ກອງບັນຊາການ ປກສ ນະຄອນຫຼວງວຽງຈັນ ໄດ້ກໍານົດເສັ້ນທາງສັນຈອນ ແລະ ບ່ອນຈອດລົດປະເພດຕ່າງໆ ໃຫ້ປະຕິບັດໃນໄລຍະບຸນອອກພັນສາ ແລະ ບຸນຊ່ວງເຮືອປະເພນີ ທີ່ທ່າວັດຈັນ ປະຈໍາປີ ພສ 2566 (ຄສ 2023). ທັງນີ້, ເພື່ອເຮັດໃຫ້ເສັ້ນທາງການສັນຈອນພາຍໃນບຸນຊ່ວງເຮືອ ມີຄວາມເປັນລະບຽບຮຽບຮ້ອຍ.
+ ພັທ ຄໍາພູ ສົມແພງພັນ ຮອງຫົວໜ້າພະແນກຕໍາຫຼວດຈະລາຈອນ ປກສ ນະຄອນຫຼວງວຽງຈັນ ຜ່ານແຜນປ້ອງກັວວ່າ:
ຜູ້ສັນຈອນ ມາຈາກທິດເໜືອ ທີ່ມີຈຸດປະສົງມາທ່ຽວງານບຸນຊ່ວງເຮືອ ແມ່ນອະນຸຍາດໃຫ້ເຂົ້າຈອດສະຖານທີ່ຈອດລົດ ທີ່ອະນຸກໍາມະການອະນຸຍາດ ຫຼື ຈອດຕາມແຄມຖະໜົນສຸພານຸວົງ ແລະ ທາງຮ່ອມອື່ນໆ ທີ່ເຫັນວ່າມີຄວາມປອດໄພ ແລະ ບໍ່ເປັນການກີດຂວາງການສັນຈອນຂອງຍານພາຫະນະອື່ນ.
ຜູ້ສັນຈອນ ມາຈາກທິດໃຕ້ ອະນຸຍາດໃຫ້ຈອດລົດ ຢູ່ສະຖານທີ່ຈອດລົດຂອງພະແນກໂຍທາທິການ ແລະ ທາງຮ່ອມໂຮງຮຽນ ມສ ເພຍວັດ ຫຼື ຈອດຕາມແຄມທາງຮ່ອມອື່ນໆ ທີ່ເຫັນວ່າມີຄວາມປອດໄພ ແລະ ບໍ່ເປັນການກີດຂວາງການສັນຈອນຂອງຍານພາຫະນະອື່ນ.
![](https://www.lsecuritynews.com/wp-content/uploads/2023/10/DSC_9789-1024x684.jpg)
ຜູ້ສັນຈອນ ມາຈາກຖະໜົນ 13 ໃຕ້ ອະນຸຍາດໃຫ້ຈອດຕາມສະຖານທີ່ຈອດລົດ ຕໍ່ໜ້າສະໜາມກິລາເຈົ້າອານຸວົງ, ຫໍວັດທະນະທໍາແຫ່ງຊາດ, ຕາມແຄມທາງຮ່ອມອື່ນໆ ທີ່ເຫັນວ່າມີຄວາມປອດໄພ ແລະ ບໍ່ເປັນການກີດຂວາງການສັນຈອນຂອງຍານພາຫະນະອື່ນ.
ບັນດາລົດເກັງ, ລົດກະບະ, ລົດຕຸກໆ, ຈໍາໂບ້ ໃຫ້ຈອດຕາມສະຖານທີ່ຈອດລົດ ທີ່ອະນຸກໍາມະການຈັດງານໄດ້ກໍານົດ ແລະ ປະຕິບັດຕາມການແນະນໍາຂອງເຈົ້າໜ້າທີ່ຕໍາຫຼວດຈະລາຈອນ ທີ່ກໍາລັງປະຕິບັດໜ້າທີ່ຢູ່ແຕ່ລະຈຸດ, ຕາມປ້ອມຕ່າງໆ.
