ວັນທີ 30 ມິຖຸນາ – 1 ກໍລະ ກົດ 2022, ເຈົ້າໜ້າທີ່ວິຊາສະເພາະ ປກສ ເມືອງທ່າແຂກ ແຂວງຄຳມ່ວນ ໄດ້ລົງສົມທົບກັບ ປກສ ກຸ່ມນາໂດນ, ເໝືອງບ່າ ເພື່ອລົງຕິດຕາມເປົ້າໝາຍຢາເສບຕິດຢູ່ເຂດບ້ານຄຳບຸ່ນ ເມືອງທ່າແຂກ ສາມາດຈັບເປົ້າໝາຍໄດ້ 5 ຄົນ ພ້ອມຢາບ້າ 3 ມັດ ແລະ 1.177 ເມັດ, ລວມຢາບ້າ 7.177 ເມັດ ໄປດຳເນີນຄະດີ.

ເຈົ້າໜ້າທີ່ຕຳຫຼວດໜ່ວຍງານສະກັດກັ້ນ ແລະ ຕ້ານຢາເສບຕິດ ປກສ ເມືອງທ່າແຂກ ໃຫ້ຮູ້ວ່າ: ຜູ້ຖືກຫາຊື່ ທ້າວ ມາດ ອາຍຸ 23 ປີ ມີຢາບ້າ 89 ເມັດ, ທ້າວ ແກ້ວ ວິໄຊ ຫຼື ທ້າວ ແຫຼມກ໋ອງ ອາຍຸ 28 ປີ ມີຢາບ້າ 53 ເມັດ, ທ້າວ ອົດ ອາຍຸ 43 ປີ ມີຢາບ້າ 936 ມັດ, ທັງສາມຄົນຢູ່ບ້ານຄໍາບຸ່ນ ເມືອງທ່າ ແຂກ ແລະ ນາງ ຄຳເຜືອກ ອາຍຸ 35 ປີ ບ້ານກະສິ ເມືອງເຊບັ້ງໄຟ ແຂວງຄຳມ່ວນ ມີຢາບ້າ 99 ເມັດ. ພວກກ່ຽວຮັບວ່າຢາບ້າຈຳນວນ ທັງໝົດໄດ້ຊື້ມາຂາຍໃຫ້ກັບໄວລຸ້ນ ມົ້ວສຸມ.

ທ້າວ ອົດ ຍັງຮັບສາລະພາບ ຕື່ມວ່າ: ຢາບ້າທີ່ຕົນນຳມາຂາຍ ແມ່ນຊື້ມາຈາກ ທ້າວ ວຽງສະຫວັນ ອາຍຸ 44 ປີ ຢູ່ບ້ານຫ້ວຍໄຮ ເມືອງປາກກະດິງ ແຂວງບໍລິຄຳໄຊ. ຈາກນັ້ນ, ມາຮອດເວລາ 11:30 ໂມງ ຂອງວັນທີ 1 ກໍລະກົດ 2022, ເຈົ້າໜ້າທີ່ ປກສ ເມືອງທ່າແຂກ ຈຶ່ງເຂົ້າກັກຕົວ ທ້າວ ວຽງສະຫວັນ ຢູ່ເສັ້ນທາງເລກທີ 13 ໃຕ້ ເຂດບ້ານໂພນພີມ ເມືອງທ່າແຂກ ພ້ອມຢາບ້າ 6.000 ເມັດ ໄປດຳເນີນຄະດີ.