ຮອງລັດຖະມົນຕີ ຊີ້ນຳວຽກສັນຕິບານໃຫ້ກຳລັງວິຊາສະເພາະຮັບໃຊ້ບໍລິການສັງຄັມ ປະຕິບັດຕາມແນວທາງນະໂຍບາຍຂອງພັກ-ລັດ

ພົຕ ກົງທອງ ພົງວິຈິດ ຮອງລັດຖະມົນຕີກະຊວງ ປກສ ໄດ້ໃຫ້ທິດຊີ້ນຳກ່ຽວກັບວຽກງານສັນຕິບານ ໂດຍເນັ້ນໃຫ້ຄະນະພັກ-ຄະນະບັນຊາກົມໃຫຍ່ສັນຕິບານ, ຫ້ອງສັນຕິບານ ປກສ ນວ ແລະ ປກສ ແຂວງ ທີ່ເຂົ້າຮ່ວມກອງປະຊຸມ ຈົ່ງເອົາໃຈໃສ່ຊີ້ນຳ-ບັນຊາກົມກອງກໍຄື ກຳລັງວິຊາສະເພາະທີ່ເຮັດໜ້າທີ່ຮັບໃຊ້ບໍລິການສັງຄົມ ເປັນຕົ້ນແມ່ນ ກຳລັງຕຳຫຼວດກວດຄົນເຂົ້າ-ອອກເມືອງ, ຕຳຫຼວດ ຄຸ້ມຄອງນັກທ່ອງທ່ຽວ, ຕຳຫຼວດ ຄຸ້ມຄອງຄົນຕ່າງປະເທດເປັນເຈົ້າ ການປະຕິບັດຕາມແນວທາງນະໂຍບາຍຂອງພັກ-ລັດໃນການດຶງດູດນັກທ່ອງທ່ຽວ ແລະ ນັກລົງທຶນຊາວຕ່າງປະເທດໃຫ້ເຂົ້າມາ ສປປ ລາວ ໃຫ້ຫຼາຍຂຶ້ນ.

ທິດຊີ້ນຳດັ່ງກ່າວມີຂຶ້ນໃນໂອກາດທີ່ທ່ານຮອງລັດຖະມົນຕີ ກະຊວງ ປກສ ເຂົ້າຮ່ວມໃນກອງປະຊຸມສະຫຼຸບວຽກງານສັນຕິບານ ປະຈຳປີ 2018 ແລະ ທິດທາງປີ 2019 ທີ່ຈັດຂຶ້ນວັນທີ 24 ມັງກອນ 2019 ເປັນປະທານໂດຍ ພົຈວ ບຸນມີ ແສງຄຳຢອງ ຫົວໜ້າກົມໃຫຍ່ສັນຕິບານ ກະຊວງ ປກສ; ໃນກອງປະຊຸມ ພົຕ ກົງທອງ ພົງ ວິຈິດ ໄດ້ມີທິດຊີ້ນຳໃຫ້ຄະນະພັກ-ຄະນະບັນຊາ ທີ່ຊີ້ນຳ-ບັນຊາ ວຽກງານສັນຕິບານ ຈົ່ງສືບຕໍ່ຊີ້ນຳກົມກອງກໍຄື:

ກຳລັງວິຊາສະເພາະທີ່ເຮັດໜ້າທີ່ຮັບໃຊ້ບໍລິການສັງຄົມ ຈົ່ງເປັນເຈົ້າການປະຕິບັດຕາມແນວທາງນະໂຍບາຍຂອງພັກ-ລັດ ກໍຄືໃນປີ 2019 ສປປ ລາວ ຈະເປີດປີທ່ອງທ່ຽວລາວ-ຈີນ, ກຳລັງວິຊາສະເພາະຄວນມີການວາງແຜນການດ້ານຕ່າງໆ.

ເພື່ອປະຕິບັດໃຫ້ຖືກຕາມຫຼັກການວິຊາສະເພາະ ແລະ ຖືກຕ້ອງສອດຄ່ອງຕາມແນວທາງນະໂຍບາຍພັກ-ລັດ ເພື່ອຮັບປະກັນການປະຕິບັດໜ້າທີ່ຮັກສາຄວາມສະຫງົບ, ການອຳນວຍຄວາມສະດວກໃຫ້ຄົນເຂົ້າ-ອອກເມືອງ ຕາມດ່ານຕ່າງໆ, ຄຸ້ມຄອງຄົນຕ່າງປະເທດທີ່ມາອາໄສ ແລະ ດຳລົງຊີວິດຢູ່ ສປປ ລາວ ໃຫ້ມີຄວາມສະຫງົບປອດໄພ ແນໃສ່ດຶງດູດນັກທ່ອງທ່ຽວ-ນັກລົງທຶນຊາວຕ່າງປະເທດ, ໂດຍສະເພາະຊາວຈີນ ໃຫ້ເຂົ້າມາທ່ອງທ່ຽວ ແລະ ມາລົງທຶນຢູ່ ສປປ ລາວ ໃຫ້ຫຼາຍຍິ່ງຂຶ້ນ; ພ້ອມດຽວກັນນີ້ ກໍໃຫ້ຕິດຕາມບັນດາພະນັກ ງານທີ່ປະຈຳຢູ່ດ່ານ ຖ້າຫາກວ່າຄວາມຮູ້ຄວາມສາມາດຍັງບໍ່ທັນສອດຄ່ອງ ກໍໃຫ້ມີການປັບປຸງຄຸ້ມຄອງໃຫ້ມີ ຄວາມສາມາດ-ມີຄວາມພຽບພ້ອມ ເນື່ອງຈາກວ່າເປັນປະຕູເຂົ້າເປັນ ພາບພົດບົດບາດຂອງກຳລັງປ້ອງກັນຄວາມສະຫງົບ.

ໃນກອງປະຊຸມ, ພັອ ໄພວັນ ແມນວິໄລ ຫົວໜ້າຫ້ອງການກົມໃຫຍ່ສັນຕິບານ ກະຊວງ ປກສ ໄດ້ຂຶ້ນຜ່ານບົດສະຫຼຸບວຽກງານສັນຕິບານປະຈຳປີ 2018 ອັນພົ້ນເດັ່ນ ແມ່ນການປະຕິບັດວຽກງານກວດຄົນເຂົ້າ-ອອກເມືອງ ມີຄວາມສະດວກວ່ອງໄວ, ຮັບປະກັນຖືກຕ້ອງຕາມແນວທາງຂອງພັກ ແລະ ຫຼັກການວິຊາສະເພາະ, ສາມາດກວດກາຄົນເຂົ້າເມືອງຢູ່ບັນດາດ່ານ ໃນຂອບເຂດທົ່ວປະເທດໄດ້ທັງໝົດ 6.341.333 ຄົນ ຍິງ 2.446.564 ຄົນ, ຂາອອກ 6.578. 290 ຄົນ ຍິງ 2.815.979 ຄົນ, ກວດພົບ ແລະ ປະຕິເສດການຂໍເຂົ້າເມືອງຕໍ່ຜູ້ບໍ່ຄົບເງື່ອນໄຂເຂົ້າ ສປປ ລາວ ມີ 29 ຄົນ ມີ 12 ສັນຊາດ.