ວັນທີ 6 ກຸມພາ 2023 ຜ່ານມາ, ຄະນະພັກ ກົມໃຫຍ່ຕໍາຫຼວດ ໄດ້ຈັດກອງປະຊຸມສະຫຼຸບການເຄື່ອນໄຫວນໍາພາ-ຊີ້ນໍາ ປະຈໍາປີ 2022 ແລະ ທິດທາງແຜນການ ປີ 2023, ເປັນປະທານໂດຍ ສະຫາຍ ພົຕ ຄໍາກິ່ງ ຜຸຍຫຼ້າມະນີວົງ ຄະນະປະຈໍາພັກກະຊວງ ຮອງລັດຖະມົນຕີ ເລຂາພັກ ຫົວໜ້າກົມໃຫຍ່ຕໍາຫຼວດ ກະຊວງ ປກສ, ມີຄະນະພັກ-ຄະນະບັນຊາ ພ້ອມດ້ວຍພະນັກງານຫຼັກແຫຼ່ງ ເຂົ້າຮ່ວມ.
ໃນກອງປະຊຸມ, ສະຫາຍ ພົຈວ ນິລະວົງ ເຈືອງຕະວະລາດ ຄະນະພັກກະຊວງ ຮອງເລຂາຄະນະພັກ ຮອງຫົວໜ້າກົມໃຫຍ່ຕໍາຫຼວດ ໄດ້ກ່າວວ່າ:
ໃນໄລຍະ 1 ປີຜ່ານມາ, ຄະນະພັກ ກົມໃຫຍ່ຕຳຫຼວດ ໄດ້ຍົກສູງຄວາມຮັບຜິດຊອບການເມືອງຂອງຕົນ ໃນການຊີ້ນຳ-ນຳພາບັນດາໜ່ວຍພັກກົມ ແລະ ຫ້ອງ ເຄື່ອນໄຫວເຮັດໜ້າທີ່ວຽກງານວິຊາສະເພາະ ຕາມພາລະບົດບາດຂອງຕົນ ເປັນຕົ້ນແມ່ນ ການຈັດຕັ້ງຜັນຂະຫຍາຍມະຕິກອງປະຊຸມໃຫຍ່ ຄັ້ງທີ VI.
ສຸມໃສຈັດຕັ້ງປະຕິບັດໃນ 1 ແຜນງານ, 2 ແຜນຍຸດທະສາດ, 4 ໂຄງການ, 17 ວຽກຈຸດສຸມຂອງກົມໃຫຍ່ຕໍາຫຼວດ ວາງອອກ, ຫັນມາເປັນແຜນງານ, ໂຄງການວຽກງານຈຸດສຸມ, ເອົາໃຈໃສ່ວຽກງານສຶກສາອົບຮົມການເມືອງ-ນໍາພາແນວຄິດ ໃຫ້ສະມາຊິກພັກ, ນາຍ ແລະ ພົນຕໍາຫຼວດ ເປັນປົກກະຕິ ເພື່ອກໍາແໜ້ນສະພາບການເຄື່ອນໄຫວຂອງສະມາຊິກພັກ ແລະ ໄດ້ເອົາໃຈໃສ່ແກ້ໄຂບັນຫາປະກົດການຫຍໍ້ທໍ້ພາຍໃນໜ່ວຍພັກ ເປັນຕົ້ນແມ່ນ ການແກ້ໄຂ້ບັນຫາຫາງສຽງຂອງສັງຄົມ ທີ່ມີຕໍ່ສະມາຊິກພັກໃນແຕ່ລະໜ່ວຍພັກ, ຈັດຕັ້ງປະຕິບັດລະບຽບຂອງກຳລັງວາງອອກ ຢ່າງເຂັ້ມງວດ.
ຜ່ານການສຶກສາອົບຮົມການເມືອງນໍາພາ-ແນວຄິດ ເຮັດໃຫ້ສະມາຊິກພັກ, ນາຍ ແລະ ພົນຕຳຫຼວດ ມີຄຸນທາດການເມືອງໜັກແໜ້ນ, ກາຍເປັນກຳລັງແຮງໃນການຈັດຕັ້ງຜັນຂະຫຍາຍມະຕິ, ຄໍາສັ່ງ ແລະ ທິດທາງແຜນການຂອງຂັ້ນເທິງ ວາງອອກ ໃນແຕ່ລະໄລຍະ; ຄຽງຄູ່ກັນນັ້ນ, ກໍໄດ້ຕັ້ງໜ້າແກ້ໄຂບັນຫາຫາງສຽງ ແລະ ສະພາບປະກົດການຫຍໍ້ທໍ້ທີ່ເກີດຂຶ້ນ ມີທ່າອ່ຽງຫຼຸດລົງເທື່ອລະກ້າວ.