ບັນດາລົດຈັກ, ລົດຖີບ ອະນຸຍາດໃຫ້ຈອດຕາມສະຖານທີ່ຈອດລົດ ທີ່ອະນຸກໍາມະການຈັດງານໄດ້ກໍານົດໄວ້.
+ ກອງບັນຊາການ ປກສ ນະຄອນຫຼວງວຽງຈັນ ແຈ້ງອີກຕື່ມວ່າ:
ຜູ້ນໍາໃຊ້ຍານພາຫະນະ ທີ່ບໍ່ມີຈຸດປະສົງມາທ່ຽວງານບຸນຊ່ວງເຮືອ ແຕ່ຕ້ອງນໍາໃຊ້ຖະໜົນຕ່າງໆ ໃຫ້ປະຕິບັດດັ່ງນີ້: ມາຈາກຖະໜົນ 13 ເໜືອ ມີຈຸດປະສົງໄປຖະໜົນ 13 ໃຕ້ ແລະ ຖະໜົນທ່າເດື່ອ ໃຫ້ນໍາໃຊ້ຖະໜົນອາຊຽນ, ຖະໜົນໜອງບຶກ ແລະ ຖະໜົນດົງໂດກ.
![](https://www.lsecuritynews.com/wp-content/uploads/2023/10/What4.jpeg)
ມາຈາກຖະໜົນ13 ໃຕ້ ແລະ ຖະໜົນເລກ 10 ມີຈຸດປະສົງໄປຖະໜົນ 13 ເໜືອ ໃຫ້ນໍາໃຊ້ຖະໜົນ 450 ປີ, ຖະໜົນກໍາແພງເມືອງ ແລະ ຖະໜົນມິດຕະພາບ; ຫ້າມພາຫະນະທຸກປະເພດ ນໍາໃຊ້ຖະໜົນເຈົ້າຟ້າງຸ່ມ (ແຄມຂອງ) ແຕ່ສາມແຍກຄຣີນິກສາກົນ ເຖິງສາມແຍກປາກປ່າສັກ ເລີ່ມແຕ່ວັນທີ 27-30 ຕຸລາ 2023.
ສະເພາະພາຫະນະ ທີ່ມີຈຸດປະສົງນໍາເອົາສິນຄ້າເຂົ້າໄປຂາຍໃນງານບຸນ ແມ່ນອະນຸຍາດໃຫ້ເຂົ້າແຕ່ເວລາ 5 ຫາ 8 ໂມງເຊົ້າ ເທົ່ານັ້ນ, ເມື່ອເອົາສິນຄ້າລົງແລ້ວ ໃຫ້ເອົາລົດອອກໄປຈອດຢູ່ບ່ອນອື່ນ ເພື່ອບໍ່ໃຫ້ກີດຂວາງການສັນຈອນໃນງານບຸນ.
ແນວໃດກໍຕາມ, ບຸນຊ່ວງເຮືອປີນີ້ ຈະເຮັດການການສັນຈອນໃນຂອບເຂດຂອງງານບຸນ ມີສະພາບລົດຕິດຂັດ, ເຮັດໃຫ້ມີຄວາມຫຍຸ້ງຍາກສະຖານທີ່ຈອດລົດ. ສະນັ້ນ, ຈະເຮັດໃຫ້ການສັນຈອນອັ່ງອໍຢູ່ຕາມເສັ້ນທາງ; ຕໍ່ກັບບັນດັ່ງກ່າວ, ເຈົ້າໜ້າທີ່ ຮຽກຮ້ອງມາຍັງຜູ້ໃຊ້ລົດ-ໃຊ້ຖະໜົນ ຈົ່ງພ້ອມກັນປະຕິບັດຕາມຄໍາແນະນໍາຂອງເຈົ້າໜ້າທີ່ ໃນການເຂົ້າ-ອອກງານບຸນຢ່າງເປັນລະບຽບ. ທັງນີ້, ກໍເພື່ອຫຼີກລ່ຽງການສັນຈອນແອອັດ.