ, ປາ, ປູກຫຍ້າ, ປູກຕົ້ນໄມ້ໃຫ້ໝາກ, ຕົ້ນໄມ້ອຸດສາຫະກໍາ ແລະອື່ນໆ ເພື່ອເປັນການສ້າງພະລາທິການກັບທີ່ຕາມທິດເພິ່ງຕົນເອງ, ກຸ້ມຕົນເອງ ແລະ ສ້າງຄວາມເຂັ້ມແຂງດ້ວຍຕົນເອງ.

ນັບຕັ້ງແຕ່ລົງຈັດຕັ້ງປະຕິບັດບຸກເບີກດອນກໍມີ້ ໃນເດືອນຕຸລາ 2021 ມາເຖິງປັດຈຸບັນ ໄດ້ສໍາເລັດການກໍ່ສ້າງເຮືອນພັກພະນັກງານຂະໜາດ 7×20 ແມັດ 1 ຫຼັງ ສາມາດບັນຈຸພະນັກງານເຂົ້ານອນໄດ້ 27 ຄົນ, ສ້າງເຮືອນໃຫ້ພາກສ່ວນດັດສ້າງ 2 ຫຼັງຂະໜາດ 6×8 ແມັດ ແລະ 4×8 ແມັດ ສາມາດບັນຈຸໄດ້ 40 ຄົນ, ສ້າງ ເຮືອນຄົວລວມພະນັກງານໄດ້ 1 ຫຼັງ ຂະໜາດ 3×7 ແມັດ, ສ້າງສາງເກັບມ້ຽນເຄື່ອງ 1 ຫຼັງ ຂະໜາດ 2×3 ແມັດ, ສ້າງຫ້ອງນ້ໍາ 1 ຫຼັງ ຂະໜາດ 4X8 ແມັດ ມີ 4 ຫ້ອງ, ສ້າງຄອກງົວ-ຄວາຍ 3 ຫຼັງ ຂະໜາດ 6X28 ແມັດ 2 ຫຼັງ, ຂະໜາດ 6×20 ແມັດ 1 ຫຼັງ, ສ້າງຮ້ານເຟືອງ ຂະໜາດ 3×4 ແມັດ 3 ຫຼັງ, ເຮັດຮົ້ວລັດງົວ-ຄວາຍໄດ້ 1.500 ແມັດ ແລະ ເຮັດຮົ້ວອ້ອມຫໍພັກ 80 ແມັດ, ສໍາເລັດການບຸກເບີກການປູກຫຍ້າ 27 ເຮັກຕາ ປູກແລ້ວ 23 ເຮັກຕາ ແບ່ງເປັນ 3 ຈຸດໃຫຍ່, ສໍາເລັດການບຸກເບີກເນື້ອທີ່ປູກເຂົ້າ 2 ເຮັກຕາ, ເຮັດຮົ້ວອ້ອມຫໍພັກ 80 ແມັດ.

ໃນໂອກາດດັ່ງກ່າວ, ພົທ ກົງທອງ ພົງວິຈິດ ໄດ້ໃຫ້ທິດຊີ້ນຳ ແກ່ຄະນະຮັບຜິດຊອບແຕ່ລະຂັ້ນ ສືບຕໍ່ສ້າງບົດໂຄງການຢ່າງລະອຽດ ມີການການກຳນົດແຜນວຽກ, ແຜນຄົນ, ແຜນງົບປະມານມີຂັ້ນຕອນຈັດຕັ້ງປະຕິບັດ, ມີການກວດກາ, ການປະເມີນຜົນ, ຖອດຖອນບົດຮຽນ ແລະ ປັບປຸງແກ້ໄຂໃຫ້ດີຂຶ້ນເລື້ອຍໆ. ນອກຈາກໂຄງການກະສິກຳ ແລ້ວຕ້ອງວາງແຜນເຖິງວຽກງານບໍລິການ, ການທ່ອງທ່ຽວ ຕິດພັນກັບການອະນຸລັກສິ່ງແວດລ້ອມແບບຢືນຍົງ. ນອກນັ້ນ, ທ່ານ ຍັງໄດ້ມອບອາຫານແຫ້ງ, ນໍ້າດື່ມ ແລະອື່ນໆ ຈຳນວນໜຶ່ງໃຫ້ນາຍ ແລະ ພົນຕຳຫຼວດທີ່ກຳລັງປະຕິບັດໜ້າທີ່ຢູ່ດອນດັ່ງກ່າວ ນຳໃຊ້ເຂົ້າໃນການດຳລົງຊີວິດ.