ເຈົ້າໜ້າທີ່ພະແນກຕໍາຫຼວດຈະລາຈອນ ປກສ ນະຄອນຫຼວງວຽງຈັນ ປະຈໍາປ້ອມຄິວລົດສາຍເໜືອ ໄດ້ກວດກາລົດເມຄັນໜຶ່ງ ພົບລົດຈັກ 2 ຄັນທີ່ຖືກລັກ ກໍາລັງກຽມສົ່ງຕ່າງແຂວງ ເຈົ້າໜ້າທີ່ຈຶ່ງໄດ້ສອບຖາມ ແຕ່ຜູ້ຂັບຂີ່ບໍ່ຮູ້ຄົນຝາກ ແລະ ບໍ່ມີເອກະສານ ຈຶ່ງກັກລົດທັງສອງຄັນໄວ້ສືບສວນ.
ພັທ ບຸນມາກ ສູນດາໄລ ຮອງຫົວໜ້າພະແນກຕໍາຫຼວດ ໃຫ້ຮູ້ວ່າ:
ໃນຄັ້ງວັນທີ 28 ມີນາ 2019, ເຈົ້າໜ້າທີ່ຕໍາຫຼວດ ປະຈໍາປ້ອມຄິວລົດເມສາຍເໜືອ ໄດ້ກວດກາລົດເມທີ່ກໍາລັງເດີນທາງໄປ ເມືອງຂວາ-ເມືອງໃໝ່ ແຂວງຜົ້ງສາລີ, ຜ່ານການກວດກາລົດເມ ພົບເຫັນລົດຈັກຮອນດາ ຈໍານວນ 2 ຄັນ ບໍ່ມີປ້າຍທະບຽນ. ຈາກນັ້ນ, ໄດ້ສອບຖາມຜູ້ຂັບລົດ ຈຶ່ງຮູ້ວ່າ ລົດທັງສອງຄັນມີຄົນຝາກໄປ ແຂວງອຸດົມໄຊ, ບໍ່ຮູ້ຊື່ຄົນ ແລະ ບໍ່ມີເອກະສານລົດ, ເຈົ້າໜ້າທີ່ ຈຶ່ງກັກລົດດັ່ງກ່າວໄວ້.
ຜ່ານການກວດກາກົງໂຕນຕົວຈິງ ລົດຮອນດາເວບ 100 ຄັນທີ 1 ໝາຍເລກທະບຽນ ດບ 6906 ກໍາແພງນະຄອນ ເປັນລົດຂອງ ນາງ ໄກ່ ຢູ່ບ້ານສີເກີດ ເມືອງນາຊາຍທອງ, ລົດຖືກລັກຢູ່ເຮືອນ ໃນວັນທີ 21 ມີນາ 2019 ແລະ ຄັນທີ 2 ໝາຍເລກທະບຽນ ດພ 2346 ກໍາແພງນະຄອນ ເປັນລົດຂອງ ນາງ ຄໍາມະນີ ຢູ່ບ້ານໂພນປ່າເປົ້າ ເມືອງສີສັດຕະນາກ, ລົດຖືກລັກ ໃນວັນທີ 17 ມີນາ 2019 ເຊິ່ງຈອດໄວ້ຢູ່ບຶງທາດຫຼວງ.
ຕໍ່ມາໃນຄັ້ງວັນທີ 16 ພຶດສະພາ 2019, ພະແນກຕໍາຫຼວດຈະລາຈອນ ໄດ້ມອບລົດທັງສອງຄັນ ໃຫ້ເຈົ້າຂອງເດີມ ໂດຍການມອບຂອງ ພັທ ບຸນມາກ ສູນດາໄລ ພ້ອມທັງຝາກເຕືອນມາຍັງພໍ່-ແມ່ປະຊາຊົນ ໃຫ້ມີສະຕິລະວັງຕົວຮັກສາຊັບສິນ ໂດຍສະເພາະບັນຫາລົດຈັກເສຍ ແມ່ນມີທ່າອ່ຽງສູງ.
ຕໍ່ກັບຜູ້ຂັບຂີ່ລົດເມ, ເຈົ້າໜ້າທີ່ ໄດ້ນໍາຕົວສຶກສາອົບຮົມໃຫ້ເຂົ້າໃຈຕໍ່ລະບຽບກົດໝາຍວາງອອກ ແລະ ຝາກເຕືອນໄປຍັງຜູ້ຂົນສົ່ງໂດຍສານທຸກຄົນ ໃນກໍລະນີມີການຝາກລົດ ຕ້ອງກວດກາຄວາມຖືກຕ້ອງທຸກຄັ້ງກ່ອນຮັບຝາກ.
