ກົມພັກ ກົມໃຫຍ່ການເມືອງ ກະຊວງ ປກສ ໄດ້ຈັດຝຶກອົບຮົມວຽກງານພັກ-ວຽກງານການເມືອງ ໄລຍະສັ້ນ ຄັ້ງທີ I ຊຸດທີ 3 ໃຫ້ຄະນະພັກກອງບັນຊາການ ປກສ 7 ແຂວງພາກເໜືອ ໃນວັນທີ 6-10 ກຸມພາ 2023 ຢູ່ກອງບັນຊາການ ປກສ ແຂວງອຸດົມໄຊ.
ການຝຶກອົບຮົມຄັ້ງນີ້ ເປັນປະທານໂດຍ ສະຫາຍ ພັອ ປອ ຫຸມພັນ ຜິວເຂັມພອນ ຄະນະປະຈໍາພັກ ກົມໃຫຍ່ການເມືອງ ປ້ອງກັນຄວາມສະຫງົບ ຫົວໜ້າກົມພັກ, ພ້ອມທັງມີ ສະຫາຍ ພົຈວ ສີວອນ ໄຊຍະວົງ ຄະນະປະຈຳພັກແຂວງ ເລຂາຄະນະພັກ ຫົວໜ້າກອງບັນຊາການ ປກສ ແຂວງອຸດົມໄຊ, ມີຄະນະຮັບຜິດຊອບຄູຝຶກຈາກກົມ ພ້ອມດ້ວຍບັນດານັກສຳມະນາກອນ ທີ່ມາຈາກກອງບັນຊາການ ປກສ 7 ແຂວງພາກເໜືອ ຄື:
- ປກສ ແຂວງອຸດົມໄຊ
- ຜົ້ງສາລີ
- ບໍ່ແກ້ວ
- ຫຼວງນ້ຳທາ
- ຫົວພັນ
- ໄຊຍະບູລີ
- ຫຼວງພະບາງ
- ແລະ ກອງບັນຊາການ ປກສ 7 ເມືອງ ພາຍໃນແຂວງອຸດົມໄຊ ເຂົ້າຮ່ວມ
ໃນພິທີ, ສະຫາຍ ພັທ ສຸວັນໄຊ ຫຼ້າຈັນເພັດ ຮອງຫົວໜ້າກົມພັກ ກົມໃຫຍ່ການເມືອງ ກະຊວງປ້ອງກັນຄວາມສະຫງົບ ໄດ້ກ່າວວ່າ:
ຊຸດຝຶກອົບຮົມຄັ້ງນີ້ ມີຄວາມໝາຍຄວາມສໍາຄັນຢ່າງຍິ່ງ ເພາະເປັນການກໍ່ສ້າງ ແລະ ປັບປຸງກຳລັງປ້ອງກັນຄວາມສະຫງົບ ໃຫ້ມີຄວາມໜັກແໜ້ນທາງດ້ານການເມືອງ-ແນວຄິດ, ເຂັ້ມແຂງທາງດ້ານການຈັດຕັ້ງ, ມີລະບຽບວິໄນເຂັ້ມງວດ, ມີຄວາມຊໍານິຊຳນານທາງດ້ານວິຊາສະເພາະ, ມີແບບແຜນນຳພາ-ບັນຊາທີ່ມີວິທະຍາສາດ ແລະ ຫັນກຳລັງເຂົ້າສູ່ທັນສະໄໝເທື່ອລະກ້າວ.
ໂດຍຕິດພັນກັບ ການກະກຽມດຳເນີນກອງປະຊຸມຄົບຄະນະກາງສະໄໝ ຂອງພັກແຕ່ລະຂັ້ນ ໃນທົ່ວກຳລັງປ້ອງກັນຄວາມສະຫງົບ ແລະ ເພື່ອເປັນການຍົກສູງລະດັບຄວາມຮັບຮູ້ທາງດ້ານທິດສະດີ ແລະ ຫຼັກການກ່ຽວກັບ ວຽກງານພັກ-ວຽກງານການເມືອງ ໃຫ້ແກ່ຄະນະພັກທີ່ເຮັດວຽກງານພັກ ຢູ່ໃນກຳລັງປ້ອງກັນຄວາມສະຫງົບ ໄດ້ຮັບຮູ້-ເຂົ້າໃຈຖືກຕ້ອງ ແລະ ມີຄວາມເອກະພາບທາງດ້ານຫຼັກການ, ແນໃສ່ເຮັດໃຫ້ວຽກງານພັກ-ວຽກງານການເມືອງ ຮັບປະກັນໄດ້ຄຸນນະພາບ, ວ່ອງໄວ, ສາມາດເປັນເສນາທິການໃຫ້ແກ່ ຄະນະພັກ-ຄະນະບັນຊາ ໃນຂອບເຂດຄວາມຮັບຜິດຊອບ.
ບົດຮຽນທີ່ນຳມາຝຶກອົບຮົມຄັ້ງນີ້ ລວມມີທັງໝົດ 10 ບົດ ເຊິ່ງມີເນື້ອໃນເອກະສານຕົ້ນຕໍ ຄື:
- ລະບອບຫົວໜ້າດຽວ
- ອົງການການເມືອງ ແລະ ຜູ້ຮັບຜິດຊອບການເມືອງ ໃນກຳລັງປ້ອງກັນຄວາມສະຫງົບ
- ຍົກສູງຄຸນນະພາບການນຳພາຮອບດ້ານຂອງການຈັດຕັ້ງຮາກຖານພັກ
- ການຈັດຕັ້ງ ແລະ ການນຳພາຂອງ ພັກປະຊາຊົນ ປະຕິວັດລາວ ຕໍ່ກຳລັງປ້ອງກັນຄວາມສະຫງົບ
- ຝຶກຝົນຄຸນທາດການເມືອງ ແລະ ຄຸນສົມບັດສິນທຳປະຕິວັດ
- ຍົກສູງຄຸນນະພາບສະມາຊິກພັກ ໃນໄລຍະໃໝ່
- ເພີ່ມທະວີວຽກງານຄຸ້ມຄອງ ແລະ ລະບຽບການຍົກຍ້າຍຮ່ວມຊີວິດພັກ
- ເພີ່ມທະວີວຽກງານປ້ອງກັນພັກ ໃນໄລຍະໃໝ່
- ລະບຽບວິໄນພັກ
- ການຈັດຕັ້ງດຳເນີນກອງປະຊຸມໃຫຍ່ຂອງພັກ
ສຳລັບຊຸດຝຶກອົບຮົມຄັ້ງນີ້ ມີຜູ້ເຂົ້າຮ່ວມທັງໝົດ 88 ສະຫາຍ ຍິງ 6 ສະຫາຍ.