ນະຄອນຫຼວງວຽງຈັນ (ນວ) ກໍຄື ກອງຄຸ້ມຄອງພາຫະນະ ແລະ ການຂັບຂີ່ ນວ ກະຊວງໂຍທາທິການ ແລະ ຂົນສົ່ງ ຮ່ວມກັບ ກະຊວງປ້ອງກັນຄວາມສະຫງົບ ແລະ ພາກສ່ວນທີ່ກ່ຽວຂ້ອງ ເລັ່ງຈັດຕັ້ງປະຕິບັດປ່ຽນປ້າຍທະບຽນພາຫະນະທາງບົກ ຈາກ ກຳແພງນະຄອນ ມາເປັນ ນະຄອນຫຼວງວຽງຈັນ ໃຫ້ສຳເລັດຕາມເປົ້າໝາຍທີ່ໄດ້ກຳນົດໄວ້. ຜ່ານການຈັດຕັ້ງປະຕິບັດ ມາແຕ່ວັນທີ 1-12 ມີນາ 2024 ສາມາດປ່ຽນຊື່ປ້າຍທະບຽນ ທັງລົດເກົ່າ ແລະ ລົດໃໝ່ ທັງໝົດ 4.375 ຄັນ. ໃນນັ້ນ, ຂຶ້ນທະບຽນລົດໃໝ່ 1.875 ຄັນ ແລະ ປ່ຽນຊື່ປ້າຍ 2.451 ຄັນ.
![](https://www.lsecuritynews.com/wp-content/uploads/2024/03/DSC_4641-1024x660.jpg)
ທ່ານ ບຸນປອນ ບຸນສົມຫວັງ ຫົວໜ້າກອງຄຸ້ມຄອງພາຫະນະ ແລະ ການຂັບຂີ່ ນວ ໃຫ້ສຳພາດຕໍ່ສື່ມວນຊົນ ໃນວັນທີ 13 ມີນາ 2024 ວ່າ:
ເຫດຜົນ ແລະ ເງື່ອນໄຂຂອງການປ່ຽນປ້າຍທະບຽນພາຫະນະທາງບົກໃນຄັ້ງນີ້ ແມ່ນປະຕິບັດໃຫ້ສອດຄ່ອງກັບຄວາມເປັນຈິງ, ໃຫ້ຖືກກັບຊື່ເອີ້ນຂອງນະຄອນຫຼວງວຽງຈັນ; ເຊິ່ງຜ່ານການຈັດຕັ້ງປະຕິບັດ ນັບແຕ່ວັນທີ 1-12 ມີນາ ສາມາດຂຶ້ນທະບຽນ ແລະ ປ່ຽນຊື່ປ້າຍທະບຽນ ທັງລົດເກົ່າ ແລະ ລົດໃໝ່ ໄດ້ທັງໝົດ 4.375 ຄັນ. ໃນນັ້ນ, ສຳນັກງານໃຫຍ່ ບ້ານທົ່ງປົ່ງ ເມືອງສີໂຄດຕະບອງ ສາມາດປ່ຽນທະບຽນລົດເກົ່າ ໄດ້ທັງໝົດ 1.495 ຄັນ, ລົດໃໝ່ໄດ້ 1.116 ຄັນ; ສາຂາເມືອງນາຊາຍທອງ ປ່ຽນທະບຽນລົດເກົ່າ ໄດ້ 84 ຄັນ, ລົດໃໝ່ 284 ຄັນ; ສາຂາເມືອງໄຊທານີ ປ່ຽນທະບຽນລົດເກົ່າ ໄດ້ 499 ຄັນ, ລົດໃໝ່ 227 ຄັນ ແລະ ສາຂາເມືອງຫາດຊາຍຟອງ ປ່ຽນທະບຽນລົດເກົ່າ ໄດ້ 423 ຄັນ, ລົດໃໝ່ ໄດ້ 251 ຄັນ.
![](https://www.lsecuritynews.com/wp-content/uploads/2024/03/DSC_4669-1024x660.jpg)
ສໍາລັບລົດທີ່ຂຶ້ນທະບຽນ ກໍາແພງນະຄອນ (ໂຕເກົ່າ) ຖ້າຢາກສືບຕໍ່ນໍາໃຊ້ກໍສາມາດນໍາໃຊ້ໄດ້ ຈົນກວ່າໃບທະບຽນຈະໝົດອາຍຸ ຈຶ່ງປ່ຽນມາເປັນ ນະຄອນຫຼວງວຽງຈັນ ຫຼື ຖ້າມີຈຸດປະສົງຢາກປ່ຽນກ່ອນ ກໍສາມາດປ່ຽນໄດ້ຕາມຄວາມສະໝັກໃຈ, ສ່ວນລະຫັດປ້າຍ ແລະ ຕົວເລກທະບຽນ ແມ່ນຍັງຮັກສາໄວ້ຄືເກົ່າ.
