ຕະຫຼອດໄລຍະ 6 ເດືອນຕົ້ນປີ 2022, ຊາວໜຸ່ມກົມໃຫຍ່ຕໍາຫຼວດ ກະຊວງ ປກສ ໄດ້ປະກອບສ່ວນຢ່າງຕັ້ງໜ້າເຂົ້າໃນວຽກງານວິຊາສະເພາະ ທີ່ການຈັດຕັ້ງມອບໝາຍໃຫ້ ມີຜົນສໍາເລັດ ເຊິ່ງສະແດງອອກໃນການຮັກສາຄວາມສະຫງົບດ້ານການເມືອງ ແລະ ຄວາມເປັນລະບຽບຮຽບຮ້ອຍທາງສັງຄົມ ແມ່ນມີຄວາມຮັບປະກັນ.

ກອງປະຊຸມສະຫຼຸບວຽກງານຊາວໜຸ່ມ 6 ເດືອນຕົ້ນປີ ແລະ ວາງທິດທາງແຜນການ 6 ເດືອນທ້າຍປີ 2022 ຂອງຄະນະບໍລິຫານງານຊາວໜຸ່ມ ກົມໃຫຍ່ຕຳຫຼວດ ໄດ້ຈັດໃນວັນທີ 16 ສິງຫາ 2022, ເຂົ້າຮ່ວມໂດຍ ພົຈວ ນິລະວົງ ເຈືອງຕະວະລາດ ຮອງຫົວໜ້າກົມໃຫຍ່ຕຳຫຼວດ ຜູ້ຊີ້ນຳວຽກງານອົງການຈັດຕັ້ງມະຫາຊົນ, ມີຄະນະຊາວໜຸ່ມກົມ, ໜ່ວຍຊາວໜຸ່ມ, ແຂກຮັບເຊີນ ແລະ ສະມາຊິກຊາວໜຸ່ມ ເຂົ້າຮ່ວມ.

ພັທ ຄຳ ສະຫວັນ ສຸທຳມະວົງ ຮັກສາການເລຂາຊາວໜຸ່ມ ກົມໃຫຍ່ຕຳຫຼວດ ໃຫ້ຮູ້ວ່າ:

6 ເດືອນຕົ້ນປີ, ຄະນະຊາວໜຸ່ມ ໄດ້ເອົາໃຈໃສ່ໃນການສຶກສາອົບຮົມການເມືອງ-ນຳພາແນວຄິດໃຫ້ແກ່ສະມາຊິກ ໃຫ້ມີແນວຄິດໜັກແໜ້ນ, ປະຕິບັດໜ້າທີ່ດ້ວຍຄວາມຮັບຜິດຊອບສູງ ເຊິ່ງສະແດງອອກ ເຊັ່ນ:

ໄດ້ເກັບກຳຂຶ້ນບັນຊີເປົ້າໝາຍອາຊະຍາກຳປະເພດຕ່າງໆ, ປະສານສົມທົບກັບພາກສ່ວນທີ່ກ່ຽວຂ້ອງ ເພື່ອລົງເກັບກຳສະພາບ ແລະ ແຫຼ່ງຂ່າວໄດ້ 551 ແຫຼ່ງຂ່າວ, ພົວພັນສູນໂທລະສັບ 996 ຄັ້ງ ແລະ ເກັບກຳຕິດຕາມເປົ້າໝາຍອາຊະຍາກຳໄດ້ 532 ເປົ້າໝາຍ.

ສືບຄົ້ນຫາເປົ້າໝາຍໄດ້ 476 ເປົ້າໝາຍ, ລົງສັນນະສູດເປົ້າໝາຍ 171 ເລື່ອງ, ກັກຕົວຜູ້ຖືກຫາໄດ້ 277 ຄົນ, ຢຶດຂອງກາງລົດໃຫຍ່ 6 ຄັນ, ລົດຈັກ 15 ຄັນ, ຢາບ້າ 613.898 ເມັດ, ເງິນ 18 ລ້ານກວ່າກີບ, ເງິນໂດລາ 9 ແສນກວ່າໂດລາ, ເງິນບາດ 4.000 ບາດ, ປືນ 49 ກະບອກ ພ້ອມລູກປືນ 372 ລູກ.

