ໃນວັນທີ 6 ທັນວາ 2022, ສະພາວິທະຍາສາດ ວິທະຍາຄານຕໍາຫຼວດປະຊາຊົນ (ວຕປ) ໄດ້ຈັດພິທີປ້ອງກັນບົດລາຍງານໂຄງການຈົບຊັ້ນ ໃຫ້ນັກສຶກສາປະລິນຍາຕີ ຮຸ່ນທີ 23, ເປັນປະທານໂດຍ ພົຈວ ປອ ວົງເຊໂດນ ພັນທະແກ້ວ ຫົວໜ້າອໍານວຍການ ວຕປ, ມີຜູ້ສັງເກດການ ພ້ອມດ້ວຍອາຈານທີ່ປຶກສາ ແລະ ນັກສຶກສາ ຮຸ່ນທີ 23 ເຂົ້າຮ່ວມ.
ພົຈວ ປອ ວົງເຊໂດນ ພັນທະແກ້ວ ກ່າວວ່າ:
ນັກສຶກສາປະລິນຍາຕີ ຮຸ່ນທີ 23 ມີຈໍານວນ 282 ສະຫາຍ ຍິງ 51 ສະຫາຍ, ເຊິ່ງເລີ່ມເຂົ້າມາສຶກສາຢູ່ວິທະຍາຄານຕໍາຫຼວດປະຊາຊົນ ແຕ່ປີ 2019-2022 ເປັນເວລາ 4 ປີ ຈຶ່ງສໍາເລັດ, ໂດຍມີທັງໝົດ 8 ຂະແໜງຮຽນ ຄື:
- ຂະແໜງສືບສວນ-ສອບສວນ
- ຂະແໜງສະກັດກັ້ນ-ຕ້ານຢາເສບຕິດ
- ຂະແໜງສໍາມະໂນຄົວ ແລະ ກໍ່ສ້າງຮາກຖານ
- ຂະແໜງສືບຂ່າວອາຍາ
- ຂະແໜງປ້ອງກັນເສດຖະກິດ
- ຂະແໜງຄຸມຂັງ-ດັດສ້າງ
- ຂະແໜງນິຕິວິທະຍາ
- ຂະແໜງຈະລາຈອນ
ຜ່ານວັດການສຶກສາ ໃນໄລຍະ 4 ປີ ສາມາດສັງລວມນັກສຶກສາທີ່ຄົບມາດຖານເງື່ອນໄຂໃນການປ້ອງກັນບົດລາຍງານໂຄງການຈົບຊັ້ນ ໄດ້ທັງໝົດ 39 ສະຫາຍ ຍິງ 6 ສະຫາຍ ໂດຍຈະເລີ່ມປ້ອງກັນ ນັບແຕ່ວັນທີ 6-22 ທັນວານີ້.
ສໍາລັບການປ້ອງກັນບົດໃນຕອນເຊົ້າຂອງວັນທີ 6 ທັນວາ ມີ 2 ຫົວຂໍ້ ຄື:
- ການສືບສວນ-ສອບສວນຄະດີຢາເສບຕິດ ຢູ່ເມືອງນາຊາຍທອງ ນະຄອນຫຼວງວຽງຈັນ, ຂຽນໂດຍ ຮອ ເລໄລ ຜານິໄທ
- ຍົກສູງວຽກງານຊັນນະສູດສະຖານທີ່ເກີດເຫດ ຄະດີລັກຊັບ ຢູ່ເມືອງປາກຊັນ ແຂວງບໍລິຄໍາໄຊ, ຂຽນໂດຍ ຮທ ພູເພັດ ໄຊຍະວົງສີ