![](https://www.lsecuritynews.com/wp-content/uploads/2024/03/DSC_4710-1024x683.jpg)
ຕໍ່ກັບກໍລະນີຫາງສຽງທີ່ເກີດຂຶ້ນຢູ່ໃນສື່ສັງຄົມອອນລາຍ ກ່ຽວກັບ ຄ່ານາຍໜ້າການມາປ່ຽນປ້າຍທະບຽນດັ່ງກ່າວ ວ່າ ມີພະນັກງານຢູ່ກອງຄຸ້ມຄອງພາຫະນະ ແລະ ການຂັບຂີ່ ນວ ຮ່ວມຂະບວນການນໍາ ໄດ້ມີການໂກງລາຄາຄ່າຂຶ້ນທະບຽນ ແມ່ນບໍ່ມີມູນຄວາມຈິງ, ເຊິ່ງກອງຄຸ້ມຄອງພາຫະນະ ແລະ ການຂັບຂີ່ ນວ ໄດ້ກໍານົດລາຄາຄ່າບໍລິການຕາມລະບຽບການທີ່ໄດ້ກຳນົດໄວ້.
![](https://www.lsecuritynews.com/wp-content/uploads/2024/03/DSC_4730-1024x683.jpg)
ຄ່າບໍລິການຂຶ້ນທະບຽນລົດໃໝ່ ແລະ ລົດເກົ່າ ປະເພດລົດຈັກ, ລົດໃໝ່ ຫຼື ລົດເກົ່າ ເອົາເຕັກນິກ 184.000 ກີບ, ສ່ວນລົດເກົ່າທີ່ມີເຕັກນິກແລ້ວ 134.000 ກີບ.
ສໍາລັບປະເພດລົດເບົາ ລົດໃໝ່ ຫຼື ລົດເກົ່າ ເອົາເຕັກນິກ 219.000 ກີບ, ລົດເກົ່າ ທີ່ມີເຕັກນິກແລ້ວ 144.000 ກີບ.
ສໍາລັບປະເພດລົດບັນທຸກ 3-15 ໂຕນ 329.000 ກີບ, ລົດເກົ່າທີ່ມີເຕັກນິກແລ້ວ 154.000 ກີບ; 15 ໂຕນຂຶ້ນໄປ 344.000 ກີບ, ສ່ວນລົດເກົ່າທີ່ມີເຕັກນິກແລ້ວ 169.000 ກີບ; ຫາງລາກ (ລົດພວງ) 379.000 ກີບ, ລົດເກົ່າ ທີ່ມີເຕັກນິກແລ້ວ 154.000 ກີບ.
![](https://www.lsecuritynews.com/wp-content/uploads/2024/03/DSC_4689-1024x683.jpg)
ໂອກາດນີ້, ທ່ານ ບຸນປອນ ບຸນສົມຫວັງ ຍັງໄດ້ຮຽກຮ້ອງໃຫ້ຜູ້ໃຊ້ລົດຢູ່ນະຄອນຫຼວງວຽງຈັນ ໂດຍສະເພາະ ໃບທະບຽນລົດທີ່ໝົດອາຍຸ ໃຫ້ມາປ່ຽນທະບຽນດ້ວຍຕົນເອງ ຢູ່ຕາມແຕ່ລະສາຂາໃກ້ບ້ານຂອງຕົນເອງ, ເຊິ່ງກອງຄຸ້ມຄອງພາຫະນະ ແລະ ການຂັບຂີ່ ນວ ມີທັງໝົດ 3 ສາຂາ ຄື: ສາຂາເມືອງຫາດຊາຍຟອງ ຢູ່ບ້ານດົງໂພສີ, ສາຂາເມືອງໄຊທານີ ຢູ່ຫຼັກ 16 ແລະ ສາຂາເມືອງນາຊາຍທອງ ຢູ່ນໍ້າຊ່ວງ. ສ່ວນສໍານັກງານໃຫຍ່ ຕັ້ງຢູ່ບ້ານທົ່ງປົ່ງ ເມືອງສີໂຄດຕະບອງ
![](https://www.lsecuritynews.com/wp-content/uploads/2024/03/DSC_4732-1024x641.jpg)
ສຳລັບລົດຈັກໄຟຟ້າ ທີ່ມີກຳລັງໄຟຟ້າ 1 ກິໂລວັດຂຶ້ນໄປ ແມ່ນຈະໃຫ້ມາຂຶ້ນທະບຽນຕິດປ້າຍ, ສ່ວນລົດຈັກທີ່ມີກຳລັງໄຟຟ້າ 1 ກິໂລວັດລົງມາ ແມ່ນຈະບໍ່ຕິດປ້າຍທະບຽນ, ເຊິ່ງຄາດວ່າ ຈະເລີ່ມຈັດຕັ້ງປະຕິບັດ ໃນໄວໆນີ້.
![](https://www.lsecuritynews.com/wp-content/uploads/2024/03/DSC_4665-1024x626.jpg)