ວຽກງານສືບສວນ-ສອບສວນ ແມ່ນໄດ້ປະສານສົມທົບກັບພາກສ່ວນທີ່ກ່ຽວຂ້ອງ ດຳເນີນຄະດີດ້ວຍຄວາມຍຸຕິທຳ, ຖືກຕ້ອງຕາມລະບຽບຫຼັກການວິຊາສະເພາະຢ່າງເຂັ້ມງວດ, ໄດ້ລົງຊ່ວຍບັນດາ ປກສ ແຂວງ-ນະຄອນຫຼວງ ໃນການໄລ່ຊອກໄລ່ຈັບເປົ້າໝາຍ 21 ຄັ້ງ, ໄດ້ດຳເນີນຄະດີທີ່ຄ້າງມາ ແລະ ຄະດີຂຶ້ນມາໃໝ ຈຳນວນ 650 ເລື່ອງ, ມີຜູ້ຖືກຫາ 31 ຄົນ, ດຳເນີນຄະດີສຳເລັດແລ້ວ 272 ເລື່ອງ.

ວຽກງານປ້ອງກັນສະກັດກັ້ນ ອາຊະຍາກຳທາງດ້ານເສດຖະກິດ 6 ເດືອນຜ່ານມາ ໃນທົ່ວປະເທດ ແມ່ນມີຄະດີເກີດຂຶ້ນ 974 ເລື່ອງ, ແກ້ໄຂສຳເລັດ 278 ເລື່ອງ, ມີຜູ້ຖືກຫາ 445 ຄົນ ຍິງ 191 ຄົນ.

ວຽກງານສະກັດກັ້ນ ແລະ ຕ້ານຢາເສບຕິດ ໄດ້ກຳແໜ້ນສະພາບການເຄື່ອນໄຫວເລ່ລ່ຽມຂອງ ເປົ້າໝາຍຂົນສົ່ງຢາເສບຕິດຂ້າມຊາຍແດນ ເຊິ່ງສາມາດມ້າງໄດ້ 2.253 ເລື່ອງ, ຈັບຜູ້ຖືກຫາໄດ້ 3.302 ຄົນ ຍິງ 393 ຄົນ, ຄົນຕ່າງປະເທດ 70 ຄົນ, ດຳເນີນຄະດີສຳເລັດແລ້ວ 1.811 ເລື່ອງ, ສາມາດຢຶດຂອງກາງຢາເສບຕິດປະເພດຕ່າງໆ ໄດ້ດັ່ງນີ້:

ເຮໂຣອິນ 24,7 ກິໂລກຼາມ, ຢາບ້າ 8.585,71 ກິໂລກຼາມ, ຝິ່ນ 82,26 ກິໂລກຼາມ, ກັນຊາ 2.885,5 ກິໂລກຼາມ, ຢາໄອສ໌ 1.281,42 ກິໂລກຼາມ, ເຄຕາມິນ 2,97 ກຼາມ, ຢາອີ 1.670 ເມັດ, ໂຄເຄນ 3 ກິໂລກຼາມ, ຄາເຟອິນ 168 ກຼາມ.

ນອກຈາກນີ້, ຍັງຢຶດລົດໃຫຍ່ໄດ້ 82 ຄັນ, ລົດຈັກ 385 ຄັນ, ເຮືອ 1 ລຳ, ອາວຸດປືນ 16 ກະບອກ, ລູກປືນ 225 ລຸກ, ຖົງຢາງບັນຈຸຢາບ້າ 900 ກຼາມ, ເງິນກີບ 376.824.000 ກີບ ແລະ ເງິນບາດ 3 ລ້ານກວ່າບາດ.

ໃນກອງປະຊຸມ ຍັງໄດ້ມອບໃບຢັ້ງຢືນຊາວໜຸ່ມ 4 ບຸກ ໃຫ້ຄະນະບໍລິຫານງານຊາວໜຸ່ມ ກົມໃຫຍ່ຕຳຫຼວດ ແລະ ໃຫ້ໜ່ວຍຊາວໜຸ່ມ 4 ບຸກ 17 ໜ່ວຍ ທີ່ຂຶ້ນກັບ, ເຊິ່ງເປັນກຽດມອບໃບຢັ້ງຢືນໂດຍ ພົຈວ ນິລະວົງ ເຈືອງຕະວະລາດ ຮອງຫົວໜ້າກົມໃຫຍ່ຕໍາຫຼວດ.