ພະແນກຕໍາຫຼວດຈະລາຈອນ ນະຄອນຫຼວງວຽງຈັນ ບັນຈຸກຳລັງ 490 ກວ່າສະຫາຍ ເຂົ້າຈຸດປ້ອງກັນງານບຸນພຣະທາດຫຼວງວຽງຈັນ ແລະ ງານວາງສະແດງສິນຄ້າ ລາວ-ໄອເຕັກ ປະຈໍາປີ 2023 ໃນລະຫວ່າງວັນທີ 23-27 ພະຈິກນີ້ ເພື່ອອຳນວຍຄວາມສະດວກ ແລະ ແກ້ໄຂບັນຫາຈະລາຈອນແອອັດ ຢູ່ບັນດາເສັ້ນທາງຕ່າງໆ ໃນໄລຍະຈັດງານບຸນພຣະທາດຫຼວງ.
ກອງປະຊຸມຜ່ານແຜນປ້ອງກັນ ງານບຸນພຣະທາດຫຼວງວຽງຈັນ ແລະ ງານວາງສະແດງສິນຄ້າ ລາວ-ໄອເຕັກ ຈັດຂຶ້ນໃນວັນທີ 17 ພະຈິກ 2023, ເຂົ້າຮ່ວມໂດຍ ພັອ ພິມມະສອນ ທໍາມະວົງ ຮອງຫົວໜ້າກອງບັນຊາການ ປກສ ນະຄອນຫຼວງວຽງຈັນ, ພັທ ແກ້ວມາລາ ແສງທອງ ຮອງຫົວໜ້າກົມຕໍາຫຼວດຈະລາຈອນ, ມີບັນດາຄະນະພັກ-ຄະະນບັນຊາ ຫ້ອງຕໍາຫຼວດ, ພະແນກ, ກອງ ເຂົ້າຮ່ວມ.
![](https://www.lsecuritynews.com/wp-content/uploads/2023/11/DSC_9827-1024x677.jpg)
ໃນພິທີ, ພັທ ສັງຄົມ ພົມມະລາດ ຫົວໜ້າພະແນກຕໍາຫຼວດຈະລາຈອນ ນະຄອນຫຼວງວຽງຈັນ ໄດ້ຂຶ້ນຜ່ານແຜນປ້ອງກັນ ງານບຸນພຣະທາດຫຼວງວຽງຈັນ ແລະ ງານວາງສະແດງສິນຄ້າ ລາວ-ໄອເຕັກ ວ່າ: ງານບຸນພຣະທາດຫຼວງວຽງຈັນ ແລະ ງານວາງສະແດງສິນຄ້າ ລາວ-ໄອເຕັກ ປີນີ້ ຄາດວ່າສະພາບການສັນຈອນຈະມີຄວາມແອອັດ, ຊັບສົນຢູ່ບາງເສັ້ນທາງ ເປັນຕົ້ນແມ່ນ: ເສັ້ນທາງໜອງບອນ, ຖະໜົນທາດຫຼວງ, ກໍາແພງເມືອງ, ຖະໜົນໄກສອນ, ໂພນໄຊ, 23 ສິງຫາ ແລະ ອື່ນໆ.
ດັ່ງນັ້ນ, ເພື່ອອຳນວຍຄວາມສະດວກໃຫ້ແກ້ຜູ້ໃຊ້ລົດ-ໃຊ້ຖະໜົນ ໃນໄລຍະງານດັ່ງກ່າວ ເຈົ້າໜ້າທີ່ພະແນກຕໍາຫຼວດຈະລາຈອນ ຈະໄດ້ສົມທົບກັບ ຈະລາຈອນ ເມືອງສີໂຄດຕະບອງ, ເມືອງໄຊເສດຖາ, ເມືອງຈັນທະບູລີ, ເມືອງສີສັດຕະນາກ, ເມືອງໄຊທານີ, ເມືອງຫາດຊາຍຟອງ ແລະ ເມືອງນາຊາຍທອງ ລົງປະຈໍາຢູ່ຈຸດປ້ອງກັນທັງໝົດ 124 ຈຸດ, ມີກຳລັງເຂົ້າປ້ອງກັນທັງໝົດ 497 ສະຫາຍ ຍິງ 13 ສະຫາຍ; ໃນນີ້, ວົງໃນ 69 ຈຸດ, ວົງນອກ 40 ຈຸດ, ມີ 10 ຈຸຄອຍເຫດ ແລະ ມີ 1 ບູດໂຄສະນາ.
