ໃນວັນທີ 19 ມິຖຸນາ 2018, ທ່ານ ນວນທອງ ສຸວັນວິໄຊ ຫົວໜ້າຫ້ອງການສູນກາງຊາວໜຸ່ມປະຊາຊົນປະຕິວັດລາວ (ສຊປລ) ພ້ອມດ້ວຍຄະນະ ໄດ້ຕ້ອນຮັບ ຄະນະຊາວໜຸ່ມອາສາສະໝັກຈີນ ຊຸດທີ 9 ນໍາພາໂດຍ ທ່ານ ຫວາງ ຄຣີຮຸຍ ທີ່ປຶກສາທູດເສດຖະກິດ-ການຄ້າ ສະຖານທູດ ສປ ຈີນ ປະຈໍາ ສປປ ລາວ.
ທ່ານ ນວນທອງ ສຸວັນວິໄຊ ກ່າວວ່າ: ຊາວໜຸ່ມອາສາສະໝັກຈີນ ຊຸດນີ້ ມີຈໍານວນ 10 ທ່ານ ຍິງ 5 ທ່ານ ໂດຍຈະມາເຄື່ອນໄຫວເຮັດວຽກອາສາສະໝັກເປັນເວລາ 6 ເດືອນ. ໃນນີ້, ຈະໄດ້ລົງເຮັດວຽກປະຈໍາຢູ່ແຕ່ລະຈຸດ ຄື: ໂຮງຮຽນປັນຍາທິບ 1 ທ່ານ, ໂຮງໝໍ 5 ເມສາ-ໂຮງໝໍມະໂຫສົດ 3 ທ່ານ, ວິທະຍຸກະຈາຍສຽງແຫ່ງຊາດ 2 ທ່ານ, ສູນພັດທະນາວິຊາຊີບ ສຊປລ 2 ທ່ານ, ພະແນກຂໍ້ມູນຂ່າວສານ ສຊປລ 1 ທ່ານ ແລະ ກະຊວງສຶກສາທິການ ແລະ ກິລາ 1 ທ່ານ; ເພື່ອສືບຕໍ່ຜັນຂະຫຍາຍການຈັດຕັ້ງປະຕິບັດການຮ່ວມມືຂອງ ອົງການຈັດຕັ້ງຊາວໜຸ່ມທັງສອງປະເທດ (ລາວ-ຈີນ) ໃຫ້ແໜ້ນແຟ້ນຍິ່ງຂຶ້ນກວ່າເກົ່າ ພ້ອມທັງເປັນການຖ່າຍທອດບົດຮຽນ, ເຕັກນິກວິຊາການ ແລະ ວຽກງານວິຊາສະເພາະທີ່ມີຄວາມຕ້ອງການໃນການພັດທະນາໃນຂົງເຂດຕ່າງໆ ແລະ ເພື່ອຕີລາຄາ-ປະເມີນຜົນຂອງການຈັດຕັ້ງປະຕິບັດຂອງ ຄະນະຊາວໜຸ່ມອາສາສະໝັກຈີນ ໃຫ້ມີປະສິດທິພາບກວ່າເກົ່າ.
ນອກນັ້ນ, ຍັງເປັນການສ້າງຄວາມສາມັກຄີ, ຮ່ວມມືລະຫວ່າງສອງປະເທດ ລາວ-ຈີນ ໃຫ້ຮັດແໜ້ນ ແລະ ເປັນການພັດທະນາບຸກຄະລາກອນໃນຂົງເຂດນັ້ນໆ ໃຫ້ກາຍເປັນບຸກຄົນທີ່ມີຄວາມຮູ້-ຄວາມສາມາດໃນດ້ານຕ່າງໆ ໃຫ້ນັບມື້ນັບນັບດີຂຶ້ນເປັນກ້າວໆ.
