ຂົວຂ້າມຫ້ວຍໝາກແງວ ເມືອງບາຈຽງຈະລີນສຸກ ແຂວງຈຳປາສັກ ໄດ້ຮັບຜົນເສຍຫາຍໜັກຈາກສະພາບນໍ້າຖ້ວມຊຸ ໃນວັນທີ 10 ສິງຫາ 2022, ທ່ານ ວັນໄຊ ສັກບົວວົງ ກຳມະການພັກເມືອງ ຫົວໜ້າຫ້ອງການໂຍທາທິການ ແລະ ຂົນສົ່ງ ເມືອງບາຈຽງຈະເລີນສຸກ ໄດ້ລົງສຳຫຼວດຜົນເສຍຫາຍ ແລະ ໃຫ້ສຳພາດວ່າ: ເນື່ອງຈາກຝົນຕົກໜັກຫຼາຍວັນຕິດຕໍ່ກັນ ໄດ້ເກີດມີສະພາບນໍ້າຖ້ວມ, ນໍ້າແຕກແກ່ງ ແລະ ໄຫຼຊຸແຮງລົ້ນຫ້ວຍ ຢູ່ບ້ານຫ້ວຍໝາກແງວ ເມືອງບາຈຽງຈະເລີນສຸກ ສົ່ງຜົນເຮັດໃຫ້ຂົວຂ້າມຫ້ວຍຖືກນໍ້າຖ້ວມຊຸເປ່ເພຢ່າງໜັກໜ່ວງ ແລະ ບໍ່ສາມາດໃຊ້ງານໄດ້ ສ້າງຜົນກະທົບຢ່າງໜັກໜ່ວງ ຕໍ່ການສັນຈອນໄປມາຂອງປະຊາຊົນ ລວມເຖິງການຂົນສົ່ ສິນຄ້າກະສິກຳຈາກເມືອງເລົ່າງາມ ແຂວງສາລະວັນ ເຂົ້າມາແຂວງຈຳປາສັກ ຜ່ານເສັ້ນທາງເລກທີ 20 ນີ້ ກໍຖືກຢຸດຊົ່ວຄາວ ເພື່ອລໍຖ້າການສ້ອມແປງຂົວຄືນ.

ປັດຈຸບັນ, ເຈົ້າໜ້າທີ່ກຳລັງ ປກຊ – ປກສ ແລະ ອຳນາດການປົກຄອງເມືອງ, ອຳນາດການປົກຄອງບ້ານ ໄດ້ລົງຊ່ວຍເຫຼືອປະຊາຊົນໃນການຂ້າມຂົວ ໂດຍສະເພາະໃນກໍລະນີສຸກເສີນ ມີຄົນເຈັບປ່ວຍ ເພື່ອໄປປິ່ນປົວຢູ່ໂຮງໝໍ ສ່ວນວ່າການຂົນສົ່ງໂດຍສານ, ສິນຄ້າຕ່າງໆ ຈະທຽວໄດ້ກໍຕໍ່ເມື່ອໄດ້ຮັບການກໍ່ສ້າງສ້ອມແປງຂົວຄືນໃໝ່ ແຕ່ຄາດວ່າຢ່າງໜ້ອຍກໍຈະໃຊ້ເວລາປະມານ 1 ເດືອນ.

ເພື່ອແກ້ໄຂບັນຫາການສັນຈອນທີ່ຈຸດຂົວຂ້າມຫ້ວຍໝາກແງວ ໃຫ້ກັບສູ່ສະພາບປົກຕິໂດຍໄວ, ທາງຫ້ອງການໂຍທາທິການ ແລະ ຂົນສົ່ງເມືອງ ໄດ້ລາຍງານໃຫ້ອົງການປົກຄອງແຂວງ ແລະ ພົວພັນກັບພະແນກ ແລະ ກະຊວງໂຍທາທິການ ແລະ ຂົນສົ່ງ ເພື່ອຊ່ວຍເຫຼືອສ້ອມແປງ – ກໍ່ສ້າງຂົວຄືນໃໝ່ ແລະ ຈາກນີ້ ກໍໄດ້ແຈ້ງໃຫ້ທົ່ວສັງຄົມຮັບຮູ້ ເພື່ອນຳໃຊ້ເສັ້ນທາງອື່ນທົດແທນເປັນການຊົ່ວຄາວ ເປັນຕົ້ນການຂົນສົ່ງໂດຍສານ, ສິນຄ້າຕ່າງໆເຂົ້າມາ ຂໍໃຫ້ຫຼີກລ່ຽງ ແລະ ໄປນຳໃຊ້ເສັ້ນທາງທ່າແຕງ – ປາກຊ່ອງ ຊົ່ວຄາວ ຈົນກ່ວາຂົວຂ້າມຫ້ວຍໝາກແງວ (ທາງເລກ 20 ທີ່ເຊື່ອມຕໍ່ເມືອງເລົ່າງາມ ແຂວງສາລະວັນ ແລະ ເມືອງບາຈຽງຈະເລີນສຸກ ແຂວງຈຳປາສັກ) ຈະກໍ່ສ້າງຄືນໃໝ່ ແລະ ນຳໃຊ້ໄດ້ເປັນປົກກະຕິ.

ຂ່າວ: ດວງໃຈ ຂຸນສັກດາ .