ໃນວັນທີ 17 ສິງຫາ 2022, ພົຈວ ປອ ວັນສົມ ສີສົມບັດ ຫົວໜ້າອໍານວຍການ ວິທະຍາຄານສັນຕິບານປະຊາຊົນ (ວສປ) ເປັນປະທານພິທີປິດຝຶກອົບຮົມວຽກງານວິຊາສະເພາະໄລຍະສັ້ນ ຂະແໜງ 206, 208, 307 ແລະ 316 ໂດຍທ່ານໄດ້ເນັ້ນໃຫ້ນັກສໍາມະນາກອນ ເອົາໃຈໃສ່ຍົກສູງ ແລະ ກໍາແໜ້ນບັນດາເນື້ອໃນທິດສະດີ-ຫຼັກການຂອງແຕ່ລະໜ້າວຽກງານ ເພື່ອນໍາໄປຈັດຕັ້ງຜັນຂະຫຍາຍເຂົ້າໃນກົມກອງຂອງຕົນ ໃຫ້ມີປະສິດທິຜົນສູງ.

ພົຈວ ປອ ວັນສົມ ສີສົມບັດ ກ່າວວ່າ:

ຊຸດຝຶກອົບຮົມວຽກງານວິຊາສະເພາະໄລຍະສັ້ນຂອງວຽກງານ 206 ແລະ 208 ກົມໃຫຍ່ 502 ແລະ ວຽກງານ 307 ແລະ 316 ກົມໃຫຍ່ 503 ຊຸດນີ້ ໄດ້ດໍາເນີນມາເປັນເວລາ 10 ວັນ, ມີນັກສໍາມະນາກອນເຂົ້າຮ່ວມຝຶກອົບຮົມ ຈໍານວນ 116 ສະຫາຍ ຍິງ 8 ສະຫາຍ ໂດຍມາຈາກບັນດາກົມກອງທ້ອງຖິ່ນ ຈໍານວນ 82 ສະຫາຍ.

ນັກສໍາມະນາກອນຊຸດນີ້ ລ້ວນແລ້ວແຕ່ແມ່ນພະນັກງານປ້ອງການຄວາມສະຫງົບທີ່ໜຸ່ມແໜ້ນ, ເປັນເປົ້າໝາຍສືບທອດປ່ຽນແທນພາລະກິດປະຕິວັດ ແລະ ຈະກາຍເປັນພະນັກງານນໍາພາ-ບັນຊາແຕ່ລະຂັ້ນ ຢູ່ບັນດາກົມກອງໃນຂອບເຂດທົ່ວປະເທດ.

ເຊິ່ງຕະຫຼອດໄລຍະຝຶກອົບຮົມ ເຫັນໄດ້ວ່າ ບັນດານັກສໍາມະນາກອນ ສາມາດຮັກສາໄດ້ລະບຽບການຂອງການຂຶ້ນຫ້ອງຮຽນ, ສາມາດຄົ້ນຄວ້າ ແລະ ປະກອບຄໍາຄິດຄໍາເຫັນ ເພື່ອແລກປ່ຽນຄວາມຮູ້-ຄວາມສາມາດເຊິ່ງກັນແລະກັນ ຢ່າງເປັນຂະບວນການຟົດຟື້ນ ເຮັດໃຫ້ສາມາດບັນລຸຄາດໝາຍທີ່ວາງໄວ້ 100%.

ແນວໃດກໍຕາມ, ເພື່ອເຮັດໃຫ້ວຽກງານດັ່ງກ່າວ ນັບມື້ເຕີບໃຫຍ່ເຂັ້ມແຂງ ແລະ ມີປະສິດທິພາບສູງຂຶ້ນ ຈຶ່ງຢາກຮຽກຮ້ອງໃຫ້ບັນດານັກສໍາມະນາກອນ ກໍາແໜ້ນໃຫ້ໄດ້ທາງດ້ານທິດສະດີ-ຫຼັກການຂອງວຽກງານວິຊາສະເພາະແຕ່ລະດ້ານ ແລະ ຕ້ອງຮູ້ນຳໃຊ້ທິດສະດີທີ່ໄດ້ຮຽນມາ ໄປໝູນໃຊ້ເຂົ້າໃນວຽກງານວິຊາສະເພາະ ຢ່າງມີພາວະວິໄສ, ແທດເໝາະກັບສະພາບຄວາມເປັນຈິງ ໂດຍໄປຄຽງຄູ່ກັບ ການນໍາເອົາບົດຮຽນທິດສະດີ-ຫຼັກການດັ່ງກ່າວ ໄປສິດສອນ-ຖ່າຍທອດໃຫ້ແກ່ພະນັກງານຢູ່ໃນກົມກອງຂອງຕົນ ເພື່ອໃຫ້ເຂົາເຈົ້າຮັບຮູ້, ເຂົ້າໃຈຢ່າງຖືກຕ້ອງ ແລະ ປະຕິບັດວຽກງານໃຫ້ມີປະສິດທິຜົນດີຂຶ້ນກວ່າເກົ່າ.