ວັນທີ 16 ສິງຫາ 2022, ທີ່ຫ້ອງ​ປະ​ຊຸມຫ້ອງການກວດກາ ແລະ ຄວບຄຸມຢາເສບຕິດ, ກົມໃຫຍ່ຕຳຫຼວດ, ກະຊວງກະຊວງ ປກສ ໄດ້ເປີດຝຶກອົບ ຮົມ​ ການ​ນຳໃຊ້​ຢາ​ກາ​ດອກ​ບົວ ຫຼື ຢາ​ບົງ​ແຊນ ໃຫ້​ບັນ​ດາ​ສູນ​ປິ່ນ​ປົວ ແລະ ຟື້ນ​ຟູ​ສຸ​ຂະ​ພາບ​ຜູ້​ຕິດ​ຢາ​ເສບ​ຕິດໂດຍການເປັນປະທານຂອງ ພັອ ອິນປົງ ຈັນທະວົງສາ ຫົວໜ້າຫ້ອງການກວດກາ ແລະ ຄວບຄຸມຢາເສບຕິດ, ມີ​ນັກ​ວິ​ທະ​ຍາ​ກອນ​ຈາກ​ກົມ​ປິ່ນ​ປົວ ແລະ ຟື້ນ​ຟູ​ໜ້າ​ທີ່​ການ ກະ​ຊວງ​ສາ​ທາ​ລະ​ນະ​ສຸກ ແລະ ​ສູນ​ບຳ​ບັດ​ຜູ້​ຕິດ​ເສບ ( ບ້ານ​ໄຜ່​ລ້ອມ) ແລະ ນັກສໍາມະນາກອນຈາກ​ສູນ​ບຳ​ບັດ​ປິ່ນ​ປົວ ແລະ ຟື້ນ​ຟູ​ສຸ​ຂະ​ພາບ​ຜູ້​ຕິດ​ຢາ​ເສບ​ຕິດ ຈໍານວນ 13 ສູນ ໃນ​ທົ່ວ​ປະ​ເທດເຂົ້າຮ່ວມ.

ການຝຶກອົບຮົມໃນຄັ້ງນີ້ ມີ​ຈຸດ​ປະ​ສົງ​​ເພື່ອ​ໃຫ້​ພະ​ນັກ​ງານ​ຜູ້​ເຮັດວຽກ​ງານ​ຕົວ​ຈິງຢູ່​​ສູນ​ບຳ​ບັດ​ປິ່ນ​ປົວ​ຜູ້​ຕິດ​ເສບ​ຢາ​ເສບ​ຕິດຮັບ​ຮູ້​ກຳ​ໄດ້​ເຖິງທີ່​ມາ, ຄຸນ​ປະ​ໂຫຍດ, ​ພື້ນ​ຖານ​ວິ​ທີ​ການ​ນຳ​ໃຊ້ຢາ (ຢາ​ກາ​ດອກ​ບົວ ຫຼື ຢາ​ບົງ​ແຊນ ແລະ ວິ​ທີ​ການ​​​ເກັບ​ກຳ​ຕິດ​ຕາມການ​ນຳ​ໃຊ້​ຢາ​ດັ່ງ​ກ່າວ ເພື່ອ​​ນຳ​ໃຊ້​ເຂົ້າ​ໃນ​ການ​ປິ່ນ​ປົວ​​ຜູ້​ຕິດ​ຢາ​ເສບ​ຕິດໃຫ້​ຖືກ​ຕາມຫຼັກ​ວິ​ທະ​ຍາ​ສາດ​ການແ​ພດ, ມີ​ສຸ​ຂະ​ພາບ​ແຂງ​ແຮງ, ຢຸດ​ເຊົາ​ການ​ນຳ​ໃຊ້​ຢາ​ເສບ​ຕິດບໍ່​​ກັບ​ຄືນ​ມາ​ເສບ​ໃໝ່ ແລະ ເຮັດ​ໃຫ້​ຜູ້​ທີ່​ເກັບ​ກຳ​ຂໍ້​ມູນ​ຂອງ​ຜູ້​ທີ່​ເຂົ້າ​ມາ​ປິ່ນ​ປົວ​ຢູ່​ສູນ​ບຳ​ບັດສາ​ມາດສະ​ໜອງ​ຂໍ້​ມູນ​ເຂົ້າ​ໃນ​ລະ​ບົບຂອງ​ຖານ​ແບບ​ຟອມ​​ທີ່​ໄດ້ສ້າງ​ຂຶ້ນ​​ໃຫ້​​ຖືກ​ຕ້ອງ ແລະ ຄົບ​ຖ້ວນ.

ໃນ​ຕອນ​ທ້າຍ​ຂອງ​ການ​ຝຶກ​ອົບ​ຮົມ, ​ມີ​ພິ​ທີມອບ​ຢາ​ກາ​ດອກ​ບົວ ແລະ ອຸ​ປະ​ກອນກວດ​ນ້ຳ​ປັດ​ສະ​ວະ ເພື່ອ​ຊອກ​ຫາ​ສານ​ເສບ​ຕິດໃຫ້​ກຽດ​ມອບ​​ເຄື່ອງ​ດັ່ງ​ກ່າວໂດຍ​ ພັອ ອິນ​ປົງ ຈັນ​ທະ​ວົງ​ສາ, ກ່າວຮັບໂດຍຕາງໜ້າຈາກ​ສູນ​​ບຳ​ບັດ​ປິ່ນ​ປົວ ແລະ ຟື້ນ​ຟູ​ສຸ​ຂະ​ພາບ​ຜູ້​ຕິດ​ຢາ​ເສບ​ຕິດຈຳ​ນວນ 13 ສູນໃນ​ທົ່ວ​ປະ​ເທດເພື່ອ​ນຳ​ໄປ​ຈັດ​ຕັ້ງ​ປະ​ຕິ​ບັດໃຫ້ບັນ​ລຸ​ຕາມ​ຄາດ​ໝາຍ ແລະ ​ໄດ້​ຮັບໝາກ​ຜົນ​ສູງ.​