ພົ້ນເດັ່ນແມ່ນ ການຈັດຕັ້ງຜັນຂະຫຍາຍຍຸດທະສາດຕ້ານຢາເສບຕິດ ມາເປັນ ວາລະແຫ່ງຊາດ ວ່າດ້ວຍ ການເເກ້ໄຂບັນຫາຢາເສບຕິດ ແຕ່ປີ 2021-2023, ສຸມໃສ່ດໍາເນີນແກ້ໄຂ້ຄະດີຕາມກົດໝາຍ ແລະ ຫຼັກການວິສາສະເພາະ; ເຊິ່ງໃນ 1 ປີຜ່ານມາ, ມີຄະດີເກີດຂຶ້ນທັງໝົດ 4.781 ເລື່ອງ, ດໍາເນີນສໍາເລັດ 1.820 ເລື່ອງ ແລະ ສືບຕໍ່ດໍາເນີນ 2.961 ເລື່ອງ.
ນອກນັ້ນ, ຍັງໄດ້ເອົາໃຈໃສ່ຕິດຕາມເປົ້າໜາຍອາດຊະຍາກຳປະເພດຕ່າງໆ ໄດ້ 754 ເປົ້າໝາຍ, ໄດ້ນໍາພາມ້າງຄະດີກຸ່ມແກ້ງຄ້າ-ຂາຍຢາເສບຕິດລາຍໃຫຍ່ ຈໍານວນ 5.068 ເລື່ອງ, ມີຜູ້ຖືກຫາ 7.410 ຄົນ ຍິງ 873 ຄົນ ແລະ ສາມາດຢຶດຂອງກາງປະເພດຕ່າງໆ ເຊັ່ນ:
- ຢາບ້າ 143.915.442 kg
- ເຮໂຣອິນ 176,77 kg
- ຢາອີ 2,723 kg
- ກັນຊາ 12.015,28 kg
- ຢາໄອສ໌ 2.209,87kg
- ຝິ່ນ 251,15 kg
- ແປ້ງຝຸ່ນ ທີ່ນໍາມາປະສົມຜະລິດຢາເສບຕິດ 11.576,76 kg
ພ້ອມນີ້, ຍັງມີລົດຈັກ ຈຳນວນ 790 ຄັນ, ລົດໃຫຍ່ 180 ຄັນ ແລະ ເຄື່ອງຂອງກາງອື່ນອີກຈໍານວນໜຶ່ງ; ເຊິ່ງລວມເປັນເງິນຈໍານວນ 939.356.000 ກີບ, ເງິນບາດ ຈໍານວນ 366.900 ບາດ, ເງິນຢວນ ຈໍານວນ 171.370 ຢວນ ແລະ ເງິນດົ່ງ 36.241.810 ດົ່ງ.
ນອກຈາກນີ້, ຍັງໄດ້ຂຶ້ນບັນຊີເປົ້າໝາຍເຄື່ອນໄຫວຄ້າ-ຂາຍຢາເສບຕິດລາຍໃຫຍ່ 1.651 ຄົນ ຍິງ 73 ຄົນ ແລະ ລົງໂຄສະນາເຜີຍແຜ່ຜົນຮ້າຍຂອງຢາເສບຕິດ ຕາມຈຸດຫຼ່ໍແຫຼມຕ່າງໆ ຈໍານວນ 8 ຄັ້ງ ມີຜູ້ເຂົ້າຮ່ວມ 1.279 ຄົນ ຍິງ 933 ຄົນ.
ໃນກອງປະຊຸມ, ຄະນະພັກ-ຄະນະບັນຊາແຕ່ລະຂັ້ນ ຍັງໄດ້ພ້ອມກັນປະກອບຄຳຄິດເຫັນໃສ່ເນື້ອໃນຂອງບົດສະຫຼຸບ ໃຫ້ມີເນື້ອໃນຄົບຖ້ວນ ເພື່ອເປັນທິດທາງແຜນການໃນການຈັດຕັ້ງວຽກງານໃນຊຸມປີຕໍ່ໜ້າ ໃຫ້ໄດ້ຮັບຜົນດີຂຶ້ນກວ່າເກົ່າ.
