ກອງບັນຊາການ ປກສ ເມືອງໄຊທານີ ນະຄອນຫຼວງວຽງຈັນ ລົງມ້າງຄະດີຢາເສບຕິດ ສາມາດຈັບເປົ້າໝາຍໄດ້ທັງໝົດ 5 ຄົນ ພ້ອມຂອງກາງຢາບ້າ 70 ພັນກວ່າເມັດ ແລະ ລົດໃຫຍ່ 1 ຄັນ, ລົດຈັກ 5 ຄັນ, ເງິນກີບ 48.500.000 ກີບ ແລະ ເຄື່ອງຂອງກາງອື່ນໆອີກຈໍານວນໜຶ່ງ.

ພັທ ສຸລິວັນ ແກ້ວມະນີວົງ ຮອງຫົວໜ້າກອງບັນຊາການ ປກສ ເມືອງໄຊທານີ ໃຫ້ສໍາພາດໃນວັນທີ 9 ສິງຫາ 2022 ວ່າ:

ໃນວັນທີ 25 ກໍລະກົດ 2022, ເວລາປະມານ 14:00 ໂມງ ເຈົ້າໜ້າທີ່ ປກສ ກຸ່ມສີວິໄລ ເມືອງໄຊທານີ ໄດ້ກັກຕົວເປົ້າໝາຍຢາເສບຕິດໄດ້ 1 ຄົນ ຊື່ ທ້າວ ໂອສາ ອາຍຸ 38 ປີ, ຢູ່ບ້ານຊ້າງຄູ້ ເມືອງໄຊທານີ ພ້ອມຂອງກາງຢາບ້າ 30 ເມັດ ແລະ ໄດ້ຊັດທອດຫາກຸ່ມແກ້ງຂະບວນການດຽວກັນ.

ມາຮອດວັນທີ 28 ກໍລະກົດ, ເຈົ້າໜ້າທີ່ ສາມາດກັກຕົວເປົ້າໝາຍໄດ້ອີກ 4 ຄົນ ຄື:

  • ທ້າວ ສີລິສະຫວັນ ອາຍຸ 36 ປີ ຢູ່ບ້ານສະພັງເມິກ ເມືອງໄຊທານີ ມີຂອງກາງຢາບ້າ 8 ຖົງ ເທົ່າກັບ 1.600 ເມັດ
  • ທ້າວ ບັນດາສັກ ອາຍຸ 34 ປີ ມີຂອງກາງຢາບ້າ 155 ເມັດ
  • ນາງ ສີ ອາຍຸ 38 ປີ ມີຂອງກາງຢາບ້າ 80 ເມັດ
  • ທ້າວ ຊາຍ ອາຍຸ 40 ປີ ມີຂອງກາງຢາບ້າ 36 ມັດ ເທົ່າກັບ 72.000 ເມັດ ທັງ 3 ຄົນ ຢູ່ບ້ານພູຄຳ ເມືອງໄຊທານີ

ຕໍ່ກັບຄະດີດັ່ງກ່າວ, ເຈົ້າໜ້າທີ່ ປກສ ເມືອງໄຊທານີ ກຳລັງເລັ່ງທໍາການສືບສວນ-ສອບສວນຂະຫຍາຍຜົນຫາກຸ່ມແກ້ງຮ່ວມຂະບວນການດຽວກັນ ມາ ດໍາເນີນຄະດີຕາມກົດໝາຍ.