ຈາກເຫດການດິນເຈື່ອນ ໃນພາກໃຕ້ຂອງເອກວາດໍ ເຮັດໃຫ້ມີຜູ້ເສຍຊີວິດຢ່າງໜ້ອຍ 7 ຄົນ ແຕ່ມີອີກປະມານ 50 ຄົນ ຍັງຫາຍສາບສູນ, ເຊິ່ງເຈົ້າໜ້າທີ່ກ່ຽວຂ້ອງພວມເລັ່ງຄົ້ນຫາ.
ສຳນັກຂ່າວຕ່າງປະເທດ ລາຍງານຈາກນະຄອນຫຼວງກີໂຕ ປະເທດເອກວາດໍ ໃນວັນທີ 28 ມີນາ ວ່າ: ເຈົ້າໜ້າທີ່ແຂວງຊິມໂບຣາໂຊ ຕັ້ງຢູ່ທາງພາກໃຕ້ຂອງປະເທດເອກວາດໍ ລາຍງານສະພາບເກີດເຫດດິນເຈື່ອນ ຍ້ອນມີຝົນຕົກໜັກຢ່າງຕໍ່ເນື່ອງ ເມື່ອວັນທີ 26 ມີນາ ທີ່ຜ່ານມາ, ສົ່ງຜົນເຮັດໃຫ້ບ້ານອະເລົາຊີ ໄດ້ຮັບຄວາມເສຍຫາຍຢ່າງໜັກ, ໂດຍມີລາຍງານເບື້ອງຕົ້ນພົບຜູ້ເສຍຊີວິດ ຢ່າງໜ້ອຍ 7 ຄົນ, ໄດ້ຮັບບາດເຈັບ 23 ຄົນ ແລະ ຫາຍສາບສູນ 50 ຄົນ.
ພ້ອມດຽວກັນນັ້ນ, ດິນເຈື່ອນຄັ້ງນີ້ ຍັງໄດ້ສ້າງຄວາມເສຍຫາຍແກ່ໂຮງຮຽນ 3 ແຫ່ງ ແລະ ຫ້ອງການລັດຖະບານຫຼາຍແຫ່ງ ລວມເຖິງຖະໜົນຫົນທາງອື່ນໆອີກຈໍານວນຫຼາຍ.
ທ່ານ ກີເຢໂມ ລາດໂຊ ປະທານປະເທດເອກວາດໍ ໄດ້ປະສານງານຫາກອງທັບ ແລະ ເຈົ້າໜ້າທີ່ຕຳຫຼວດແຫ່ງຊາດ ເຊັ່ນດຽວກັນກັບອາສາສະໝັກຈາກຫຼາຍອົງການ ໃຫ້ເຂົ້າຮ່ວມການຊ່ວຍເຫຼືອປະຊາຊົນໃນແຂວງຊິມໂບຣາໂຊ ແລະ ຮຽກຮ້ອງໃຫ້ຜູ້ທີ່ອາໄສຢູ່ເຂດສ່ຽງໄພ ອົບພະຍົບອອກໄປກ່ອນ.
ນັບຕັ້ງແຕ່ຕົ້ນປີນີ້ ມີຝົນຕົກໜັກຢູ່ຫຼາຍພື້ນທີ່ຂອງເອກວາດໍ ສົ່ງຜົນເຮັດໃຫ້ມີຜູ້ເສຍຊີວິດຢ່າງໜ້ອຍ 22 ຄົນ, ເຮືອນຊານ 72 ຫຼັງ ພັງລົງ ແລະ 6.900 ກວ່າຫຼັງ ໄດ້ຮັບຄວາມເສຍຫາຍ, ຕາມຂ້ໍມູນຈາກການເກັບກຳສະຖິຕິຢ່າງເປັນທາງການຂອງ ອົງການປ້ອງກັນ ແລະ ຫຼຸດຜ່ອນໄພພິບັດແຫ່ງຊາດ ເອກວາດໍ.