ພິທີເປີດຂະບວນຄາລາວານລົດ ທີ່ເດີນທາງໄປຮ່ວມສະເຫຼີມສະຫຼອງ ວັນສ້າງຕັ້ງເມືອງວຽງໄຊ-ຖານທີ່ໝັ້ນຂອງ ການປະຕິວັດລາວ ຄົບຮອບ 50 ປີ (30 ພະຈິກ 1968-30 ພະຈິກ 2018) ໄດ້ຈັດຂຶ້ນໃນຕອນເຊົ້າຂອງວັນທີ 28 ພະຈິກ 2018 ທີ່ນະຄອນຫຼວງວຽງຈັນ, ເຂົ້າຮ່ວມໂດຍ ທ່ານ ສອນໄຊ ສີພັນດອນ ຮອງນາຍົກລັດຖະມົນຕີ, ມີບັນດາລັດຖະມົນຕີ-ຮອງລັດຖະມົນຕີ ແລະ ພາກສ່ວນກ່ຽວຂ້ອງ.
ທ່ານ ສຈ.ປອ ບໍ່ແສງຄຳ ວົງດາລາ ລັດຖະມົນຕີກະຊວງຖະແຫຼງຂ່າວ, ວັດທະນະທຳ ແລະ ທ່ອງທ່ຽວ ກ່າວວ່າ:
ການຈັດຂະບວນຄາລາວານລົດທ່ອງທ່ຽວສູ່ ເມືອງວຽງໄຊ ແຂວງຫົວພັນ ແມ່ນເປັນການສຶກສາຮຽນຮູ້ຕໍ່ມູນເຊື້ອປະຫວັດສາດການຕໍ່ສູ້ອັນຍືດເຍື້ອຍາວນານຢ່າງພິລະອາດຫານຂອງ ປະຊາຊົນລາວບັນດາເຜົ່າ ແລະ ວິລະກຳອັນລໍ້າເລີດຂອງ ບັນດາວິລະຊົນ, ນັກຮົບແຂ່ງຂັນໃນພາລະກິດຕໍ່ສູ້ປົດປ່ອຍຊາດ, ປົກປັກຮັກສາ ແລະ ພັດທະນາປະເທດຊາດ ໃນໄລຍະຜ່ານມາ ພາຍໃຕ້ການນຳພາຂອງພັກປະຊາຊົນ ປະຕິວັດລາວ.
ທ່ານ ສຈ.ປອ ບໍ່ແສງຄຳ ວົງດາລາ
ພ້ອມນັ້ນ, ຍັງເປັນການລະນຶກ ແລະ ສະແດງຄວາມຮູ້ບຸນຄຸນຢ່າງເລິກເຊິ່ງຕໍ່ຜົນງານ ແລະ ຄຸນງາມຄວາມດີອັນໃຫຍ່ຫຼວງຂອງ ບັນດາຜູ້ນຳທີ່ເຄົາລົບຮັກ, ບັນດານັກຮົບຜູ້ອາດຫານ, ທຸກໝູ່ເລົ່າຮົບ ແລະ ພໍ່-ແມ່ປະຊາຊົນທີ່ເສຍສະຫຼະເລືອດເນື້ອໃນການຕໍ່ສູ້ ເພື່ອປະເທດຊາດ ແລະ ເພື່ອປະຊາຊົນລາວ, ທັງເປັນການຮໍ່າຮຽນເອົາຄຸນສົມບັດສິນທຳປະຕິວັດ, ທັດສະນະ ແລະ ອຸດົມຄະຕິຂອງການປະຕິວັດ ລວມທັງແບບແຜນການນຳພາ ແລະ ການດຳລົງຊີວິດຂອງຜູ້ນຳຮຸ່ນກ່ອນໆ ເພື່ອສ້າງຄວາມເອກອ້າງທະນົງໃຈຕໍ່ຜົນສຳເລັດແຫ່ງການຕໍ່ສູ້ກູ້ຊາດ.
ພ້ອມດຽວກັນນີ້, ຂະບວນການດັ່ງກ່າວ ຍັງເປັນການປຸກລະດົມຂົນຂວາຍ ແລະ ສ້າງຂະບວນການໂຄສະນາ ເພື່ອສົ່ງເສີມປີທ່ອງທ່ຽວລາວ 2018 ”ລາວທ່ຽວລາວ ” ໂດຍສະເພາະຢູ່ຖານທີ່ໝັ້ນຂອງ ການປະຕິວັດລາວ ກໍຄືການດຶງດູດເອົາບັນດານັກທ່ອງທ່ຽວ ຈາກພາຍໃນ ແລະ ຕ່າງປະເທດ ໃຫ້ໄປຢ້ຽມຢາມທ່ຽວຊົມເຂດສຳຄັນ ແລະ ສະຖານທີ່ເປັນມູນເຊື້ອຕ່າງໆພາຍໃນ ແຂວງຫົວພັນ ນັບມື້ນັບເພີ່ມຂຶ້ນເລື້ອຍໆ ແນໃສ່ຊຸກຍູ້ດ້ານການພັດທະນາເສດຖະກິດ-ສັງຄົມຂອງທ້ອງຖິ່ນ ໃຫ້ຫຼຸດພົ້ນອອກຈາກຄວາມທຸກຍາກເທື່ອລະກ້າວ.
ເຊິ່ງຂະບວນຄາລະວານ ແມ່ນເດີນທາງອອກຈາກ ນະຄອນຫຼວງວຽງຈັນ ໄປຍັງ ແຂວງບໍລິຄຳໄຊ-ຊຽງຂວາງ-ແຂວງຫົວພັນ ໂດຍມີຜູ້ເຂົ້າຮ່ວມຂະບວນການທັງໝົດ 500 ກວ່າທ່ານ ຈາກພາກລັດຂັ້ນສູນກາງ ແລະ ທ້ອງຖິ່ນ ລວມທັງ ອົງການຈັດຕັ້ງມະຫາຊົນ ແລະ ພາກສ່ວນເອກະຊົນ ໂດຍມີລົດຈຳນວນທັງໝົດ 110 ຄັນ ຢ່າງເປັນຂະບວນຄຶກຄື້ນ.