![](https://www.lsecuritynews.com/wp-content/uploads/2023/11/DSC_9825-1024x566.jpg)
ນອກຈາກນີ້, ສະເພາະກອງຕຳຫຼວດຈະລາຈອນ 4 ເມືອງ ໃຫ້ອອກຕັ້ງຈຸດກວດກາ ແລະ ຄອຍເຫດ 24 ຊົ່ວໂມງ ຄື:
1. ກອງຕໍາຫຼວດຈະລາຈອນ ເມືອງນາຊາຍທອງ ສົມທົບກັບ ພະແນກ ຕັ້ງດ່ານຢູ່ບ້ານນາດີ (ຂາເຂົ້າເມືອງ)
2. ກອງຕຳຫຼວດຈະລາຈອນ ເມືອງໄຊທານີ ຕັ້ງດ່ານຢູ່ເສັ້ນທາງເລກ 10 ທ່າງ່ອນ (ຂາເຂົ້າເມືອງ)
3. ກອງຕຳຫຼວດຈະລາຈອນ ເມືອງປາກງື່ມ ສົມທົບກັບ ຄະນະສະເພາະກິດ ຕັ້ງດ່ານຢູ່ບ້ານສົມສະຫວາດ (ຂາເຂົ້າເມືອງ)
4. ກອງຕຳຫຼວດຈະລາຈອນ ເມືອງສັງທອງ ຕັ້ງດ່ານຢູ່ປ້ອມປາກຕອນ (ຂາເຂົ້າເມືອງ)
![](https://www.lsecuritynews.com/wp-content/uploads/2023/11/DSC_9836-1024x559.jpg)
ໂອກາດດຽວກັນ, ພັອ ພິມມະສອນ ທໍາມະວົງ ກໍໄດ້ເນັ້ນໃຫ້ກຳລັງຈະລາຈອນ ທົ່ວນະຄອນຫຼວງວຽງຈັນ ທີ່ລົງປະຕິບັດໜ້າທີ່ ຈົ່ງເອົາໃຈໃສ່ໃນການລະບາຍການສັນຈອນໃຫ້ຜູ້ໃຊ້ລົດ-ໃຊ້ຖະໜົນ, ຈັດສັນຄວາມບໍ່ເປັນລະບຽບຮຽບຮ້ອຍຢູ່ຕາມເສັ້ນທາງ ເພື່ອຮັບປະກັນໃຫ້ການສັນຈອນ ໃນໄລຍະງານດັ່ງກ່າວ ໃຫ້ມີຄວາມສະດວກໃນການສັນຈອນ.
ນອກນີ້, ຕ້ອງມີການຄວບຄຸມບໍ່ໃຫ້ຜູ້ຂັບຂີ່ດື່ມສິ່ງມືນເມົາແລ້ວຂັບຂີ່ຍານພາຫະນະ, ຄວບຄຸມບໍ່ໃຫ້ຜູ້ຂັບຂີ່ໃຊ້ຄວາມໄວເກີນກໍານົດ ໂດຍມີການຕັ້ງດ່ານກວດກາກັນຍ່າງຄັກແນ່ໃນແຕ່ລະວັນ ເພື່ອເຮັດໃຫ້ບັນຫາລົດຕິດອັ່ງອໍ ແລະ ບັນຫາການເກີດອຸບັດຕິເຫດຕາມທ້ອງຖະໜົນ ຫຼຸດລົງ.